കണ്ണൂര്: യൂത്ത് കോണ്ഗ്രസ് പ്രവര്ത്തകന് സുജിത്തിനെ കുന്നംകുളം പോലീസ് സ്റ്റേഷനില് ക്രൂരമായി മര്ദിച്ച സംഭവത്തിന്റെ ദൃശ്യങ്ങള് പുറത്തുവന്നതിന് പിന്നാലെ, പ്രതിപക്ഷ നേതാവ് വി.ഡി.സതീശന് മുഖ്യമന്ത്രിക്കൊപ്പം ഓണസദ്യ കഴിച്ചത് അനുചിതമായെന്ന് കോണ്ഗ്രസ് എംപി കെ.സുധാകരന്. കണ്ണൂരില് മാധ്യമങ്ങളോട് സംസാരിക്കവെ, താനായിരുന്നെങ്കില് ഇത്തരമൊരു നടപടി സ്വീകരിക്കില്ലായിരുന്നുവെന്നും ഇത് മോശമായിപ്പോയെന്നും സുധാകരന് വിമര്ശിച്ചു. പോലീസ് അതിക്രമത്തിന്റെ ഈ കേസിനെ പാര്ട്ടി അതീവ ഗൗരവത്തോടെയാണ് കാണുന്നതെന്നും, ഇതുപോലൊരു സംഭവം ഇതുവരെ പാര്ട്ടിക്ക് നേരിടേണ്ടി വന്നിട്ടില്ലെന്നും അദ്ദേഹം കൂട്ടിച്ചേര്ത്തു.
അതേസമയം, കസ്റ്റഡി മര്ദനവുമായി ബന്ധപ്പെട്ട് മുഖ്യമന്ത്രി ഇതുവരെ പ്രതികരിക്കാത്തതിനെതിരെ വി.ഡി.സതീശന് രൂക്ഷവിമര്ശനം ഉന്നയിച്ചു. മുഖ്യമന്ത്രി ഇക്കാര്യത്തില് ഒരു ഫെയ്സ്ബുക്ക് പോസ്റ്റ് പോലും ഇട്ടിട്ടില്ലെന്നും, നടപടി എടുക്കില്ലെന്ന് അദ്ദേഹം പറയുകയാണെങ്കില് തങ്ങള്ക്ക് എങ്ങനെ പ്രതികരിക്കണമെന്ന് കാണിച്ചുതരാമെന്നും സതീശന് വ്യക്തമാക്കി. മുഖ്യമന്ത്രിക്ക് ഈ വിഷയത്തില് ഉത്തരവാദിത്തം വ്യക്തമാക്കേണ്ട ബാധ്യതയുണ്ടെന്നും അദ്ദേഹം ഊന്നിപ്പറഞ്ഞു.
