ന്യൂയോര്‍ക്ക്: പഹല്‍ഗാം ഭീകരാക്രമണത്തെ അപലപിച്ച് കേരള ഹിന്ദൂസ് ഓഫ് നോര്‍ത്ത് അമേരിക്ക. ഏപ്രില്‍ 27 ഞായറാഴ്ച്ച കേരള ഹിന്ദൂസ് ഓഫ് നോര്‍ത്ത് അമേരിക്കയുടെയും ഇതര ഹൈന്ദവ സംഘടനകളുടെയും മറ്റു ബഹുജന പ്രസ്ഥാനങ്ങളുടെയും ആഹ്വാനമനുസരിച്ച് അമേരിക്ക, കാനഡ, ന്യൂയോര്‍ക്കിലെ ടൈം സ്‌ക്വയര്‍ ഉള്‍പ്പെടെയുള്ള വിവിധ നഗരങ്ങളിലും വീടുകളിലുമായി വിളക്കു തെളിയിച്ച് പ്രാര്‍ത്ഥന നടത്തി. മരിച്ചവരുടെ ആത്മശാന്തിക്കും, ഉറ്റവരായ കുടുംബാംഗങ്ങള്‍ക്ക് അനുശോചനവും രേഖപ്പെടുത്തുകയും ജന്മനാടായ ഇന്ത്യക്ക് ഐക്യദാര്‍ഢ്യം പ്രഖ്യാപിച്ചു.
ഇന്ത്യയിലെ ശക്തമായ ഭരണകൂടം തക്കതായ മറുപടി കൊടുക്കണമെന്നും, നിരപരാധികളും നിരായുധരുമായ ജനങ്ങളെ മതം തിരഞ്ഞുനടത്തിയ ഹീനമായ നരഹത്യ ഒരു പരിഷ്‌കൃതസമൂഹത്തിനും പൊറുക്കാന്‍ പറ്റുന്നതല്ലെന്നും ഇന്ത്യന്‍സര്‍ക്കാരിന് തീവ്രവാദികളെ ഇല്ലായ്മ ചെയ്യുന്നതിന് എപ്പോഴും ഉറച്ച പിന്തുണ കൊടുക്കുന്നുവെന്നും, അമേരിക്കന്‍ ഐക്യനാടുകളിലെ നല്ലവരായ ജനങ്ങള്‍ക്കൊപ്പം കെ.എച്ച്.എന്‍.എ.യും ഉണ്ടാകുമെന്നും പ്രസിഡന്റ് ഡോ. നിഷാ പിള്ളയും ബോര്‍ഡ് ഓഫ് ട്രസ്റ്റീ ചെയര്‍മാന്‍ ഗോപിനാഥക്കുറുപ്പും സംയുക്തപ്രസ്താവനയില്‍ അറിയിച്ചു.
