പ്രസിഡന്റ് ഡോണൾഡ് ട്രംപ് 2025 ജനുവരിയിൽ വീണ്ടും അധികാരത്തിലെത്തിയതിന് ശേഷം ഏകദേശം 2 മില്യൺ അനധികൃത കുടിയേറ്റക്കാർ സ്വമേധയാ അമേരിക്ക വിട്ടതായി ആഭ്യന്തര സുരക്ഷാ വകുപ്പ് (DHS) പുറത്തുവിട്ട പുതിയ കണക്കുകൾ പറയുന്നു. ഇതിൽ ഏകദേശം 19 ലക്ഷം പേർ “സ്വയം മടങ്ങിപ്പോയവർ” (സെൽഫ്-ഡിപാർച്ചർ) ആണെന്നാണ് DHS പറയുന്നത്. മൊത്തം 25 ലക്ഷം പേരാണ് യുഎസ് വിട്ടതെന്ന് കണക്കുകൾ സൂചിപ്പിക്കുന്നു. ഇതിൽ ഇമിഗ്രേഷൻ ആൻഡ് കസ്റ്റംസ് എൻഫോഴ്സ്മെന്റ് (ICE) നടത്തിയ 6 ലക്ഷത്തിലധികം വരുന്ന ഔദ്യോഗിക നാടുകടത്തലുകളും ഉൾപ്പെടും.
ഈ കണക്കുകൾ കർശനമായ കുടിയേറ്റ നയം ഫലപ്രദമാണെന്ന് തെളിയിക്കുന്നതാണെന്നാണ് ട്രംപ് ഭരണകൂടം അവകാശപ്പെടുന്നത്. ഇമിഗ്രേഷൻ അധികൃതർ ഔദ്യോഗികമായി അറസ്റ്റ് ചെയ്യാതെയോ നാടുകടത്താതെയോ കുടിയേറ്റക്കാർ സ്വമേധയാ രാജ്യം വിടുന്നതാണ് “സ്വയം നാടുവിടൽ” എന്ന് DHS വിശദീകരിക്കുന്നു. കർശന നടപടികളും മുന്നറിയിപ്പുകളും തടങ്കലിന്റെ ഭീഷണിയും കാരണം പലരും രാജ്യം വിടാൻ തീരുമാനിക്കുന്നതായാണ് അധികൃതർ പറയുന്നത്. കർശനമായ നിയമനടപടികൾ ആളുകൾക്ക് വ്യക്തമായ സന്ദേശം നൽകുന്നുവെന്നും നിയമം ഗൗരവമായി നടപ്പാക്കിയാൽ ആളുകൾ അത് മനസ്സിലാക്കി സ്വയം മടങ്ങുമെന്നും മുൻ ഇമിഗ്രേഷൻ ജഡ്ജി ആൻഡ്രു ആർതർ അഭിപ്രായപ്പെട്ടു.
ICE-യ്ക്ക് നിലവിൽ ഏകദേശം 6,500 നാടുകടത്തൽ ഓഫീസർമാരേ ഉള്ളൂ. ലക്ഷക്കണക്കിന് ആളുകളെ വേഗത്തിൽ അറസ്റ്റ് ചെയ്ത് പുറത്താക്കാൻ ഇത് മതിയാകില്ല. അതിനാൽ സ്വമേധയാ മടങ്ങൽ പ്രായോഗിക മാർഗമാണെന്നാണ് ഭരണകൂടത്തിന്റെ നിലപാട്. അറസ്റ്റുകളുടെ ദൃശ്യങ്ങൾ സാമൂഹിക മാധ്യമങ്ങളിൽ വ്യാപകമായി പങ്കുവെച്ച് പ്രത്യേകിച്ച് ക്രിമിനൽ കേസുകളുള്ള കുടിയേറ്റക്കാരെ ചൂണ്ടിക്കാട്ടി, നിയമവിരുദ്ധമായി തുടരുന്നവർക്ക് മുന്നറിയിപ്പ് നൽകുകയാണ് വൈറ്റ് ഹൗസ്. ഇത് ഭീഷണിപ്പെടുത്തലല്ല. സന്ദേശം ലളിതമാണ്. അനധികൃതമായി വരരുത് എന്ന് ബോർഡർ പട്രോൾ മേധാവി മൈക്ക് ബാങ്ക്സ് പറഞ്ഞു.
സ്വമേധയാ മടങ്ങൽ പ്രോത്സാഹിപ്പിക്കാൻ DHS ഈ വർഷം പ്രോത്സാഹന പദ്ധതിയും വിപുലപ്പെടുത്തിയിട്ടുണ്ട്. CBP Home മൊബൈൽ ആപ്പിൽ രജിസ്റ്റർ ചെയ്യുന്ന അനധികൃത കുടിയേറ്റക്കാർക്ക് സ്വന്തം രാജ്യത്തേക്ക് സൗജന്യ വിമാനടിക്കറ്റും തുകയും (ആദ്യത്തിൽ 1,000 ഡോളർ, പിന്നീട് 3,000 ഡോളർ), നിയമവിരുദ്ധ താമസവുമായി ബന്ധപ്പെട്ട ചില പിഴകൾ ഒഴിവാക്കലും ലഭിക്കും. പദ്ധതി അവഗണിക്കുന്നവർക്ക് അറസ്റ്റ് നേരിടേണ്ടിവരുമെന്നും യുഎസിലേക്ക് പ്രവേശിക്കാൻ സ്ഥിരമായ വിലക്ക് ഏർപ്പെടുത്തുമെന്നും ആഭ്യന്തര സുരക്ഷാ സെക്രട്ടറി ക്രിസ്റ്റി നോം പറഞ്ഞു. ഒരാളെ അറസ്റ്റ് ചെയ്ത് തടവിലാക്കി നാടുകടത്താൻ ശരാശരി 17,000 ഡോളർ ചെലവാകുമെന്നും, അതിനെക്കാൾ കുറഞ്ഞ ചെലവാണ് ഈ പദ്ധതി വഴി ഉണ്ടാകുന്നതെന്നും DHS വ്യക്തമാക്കി.
അതേസമയം, 19 ലക്ഷം സ്വയം മടങ്ങൽ എന്ന കണക്കിൽ സംശയം പ്രകടിപ്പിക്കുന്നവരും ഉണ്ട്. കാറ്റോ ഇൻസ്റ്റിറ്റ്യൂട്ടിലെ ഡേവിഡ് ബിയർ പറയുന്നതനുസരിച്ച്, നിയമപരമായി യുഎസിലുണ്ടായിരുന്ന ചിലർ സ്വമേധയാ മടങ്ങിയതും ഈ കണക്കിൽ ഉൾപ്പെട്ടിരിക്കാം. മുമ്പ് സ്വമേധയാ മടങ്ങലും ഔദ്യോഗിക നാടുകടത്തലും വേർതിരിച്ചാണ് റിപ്പോർട്ട് ചെയ്തിരുന്നത്, അതിനാൽ വർഷാന്തര താരതമ്യം ബുദ്ധിമുട്ടാണെന്നും വിമർശകർ പറയുന്നു. ICE തടങ്കൽ കേന്ദ്രങ്ങളിൽ റെക്കോർഡ് എണ്ണത്തിലാണ് കുടിയേറ്റക്കാരെ പാർപ്പിച്ചിരിക്കുന്നത്. ഇമിഗ്രേഷൻ കോടതികളിൽ കേസുകൾ കെട്ടിക്കിടക്കുന്നതിനാൽ വിചാരണകളും അപ്പീലുകളും വൈകുകയാണ്.
മനുഷ്യാവകാശ സംഘടനകൾ പറയുന്നത്, പല “സ്വമേധയാ” മടങ്ങലുകളും ശക്തമായ സമ്മർദ്ദത്തിന്റെ ഫലമാണെന്നാണ്. ഈ മാസം ആദ്യം, സിറിയ, പാലസ്തീൻ അതോറിറ്റി യാത്രാ രേഖ കൈവശമുള്ളവർ, ബർക്കിനാ ഫാസോ, മാലി, നൈജർ, സൗത്ത് സുഡാൻ, ലാവോസ്, സിയറാ ലിയോൺ എന്നിവ ഉൾപ്പെടെ ഏഴ് രാജ്യങ്ങളെ കൂടി യാത്രാ നിയന്ത്രണ പട്ടികയിൽ വൈറ്റ് ഹൗസ് ചേർത്തിരുന്നു. ഇതോടെ 20 രാജ്യങ്ങൾക്ക് ഇപ്പോൾ പൂർണ്ണമായോ ഭാഗികമായോ യുഎസിലേക്കുള്ള പ്രവേശന വിലക്ക് നിലവിലുണ്ട്. ഈ രാജ്യങ്ങളിലെ തിരിച്ചറിയൽ പരിശോധനാ സംവിധാനങ്ങൾ ദുർബലമാണെന്നും ഇത് ദേശീയ സുരക്ഷയ്ക്ക് ഭീഷണിയാണെന്നും ഭരണകൂടം വാദിക്കുന്നു.
Nearly 2 million illegal migrants have left the United States voluntarily since President Donald Trump returned to office in January 2025, according to new figures released by the Department of Homeland Security (DHS).
