ന്യൂഡൽഹി: വോട്ടർ പട്ടിക തീവ്രപരിഷ്കരണം (എസ്ഐആർ) ചർച്ചയ്ക്കിടെ ലോക്സഭയിൽ അമിത് ഷായും രാഹുൽ ഗാന്ധിയും നേർക്കുനേർ ഏറ്റുമുട്ടി. താൻ എന്ത് പറയണമെന്ന് ആരും കൽപിക്കേണ്ടെന്ന് അമിത് ഷാ തിരിച്ചടിച്ചപ്പോൾ, തന്റെ മൂന്ന് പത്രസമ്മേളനങ്ങളെക്കുറിച്ച് തുറന്ന ചർച്ചയ്ക്ക് തയ്യാറാകണമെന്ന് രാഹുൽ ഗാന്ധി വെല്ലുവിളിച്ചു. “ഒളിച്ചോടില്ലെന്ന് കാണിക്കാൻ ചർച്ച നടത്തുന്നു” എന്ന് അമിത് ഷാ പറഞ്ഞെങ്കിലും, നെഹ്റു കുടുംബത്തെ ഉന്നമിട്ട് “പാരമ്പര്യമായി വോട്ട് ചോർത്തുന്നത് ചില കുടുംബങ്ങൾ” എന്ന് ആഞ്ഞടിച്ചു.
എസ്ഐആർ തിരഞ്ഞെടുപ്പ് കമ്മീഷന്റെ ഉത്തരവാദിത്വമാണെന്നും പാർലമെന്റിൽ ചർച്ച ചെയ്യാനാവില്ലെന്നും അമിത് ഷാ ആരംഭത്തിൽ വാദിച്ചു. എന്നാൽ കോൺഗ്രസ് ഭരണകാലത്താണ് ഏറ്റവും കൂടുതൽ എസ്ഐആർ നടന്നതെന്നും മൻമോഹൻ സിങ് കാലത്തും ഇതേ പ്രക്രിയ ഉണ്ടായിരുന്നുവെന്നും അദ്ദേഹം ചൂണ്ടിക്കാട്ടി. “ജനങ്ങൾ വോട്ട് ചെയ്യാത്തതിൽ പ്രതിപക്ഷം പരിഭ്രാന്തരാണ്. അനധികൃത കുടിയേറ്റക്കാരുടെ പേരുകൾ വോട്ടർ പട്ടികയിൽനിന്ന് മായ്ക്കപ്പെടുമെന്നതാണ് ആ ഭയം” എന്ന് അമിത് ഷാ ആരോപിച്ചു.
രാഹുൽ ഗാന്ധി നവംബറിൽ “അണുബോംബ്” പൊട്ടിച്ചെന്ന് അമിത് ഷാ പരിഹസിച്ചു. ഹരിയാണയിലെ വോട്ടർമാരുടെ പട്ടികയിൽ പേരുള്ളവർ ബിഹാറുകാരല്ലെന്നും ഓൺലൈൻ ഫോം തെറ്റായി പൂരിപ്പിച്ചതാണെന്ന് മിൻ്റാ ദേവി തന്നെ പറഞ്ഞുവെന്നും അദ്ദേഹം ചൂണ്ടിക്കാട്ടി. “നിങ്ങൾ ജയിക്കുമ്പോൾ തിരഞ്ഞെടുപ്പ് കമ്മീഷൻ മികച്ചതാകും, തോൽക്കുമ്പോൾ കഴിവുകെട്ടതാകും – ഇരട്ടത്താപ്പ് ഇനി നടക്കില്ല” എന്ന് അമിത് ഷാ തുറന്നടിച്ചു.
പലതവണ രാഹുൽ ഗാന്ധി ഇടപെട്ടപ്പോൾ അമിത് ഷാ ക്ഷുഭിതനായി. “മുതിർന്ന നേതാക്കൾ സംസാരിക്കുമ്പോൾ തടസ്സപ്പെടുത്തരുത്” എന്ന് മുന്നറിയിപ്പ് നൽകിയ ശേഷം അദ്ദേഹം പ്രസംഗം പൂർത്തിയാക്കി. പ്രതിപക്ഷ ബെഞ്ചുകളിൽ നിന്നുള്ള ബഹളം ഉയർന്നെങ്കിലും സ്പീക്കർ ഇടപെട്ട് സഭാനടപടികൾ പുനഃസ്ഥാപിച്ചു. എസ്ഐആർ വിവാദം പാർലമെന്റിന്റെ ശീതകാല സമ്മേളനത്തിലെ ഏറ്റവും നാടകീയ മുഹൂർത്തങ്ങളിലൊന്നായി മാറി.
