ന്യൂയോർക്ക്: ആമസോൺ നേതൃത്വത്തിനെതിരെ ഒരു പൊതു മുന്നറിയിപ്പ് നൽകി ആയിരത്തിലധികം ജീവനക്കാർ. എഐ യുടെ ഉത്തരവാദിത്തമുള്ള വിന്യാസം ആവശ്യപ്പെട്ട് ആയിരത്തിലധികം ആമസോൺ ജീവനക്കാരും പുറത്തു നിന്നുള്ള രണ്ടായിരത്തിലധികം ആളുകളും ഐക്യദാർഢ്യം പ്രഖ്യാപിച്ച് കത്തിൽ ഒപ്പിട്ടിട്ടുണ്ട്.
ആദ്യമായാണ് ഇത്തരമൊരു നീക്കം ആമസോൺ ജീവനക്കാരിൽ നിന്നുണ്ടാവുന്നത്. ആഗോളതലത്തിൽ സ്വേച്ഛാധിപത്യം വർധിക്കുകയും, കാലാവസ്ഥാ പ്രതിസന്ധിയെ മറികടക്കാൻ ഏറ്റവും പ്രധാനപ്പെട്ട വർഷങ്ങളിലൂടെ കടന്നുപോവുകയും ചെയ്യുന്ന ഈ സമയത്ത് ഈ എഐയുടെ അതിക്രമകരമായ വിന്യാസത്തെക്കുറിച്ച് ഞങ്ങൾക്ക് ഗുരുതരമായ ആശങ്കകളുണ്ടെന്നാണ് ജീവനക്കാർ പങ്കുവച്ച കത്തിലൂടെ വ്യക്തമാക്കുന്നത്.
നിർമ്മിത ബുദ്ധിയുടെ അതിവേഗവും എല്ലാ നഷ്‌ടങ്ങളും ന്യായീകരിച്ച് കൊണ്ടുള്ള മുന്നോട്ടുള്ള പോക്കും അത്ര സുഖകരമല്ലെന്നും ജനാധിപത്യത്തിനും, തൊഴിലുകൾക്കും, ഭൂമിക്ക് പോലും വലിയ ദോഷങ്ങൾ വരുത്തുമെന്നാണ് അവരുടെ വാദം. ആമസോൺ സിഇഒ ആൻഡി ജാസി ഉൾപ്പെടെയുള്ള ഉന്നത നേതൃത്വത്തിനാണ് ജീവനക്കാരുടെ തുറന്ന കത്ത്. ഈ കത്ത് സംഘടിപ്പിച്ചത് ആമസോൺ എംപ്ലോയീസ് ഫോർ ക്ലൈമറ്റ് ജസ്‌റ്റിസ് എന്ന ആക്റ്റിവിസ്‌റ്റ് ഗ്രൂപ്പാണ്. ഈ തുറന്ന കത്തിൽ ഇതുവരെ മുതിർന്ന എഞ്ചിനീയർമാർ, മാനേജർമാർ, ശാസ്ത്രജ്ഞർ, ഡിസൈനർമാർ, ലോജിസ്‌റ്റിക്‌സ് തൊഴിലാളികൾ, മാർക്കറ്റിംഗ് പ്രൊഫഷണലുകൾ എന്നിവർ ഉൾപ്പെടെ 1,039-ലധികം ആമസോൺ ജീവനക്കാരും ആമസോണിന് പുറത്തുനിന്നുള്ള 2,436-ൽ അധികം ആളുകളും ഒപ്പിട്ടു.
എഐ സാങ്കേതികവിദ്യകളുടെ അതിവേഗത്തിലുള്ള വിന്യാസത്തിലൂടെ ധാർമ്മികത, സുസ്ഥിരത, മനുഷ്യക്ഷേമം എന്നിവയെക്കാൾ ലാഭത്തിനും ഓട്ടോമേഷനും മുൻഗണന നൽകുന്നുവെന്നാണ് ഇവർ ചൂണ്ടിക്കാട്ടുന്നത്. കത്തിൽ, കമ്പനിയുടെ നിലവിലെ സമീപനം ജനാധിപത്യ സ്ഥാപനങ്ങളെ ദുർബലപ്പെടുത്തുകയും, കാലാവസ്ഥാ തകർച്ചക്ക് വേഗത കൂട്ടുകയും, അമിതമായ ഓട്ടോമേഷൻ വഴി തൊഴിലവസരങ്ങൾ ഇല്ലാതാക്കുകയും ചെയ്യുമെന്ന് ജീവനക്കാർ വാദിക്കുന്നു.
ധാർമ്മികമായ എഐ വർക്കിംഗ് ഗ്രൂപ്പുകൾ രൂപീകരിക്കാൻ തൊഴിലാളികൾ കമ്പനിയോട് ആവശ്യപ്പെടുന്നു. ഇതിൽ മാനേജർമാരല്ലാത്ത ജീവനക്കാരെ ഉൾപ്പെടുത്തണമെന്നും സാങ്കേതികവിദ്യ എങ്ങനെ വികസിപ്പിക്കുകയും വിന്യസിക്കുകയും ചെയ്യണം എന്നതിനെക്കുറിച്ച് അർത്ഥവത്തായ അഭിപ്രായം പറയാനുള്ള അവസരം ഇത് അവർക്ക് നൽകുമെന്നും ജീവനക്കാർ ചൂണ്ടിക്കാട്ടുന്നു. എഐ ടൂളുകൾ ജോലിഭാരം, കരിയർ പാതകൾ, തൊഴിൽ സാഹചര്യങ്ങൾ എന്നിവയെ എങ്ങനെ ബാധിക്കുന്നു എന്നതിനെക്കുറിച്ച് കൃത്യമായ വിവരങ്ങൾ പങ്കുവയ്ക്കണമെന്നും അവർ ആവശ്യപ്പെടുന്നു.
More than a thousand employees write to Amazon leadership, saying AI should be treated with extreme caution.
