മലപ്പുറം: മലയാളം സർവകലാശാലയ്ക്ക് ഭൂമി ഏറ്റെടുത്തതുമായി ബന്ധപ്പെട്ട് പി.കെ. ഫിറോസ് ഉന്നയിച്ച ആരോപണങ്ങൾ തള്ളി മുൻ മന്ത്രി കെ.ടി. ജലീൽ. താൻ മന്ത്രിയായിരിക്കുമ്പോഴല്ല ഭൂമി എടുക്കാൻ തീരുമാനിച്ചതെന്നും, ഭൂമി ഇടപാടിൽ ഒരു തരത്തിലുമുള്ള അഴിമതിയും നടന്നിട്ടില്ലെന്നും ജലീൽ വ്യക്തമാക്കി. പി.കെ. ഫിറോസിന്റെ ആരോപണങ്ങൾക്കുള്ള മറുപടിയായി നടത്തിയ വാർത്താസമ്മേളനത്തിലാണ് ജലീൽ ഇക്കാര്യങ്ങൾ പറഞ്ഞത്.
ഭൂമി ഇടപാട് യു.ഡി.എഫ് സർക്കാരിന്റെ കാലത്ത്
2016 ഫെബ്രുവരി 17-നാണ് ഒരു സെന്റിന് 1,70,000 രൂപ നിരക്കിൽ ഭൂമി വാങ്ങാൻ ധാരണയായതെന്നും, അന്ന് യു.ഡി.എഫ്. സർക്കാരാണ് അധികാരത്തിലുണ്ടായിരുന്നതെന്നും ജലീൽ ചൂണ്ടിക്കാട്ടി. പിന്നീട് വന്ന ഇടതു സർക്കാർ ഒരു സെന്റിന് പതിനായിരം രൂപ കുറയ്ക്കുകയാണ് ചെയ്തതെന്നും അദ്ദേഹം പറഞ്ഞു. കൂടാതെ, ഉപയോഗശൂന്യമായ ആറേകാൽ ഏക്കർ ഭൂമി ഏറ്റെടുക്കുന്നതിൽ നിന്ന് ഒഴിവാക്കിയെന്നും ജലീൽ കൂട്ടിച്ചേർത്തു.
‘കമ്മീഷൻ എന്റെ ശീലമല്ല, ഫിറോസിന്റെ ശീലമാണ്’
”എന്തു ചെയ്യുമ്പോഴും കമ്മീഷൻ പ്രതീക്ഷിക്കുന്നവരാണ് മുസ്ലീം ലീഗുകാരും കോൺഗ്രസും,” ജലീൽ ആരോപിച്ചു. പറമ്പ് കച്ചവടത്തിന്റെ കമ്മീഷൻ വാങ്ങുന്നത് തന്റെ ശീലമല്ല, അത് ഫിറോസിന്റെ ശീലമാണെന്നും അദ്ദേഹം ആഞ്ഞടിച്ചു. സർവകലാശാലയുടെ കെട്ടിട നിർമ്മാണം ആദ്യം വൈകിയത് സാമ്പത്തിക പ്രയാസം കാരണമാണെന്നും പിന്നീട് എം.എൽ.എയുടെ താൽപര്യക്കുറവും ഇതിന് കാരണമായെന്നും ജലീൽ പറഞ്ഞു.
ഭൂമി ഏറ്റെടുത്തത് നിർമ്മാണ യോഗ്യമല്ലാത്ത ഭൂമിയാണെന്ന ഫിറോസിന്റെ ആരോപണം ജലീൽ തള്ളി. ഭൂമി ഏറ്റെടുത്തത് തന്റെ താൽപര്യപ്രകാരമാണെന്നും ചെലവാക്കിയ തുക തിരികെ പിടിക്കണമെന്നും ഫിറോസ് ആവശ്യപ്പെട്ടിരുന്നു. ഈ വിഷയത്തിൽ പി.കെ. ഫിറോസിന്റെ പ്രതികരണത്തിനായി രാഷ്ട്രീയ ലോകം ഉറ്റുനോക്കുകയാണ്.
