ന്യൂഡല്‍ഹി : യുഎസുമായി വ്യാപാരക്കരാറിലേര്‍പ്പെടാനുള്ള നേരത്തേ തീരുമാനിച്ച യാത്ര ജപ്പാന്‍ പ്രതിനിധി റദ്ദാക്കിയെന്ന് റിപ്പോര്‍ട്ട്. പ്രധാനമന്ത്രി നരേന്ദ്ര മോദിയുടെ സന്ദര്‍ശനത്തിനു തൊട്ടുമുന്‍പായാണ് ജപ്പാന്റെ വ്യാപാര പ്രതിനിധി റിയോസെയ് അകാസാവ യുഎസിലേക്കുള്ള യാത്ര റദ്ദാക്കിയത്.
ജപ്പാന്‍ യുഎസില്‍ നടത്തുന്ന 550 ബില്യണ്‍ ഡോളറിന്റെ നിക്ഷേപ കരാറിന് ഔദ്യോഗിക സ്ഥിരീകരണം നല്‍കുകയായിരുന്നു അകാസാവയുടെ ലക്ഷ്യം. ഇതിനായാണു ഇദ്ദേഹം യുഎസിലേക്ക് പോകാനിരുന്നത്.
യുഎസുമായുള്ള വ്യാപാര കരാറുമായി ബന്ധപ്പെട്ട് ഭരണതലത്തില്‍ കൂടുതല്‍ ചര്‍ച്ചകള്‍ ആവശ്യമാണെന്നും അതു കാരണമാണ് പ്രതിനിധിയുടെ യാത്ര റദ്ദാക്കിയതെന്നുമാണ് ജപ്പാന്‍ സര്‍ക്കാര്‍ വക്താവ് അറിയിച്ചിരിക്കുന്നത്.
ജപ്പാനില്‍ നിന്നുള്ള ഉല്‍പ്പന്നങ്ങള്‍ക്ക് യുഎസ് തീരുവ 15 ശതമാനമായി കുറച്ചതിനു പിന്നാലെയാണ് ജപ്പാന്‍ യുഎസില്‍ 550 ബില്യണിന്റെ നിക്ഷേപം വാഗ്ദാനം ചെയ്തത്.
അതേസമയം, പ്രധാനമന്ത്രി മോദി ഇന്ന് ജപ്പാനിലെത്തും. ഇന്ത്യ-ജപ്പാന്‍ വാര്‍ഷിക ഉച്ചകോടിയില്‍ പങ്കെടുക്കാനാണ് മോദിയുടെ സന്ദര്‍ശനം. പിന്നാലെ 31, സെപ്റ്റംബര്‍ ഒന്ന് തീയതികളില്‍ ചൈനയും സന്ദര്‍ശിക്കും.
