തിരുവനന്തപുരം: ജൂനിയര് അഭിഭാഷകയെ ക്രൂരമായി മര്ദിച്ച കേസില് അഭിഭാഷകന് ബെയ്ലിന് ദാസിന് ജാമ്യം. റിമാന്ഡിലായി നാലാം ദിവസമാണ് തിരുവനന്തപുരം ജുഡീഷ്യല് ഫസ്റ്റ് ക്ലാസ് മജിസ്ട്രേറ്റ് കോടതി ബെയ്ലിന് ജാമ്യം അനുവദിച്ചത്. ഒരു തരത്തിലും സാക്ഷികളെ സ്വാധീനിക്കാന് ശ്രമിക്കരുതെന്നത് ഉള്പ്പെടെ കര്ശന ഉപാധികളോടെയാണ് ജാമ്യം. പൊലീസ് ഹാജരാക്കിയ അന്വേഷണ പുരോഗതി റിപ്പോര്ട്ട് പരിഗണിച്ച ശേഷമാണ് കോടതി ജാമ്യം നല്കിയിരിക്കുന്നത്.
സ്ത്രീത്വത്തെ അപമാനിച്ച സംഭവം ഗൗരവമുള്ളതാണെന്നു പ്രോസിക്യൂഷന് വാദിച്ചു. പരാതിക്കാരിക്കു തൊഴിലിടത്തു സംഭവിച്ച ആക്രമണം അവരുടെ അന്തസ്സിനേറ്റ കളങ്കമായതിനാല് ജാമ്യം നല്കുന്നതു നീതി നിഷേധിക്കലാകുമെന്നും പ്രോസിക്യൂഷന് വ്യക്തമാക്കി. എന്നാല് അഭിഭാഷകന്റെ ഓഫിസിനുള്ളില് രണ്ട് ജൂനിയര് അഭിഭാഷകരുടെ തര്ക്കത്തിനൊടുവിലാണ് സംഭവം ഉണ്ടായതെന്ന വാദമാണ് പ്രതിഭാഗത്തിന്റേത്.
