തിരുവനന്തപുരം : കേരളത്തിന്റെ സില്‍വര്‍ലൈന്‍ പദ്ധതിക്ക് കേന്ദ്ര സര്‍ക്കാരില്‍ നിന്നും അനുമതി ലഭിക്കില്ലെന്ന് മെട്രോമാന്‍ ഇ.ശ്രീധരന്റെ വെളിപ്പെടുത്തല്‍. കെ റെയിലിന് ബദലായി താന്‍ സമര്‍പ്പിച്ച റെയില്‍ പാതയില്‍ സംസ്ഥാന സര്‍ക്കാരിന് താല്‍പര്യമുണ്ട്. ഈ പദ്ധതി മുഖ്യമന്ത്രിക്ക് ഇഷ്ടമായിരുന്നു. കെ റെയില്‍ ഉപേക്ഷിച്ചുവെന്നു സംസ്ഥാന സര്‍ക്കാര്‍ കേന്ദ്രത്തെ അറിയിച്ചാല്‍ പുതിയ പാതയ്ക്ക് അനുമതി ലഭിക്കുമെന്നും എന്നാല്‍ മടി മൂലമാണ് അത്തരമൊരു നീക്കവുമായി കേരളം മുന്നോട്ടുപോകാത്തതെന്നും ശ്രീധരന്‍ കുറ്റപ്പെടുത്തി.
സംസ്ഥാനത്ത് സെമി സ്പീഡ് റെയില്‍ പദ്ധതി നിര്‍ദേശം നടപ്പാക്കാനാണു ശ്രമിക്കേണ്ടതെന്നും ബദല്‍ പദ്ധതിക്ക് എല്ലാ പിന്തുണയും നല്‍കുമെന്നും ശ്രീധരന്‍ പാലക്കാട് മാധ്യമങ്ങളോടു സംസാരിക്കവെ വ്യക്തമാക്കി.
