ന്യൂഡൽഹി: കേന്ദ്ര തെരഞ്ഞെടുപ്പ് കമ്മീഷൻ രാജ്യവ്യാപക തീവ്ര വോട്ടർ പട്ടിക പരിഷ്കരണ (എസ്ഐആർ) പദ്ധതിയുടെ ഷെഡ്യൂൾ പ്രഖ്യാപിച്ചു. കേരളം ഉൾപ്പെടെ 12 സംസ്ഥാനങ്ങളിലും കേന്ദ്രഭരണ പ്രദേശങ്ങളിലും നാളെ മുതൽ എസ്ഐആർ നടപടികൾ ആരംഭിക്കുമെന്ന് മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ വാർത്താസമ്മേളനത്തിൽ അറിയിച്ചു. കേരളത്തിന് പുറമെ ഛത്തീസ്ഗഡ്, ഗോവ, ഗുജറാത്ത്, മധ്യപ്രദേശ്, രാജസ്ഥാൻ, തമിഴ്നാട്, ഉത്തർപ്രദേശ്, പശ്ചിമബംഗാൾ, പുതുച്ചേരി, ലക്ഷദ്വീപ്, ആൻഡമാൻ എന്നിവിടങ്ങളിലാണ് ആദ്യഘട്ട എസ്ഐആർ നടപ്പാക്കുന്നത്. വോട്ടർ പട്ടിക ഇന്നു മുതൽ ഈ പ്രദേശങ്ങളിൽ മരവിപ്പിക്കും, ആധാർ കാർഡ് തിരിച്ചറിയൽ രേഖയായി ഉപയോഗിക്കും.
ബീഹാറിൽ ആദ്യഘട്ട എസ്ഐആർ വിജയകരമായി പൂർത്തിയാക്കിയതായി കമ്മീഷൻ വ്യക്തമാക്കി, അവിടെ ഒരു അപ്പീൽ പോലും ലഭിച്ചില്ലെന്നും അറിയിച്ചു. 1951 മുതൽ 2004 വരെ രാജ്യത്ത് എട്ട് തവണ തീവ്ര വോട്ടർ പട്ടിക പരിഷ്കരണം നടന്നിട്ടുണ്ട്. എസ്ഐആർ നടപടികളുടെ ഭാഗമായി ബൂത്ത് ലെവൽ ഓഫീസർമാർ (ബിഎൽഒ) ഉൾപ്പെടെയുള്ളവർക്ക് നാളെ മുതൽ പരിശീലനം ആരംഭിക്കും. ഓൺലൈൻ വഴിയും അപേക്ഷകൾ സമർപ്പിക്കാം. രാഷ്ട്രീയ പാർട്ടികളുമായി ചർച്ച നടത്തി എസ്ഐആർ വിശദീകരിക്കാനും, അവർ നിർദേശിക്കുന്ന ബൂത്ത് തല ഏജന്റുമാർക്ക് പരിശീലനം നൽകാനും സിഇഒമാർക്ക് നിർദേശം നൽകിയിട്ടുണ്ട്.
കേരളത്തിൽ തദ്ദേശഭരണ തെരഞ്ഞെടുപ്പ് നടക്കുന്ന സാഹചര്യം പരിഗണിച്ച് എസ്ഐആർ നീട്ടിവയ്ക്കണമെന്ന് രാഷ്ട്രീയ പാർട്ടികൾ ആവശ്യപ്പെട്ടിരുന്നെങ്കിലും, ഈ നിർദേശം തള്ളിയാണ് കേന്ദ്ര തെരഞ്ഞെടുപ്പ് കമ്മീഷൻ മുന്നോട്ടുപോകുന്നത്. നിയമസഭ തെരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളെ ആദ്യ പട്ടികയിൽ ഉൾപ്പെടുത്തുമെന്ന് കമ്മീഷൻ നേരത്തെ സൂചന നൽകിയിരുന്നു. എസ്ഐആർ വഴി വോട്ടർ പട്ടികയുടെ കൃത്യത ഉറപ്പാക്കാനും തെറ്റുകൾ തിരുത്താനുമാണ് ലക്ഷ്യമിടുന്നത്, ഇത് വരാനിരിക്കുന്ന തെരഞ്ഞെടുപ്പുകൾക്ക് നിർണായകമാകും.
