2026-ൽ അമേരിക്കയിലെ ഏകദേശം 20 സംസ്ഥാനങ്ങൾ മിനിമം വേതനം ഉയർത്താൻ ഒരുങ്ങുന്നു. ഇതിലൂടെ അരിസോണ മുതൽ ന്യൂജഴ്സി വരെ വ്യാപിച്ചുള്ള കോടിക്കണക്കിന് തൊഴിലാളികൾക്ക് കൂടുതൽ ശമ്പളം ലഭിക്കും. റിപ്പബ്ലിക്കൻ, ഡെമോക്രാറ്റ് ഭരണത്തിലുള്ള സംസ്ഥാനങ്ങൾ ചേർന്നാണ് ജനുവരി 1 മുതൽ മിനിമം വേതനം വർധിപ്പിക്കുന്നത്. ഇക്കണോമിക് പോളിസി ഇൻസ്റ്റിറ്റ്യൂട്ട് (EPI) പുറത്തുവിട്ട കണക്കുകൾ പ്രകാരം, 2026-ൽ ഏകദേശം 83 ലക്ഷം തൊഴിലാളികൾക്ക് ഇതിന്റെ പ്രയോജനം ലഭിക്കും.
മൊത്തത്തിൽ 5 ബില്യൺ ഡോളറിന്റെ അധിക വരുമാനമാണ് തൊഴിലാളികൾക്ക് ലഭിക്കുക. 2026 മുതൽ മണിക്കൂറിന് 15 ഡോളർ മിനിമം വേതനം ഉറപ്പാക്കുന്ന സംസ്ഥാനങ്ങളിൽ താമസിക്കുന്ന തൊഴിലാളികളുടെ എണ്ണം, ഫെഡറൽ മിനിമം വേതനമായ 7.25 ഡോളർ മാത്രം നൽകുന്ന സംസ്ഥാനങ്ങളിലെ തൊഴിലാളികളെക്കാൾ കൂടുതലായിരിക്കും.
വേതന വർധനവിന് ശേഷം, മണിക്കൂറിന് 17.13 ഡോളർ മിനിമം വേതനം നൽകുന്ന രാജ്യത്തെ ആദ്യ സംസ്ഥാനം വാഷിങ്ടൺ ആകും. ന്യൂയോർക്ക് സിറ്റിയും ലോംഗ് ഐലൻഡും വെസ്റ്റ്ചെസ്റ്ററും ഉൾപ്പെടുന്ന മേഖലകളിൽ മണിക്കൂറിന് 17 ഡോളർ മിനിമം വേതനം നടപ്പാക്കുന്നതിനാൽ, ന്യൂയോർക്ക് രണ്ടാമത്തെ ഉയർന്ന വേതനനിരക്കുള്ള സംസ്ഥാനമാകും. മറ്റ് പ്രദേശങ്ങളിൽ കുറഞ്ഞത് മണിക്കൂറിന് 16 ഡോളർ ലഭിക്കും.
അരിസോണ, കാലിഫോർണിയ, കൊളറാഡോ, കണെറ്റിക്കട്ട്, ഹവായി, മെയിൻ, മിഷിഗൺ, മിന്നസോട്ട, മിസ്സൂരി, മോണ്ടാന, നെബ്രാസ്ക, ന്യൂജഴ്സി, ന്യൂയോർക്ക്, ഒഹായോ, റോഡ് ഐലൻഡ്, സൗത്ത് ഡക്കോട്ട, വെർമോണ്ട്, വെർജീനിയ, വാഷിങ്ടൺ എന്നിവയാണ് 2026-ൽ മിനിമം വേതനം ഉയർത്തുന്ന 19 സംസ്ഥാനങ്ങൾ.
സംസ്ഥാനങ്ങൾക്കൊപ്പം ഏകദേശം 50 നഗരങ്ങളും പ്രാദേശിക ഭരണകൂടങ്ങളും മിനിമം വേതനം ഉയർത്തും. കാലിഫോർണിയയിൽ മാത്രം 29 പ്രദേശങ്ങളിലാണ് വേതന വർധനവ്. വെസ്റ്റ് ഹോളിവുഡിൽ മണിക്കൂറിന് 20.25 ഡോളർ മിനിമം വേതനം നിലവിൽ വരും. വാഷിങ്ടണിലെ എട്ട് പ്രദേശങ്ങളിലും വേതനം ഉയരും. രാജ്യത്തെ ഏറ്റവും ഉയർന്ന മിനിമം വേതനമായ മണിക്കൂറിന് 21.65 ഡോളർ ടുക്വിലയിൽ നടപ്പാക്കും.
എന്നാൽ, തെക്കേ അമേരിക്കയിൽ ഉള്ള 20 സംസ്ഥാനങ്ങളിൽ ഇതിന്റെ സ്വാധീനം ഉണ്ടാകില്ല. അവിടങ്ങളിൽ മിനിമം വേതനം ഇല്ലാതെയോ, ഫെഡറൽ മിനിമം വേതനത്തെക്കാൾ കൂടുതലല്ലാത്ത നിരക്കുകളോ ആണ് നിലവിലുള്ളത്. അവസാനമായി ഫെഡറൽ മിനിമം വേതനം ഉയർത്തിയത് 2009-ലാണ്. അന്ന് കോൺഗ്രസ് മണിക്കൂറിന് 7.25 ഡോളറാണ് വേതനം നിശ്ചയിച്ചത്.
Nearly 20 U.S. states raise minimum wage by 2026; 83 lakh workers will benefit
