മഹാകുംഭ് നഗര്‍: ലോകത്തിലെ ഏറ്റവും വലിയ മതസമ്മേളനം പ്ലാസ്റ്റിക് രഹിതമാണെന്ന് ഉറപ്പാക്കാന്‍ മഹാകുംഭ മേളയില്‍ തുണി സഞ്ചികളും സ്റ്റീല്‍ പ്ലേറ്റുകളും ഗ്ലാസുകളും വിതരണം ചെയ്യുന്നു. പ്ലാസ്റ്റിക് ബാഗുകളും ഉപയോഗശൂന്യമായ വസ്തുക്കളും ഉപയോഗിക്കാതിരിക്കാന്‍ ‘ഒരു പ്ലേറ്റ്, ഒരു ബാഗ്’ കാമ്പയിന്‍ ആരംഭിച്ചതായി സംഘടനയുടെ പ്രാന്ത പ്രചാര് പ്രമുഖ് മുറാര്‍ ത്രിപാഠി പറഞ്ഞു.
പ്ലാസ്റ്റിക് രഹിത സമൂഹം സൃഷ്ടിക്കുന്നതിന് കൂട്ടായ ശ്രമങ്ങള്‍ ആവശ്യമാണെന്ന് ആര്‍എസ്എസ് സഹ-സര്‍ക്കാര്യവാഹ് കൃഷ്ണ ഗോപാല്‍ പറഞ്ഞു. എല്ലാവരും തുണി സഞ്ചികള്‍ ഉപയോഗിക്കണമെന്നും അദ്ദേഹം ആവശ്യപ്പെട്ടു.
‘തുണി സഞ്ചികളും കാരി ബാഗുകളും സന്ദര്‍ശകര്‍ക്ക് വിതരണം ചെയ്യുന്നുണ്ട്, ആറ് കേന്ദ്രങ്ങളില്‍ നിന്ന് ഏകദേശം 70,000 ബാഗുകള്‍ ഇതിനകം വിതരണം ചെയ്തിട്ടുണ്ട്. കൂടാതെ, രാജ്യത്തുടനീളമായി 2 ദശലക്ഷം സ്റ്റീല്‍ പ്ലേറ്റുകളും ഗ്ലാസുകളും ശേഖരിച്ചിട്ടുണ്ടെന്ന് സംഘാടകര്‍ വ്യക്തമാക്കി.
ഉത്തര്‍പ്രദേശ് മുഖ്യമന്ത്രി യോഗി ആദിത്യനാഥ് തീര്‍ത്ഥാടന വേളയില്‍ പരിസ്ഥിതി സൗഹൃദ രീതികള്‍ സ്വീകരിക്കാനും പ്ലാസ്റ്റിക് ഒഴിവാക്കാനും ജനങ്ങളോട് അഭ്യര്‍ത്ഥിച്ചിട്ടുണ്ട്.
