കൊച്ചി ∙ വല്ലാർപാടം ബസിലിക്കയിൽ നടന്ന ഗംഭീര ചടങ്ങിൽ കേരള കത്തോലിക്കാ സഭയിലെ ആദ്യ സന്യാസിനിയും കർമലീത്ത നിഷ്പാദുക മൂന്നാം സഭ സ്ഥാപകയുമായ മദർ ഏലീശ്വയെ വാഴ്ത്തപ്പെട്ടവരുടെ ഗണത്തിലേക്ക് ഉയർത്തി. മലേഷ്യയിലെ പെനാങ് രൂപതാധ്യക്ഷൻ കർദിനാൾ ഡോ. സെബാസ്റ്റ്യൻ ഫ്രാൻസിസ് വൈകിട്ട് 4.30ന് പ്രഖ്യാപനം നടത്തി. വരാപ്പുഴ മെത്രാപ്പൊലീത്ത ഡോ. ജോസഫ് കളത്തിപ്പറമ്പിൽ അഭ്യർഥന നൽകി, വത്തിക്കാൻ അപ്പോസ്തലിക് പ്രതിനിധി ആർച്ച്ബിഷപ് ഡോ. ലെയോപോൾദോ ജിറെല്ലി സന്ദേശം അയച്ചു. ലത്തീൻ സഭയ്ക്കും കേരള കത്തോലിക്കർക്കും കൃതജ്ഞതയുടെ നാഴികക്കല്ലാണിത്.
1831 ഒക്ടോബർ 15ന് വൈപ്പിൻ ഓച്ചന്തുരുത്ത് വിശുദ്ധ കുരിശ് ഇടവകയിലെ വൈപ്പിശേരി തറവാട്ടിൽ തൊമ്മൻ–താണ്ട ദമ്പതികളുടെ എട്ടു മക്കളിൽ ആദ്യത്തെയാളായി ജനിച്ച ഏലീശ്വ 16-ാം വയസ്സിൽ വിവാഹിതയായി. വാകയിൽ വത്തരുവിന്റെ ഭാര്യയും ഒരു കുട്ടിയുടെ അമ്മയുമായി, പക്ഷേ 20-ാം വയസ്സിൽ വിധവയായി. വത്തരുവിന്റെ മരണശേഷം കളപ്പുരയിലൊരു മുറി പ്രാർഥനയ്ക്കായി ഒരുക്കി 10 വർഷം ധ്യാന-ഉപവാസ ജീവിതം നയിച്ചു. സഹോദരി ത്രേസ്യയോടൊപ്പം സന്യാസ ആഗ്രഹം ഫാ. ലെയോപോൾഡിനെ അറിയിച്ചു.
മെത്രാപ്പൊലീത്ത ബെർണദീൻ ബച്ചിനെല്ലി റോമിൽനിന്ന് അനുമതി നേടി. ഏലീശ്വയുടെയും മകൾ അന്നയുടെയും സ്ഥലത്ത് ഫാ. ലിയോപോൾഡ് മഠം പണിതു. കേരളത്തിലെ ആദ്യ സന്യാസിനി സഭയ്ക്ക് അടിത്തറയിട്ട മദർ ഏലീശ്വയുടെ ജീവിതം പ്രാർഥനയുടെയും ത്യാഗത്തിന്റെയും മാതൃകയായി. വാഴ്ത്തപ്പെട്ട പദവി ലത്തീൻ സഭയുടെ ആദ്യ വനിതാ വിശുദ്ധപദവി സാക്ഷാത്കാരത്തിനുള്ള ചുവടുവയ്പുമാണ്.
