കീം പരീക്ഷയുടെ പുതുക്കിയ റാങ്ക് പട്ടികയിൽ ഇടപെടണോ എന്ന കാര്യത്തിൽ സുപ്രീംകോടതി ഇന്ന് തീരുമാനം പ്രഖ്യാപിക്കും. ഹൈക്കോടതി ഉത്തരവിനെതിരെ സംസ്ഥാന സർക്കാർ അപ്പീൽ നൽകുന്നുണ്ടോ എന്ന് കോടതി ആരാഞ്ഞിരുന്നു. ഈ വിഷയം കണക്കിലെടുത്താണ് കോടതി അന്തിമ തീരുമാനം എടുക്കുക. പുതുക്കിയ റാങ്ക് പട്ടികയെ ചോദ്യം ചെയ്ത് കേരള സിലബസിലെ വിദ്യാർത്ഥികൾ നൽകിയ ഹർജിയിൽ ജസ്റ്റിസ് പി എസ് നരസിംഹ അധ്യക്ഷനായ ബെഞ്ച്, സർക്കാർ നയത്തിന്റെ നടപ്പാക്കൽ രീതിയിലാണ് പ്രശ്നമെന്ന് നിരീക്ഷിച്ചു. അവസാന നിമിഷ മാർക്ക് ഏകീകരണം ഉൾപ്പെടെയുള്ള പരിഷ്കാരങ്ങൾ എന്തിനുവേണ്ടിയായിരുന്നു എന്ന ചോദ്യവും കോടതി ഉന്നയിച്ചു. സംസ്ഥാനത്തിന്റെ സ്റ്റാൻഡിംഗ് കൗൺസൽ സികെ ശശിയോട് അപ്പീൽ സംബന്ധിച്ച് അന്വേഷിക്കാൻ കോടതി നിർദേശിച്ചതിനെ തുടർന്ന് കേസ് മാറ്റിവച്ചു.
പുതുക്കിയ റാങ്ക് പട്ടിക കേരള സിലബസിലെ വിദ്യാർത്ഥികൾക്ക് വലിയ പ്രതിസന്ധി സൃഷ്ടിക്കുന്നതായി അഭിഭാഷകൻ പ്രശാന്ത് ഭൂഷൺ കോടതിയിൽ വാദിച്ചു. വിദഗ്ധ സമിതിയുടെ ശുപാർശ പ്രകാരമാണ് സംസ്ഥാനം തീരുമാനം എടുത്തതെന്നും അദ്ദേഹം വ്യക്തമാക്കി. പ്രോസ്പെക്ടസിൽ എപ്പോൾ വേണമെങ്കിലും മാറ്റം വരുത്താൻ സംസ്ഥാനത്തിന് അധികാരമുണ്ടെന്ന വാദവും ഹർജിക്കാർ ഉന്നയിച്ചു. എന്നാൽ, പ്രവേശന നടപടികളെ പ്രതിസന്ധിയിലാക്കുന്ന ഇടപെടലുകൾ ഒഴിവാക്കണമെന്ന് കോടതി വ്യക്തമാക്കി. സംസ്ഥാന സർക്കാരിന് ഇതുവരെ നോട്ടീസ് നൽകിയിട്ടില്ല. കേരളം ഹർജി നൽകിയില്ലെങ്കിൽ, കേസിൽ ഉടൻ തീർപ്പ് ഉണ്ടായേക്കുമെന്നും കോടതി സൂചിപ്പിച്ചു.
