കാഠ്മണ്ഡു: ഇന്ത്യ തങ്ങളുടെയെന്ന് അവകാശപ്പെടുന്ന കാലാപാനി, ലിപുലേഖ്, ലിംപിയാധുര എന്നിവ ഉൾപ്പെടുത്തിയുള്ള പുതിയ ഭൂപടം ആലേഖനം ചെയ്ത 100 രൂപയുടെ കറൻസി നോട്ടുകൾ പുറത്തിറക്കി നേപ്പാൾ. സെൻട്രൽ ബാങ്ക് വ്യാഴാഴ്ച പുറത്തിറക്കിയ പ്രദേശങ്ങൾ ഉൾപ്പെടുത്തിയ ഭൂപടം വലിയ വിവാദമായി മാറിയിരിക്കുകയാണ് ഇപ്പോൾ. പുതിയ നോട്ടിൽ മുൻ ഗവർണർ മഹാ പ്രസാദ് അധികാരിയുടെ ഒപ്പാണുള്ളത്.
നോട്ടിൻ്റെ മുൻഭാഗത്ത് ഇടതുവശത്തായി എവറസ്റ്റ് കൊടുമുടിയും വലതുവശത്ത് നേപ്പാളിന്‍റെ ദേശീയ പുഷ്പമായ റോഡോഡെൻഡ്രോണിന്‍റെ വാട്ടർമാർക്കും ഉണ്ട്. മധ്യഭാഗത്ത് പശ്ചാത്തലത്തിലായി നേപ്പാളിന്‍റെ ഇളം പച്ച നിറത്തിലുള്ള ഭൂപടം കാണാം. ഇതിനു സമീപം ശ്രീബുദ്ധന്റെ ജന്മസ്ഥലമായ ലുംബിനി എന്ന വാചകത്തോടൊപ്പം അശോകസ്തംഭവും അച്ചടിച്ചിട്ടുണ്ട്.
2020 മെയ് മാസത്തിൽ കെ പി ശർമ്മ ഒലി സർക്കാരാണ് ഈ പ്രദേശങ്ങൾ ഉൾപ്പെടുത്തി പുതിയ രാഷ്ട്രീയ ഭൂപടം അവതരിപ്പിച്ചത്. പിന്നീട് ഇത് പാർലമെന്‍റ് അംഗീകരിക്കുകയും ചെയ്തു. അന്ന് ഇന്ത്യ ഇതിനെതിരെ ശക്തമായി പ്രതികരിക്കുകയും, ഇത് ഏകപക്ഷീയമായ നടപടി ആണെന്ന് വിശേഷിപ്പിക്കുകയും ചെയ്തിരുന്നു. പ്രദേശങ്ങളുടെ ഇത്തരത്തിലുള്ള കൃത്രിമ വിപുലീകരണം അംഗീകരിക്കില്ലെന്നും ഇന്ത്യ വ്യക്തമാക്കിയിരുന്നു.
എന്നാൽ, നേരത്തെ തന്നെ 100 രൂപ നോട്ടിൽ ഭൂപടം ഉണ്ടായിരുന്നുവെന്നും, സർക്കാർ തീരുമാനപ്രകാരം അത് പരിഷ്കരിച്ചതാണെന്നുമാണ് എൻആർബി വക്താവ് വ്യക്തമാക്കുന്നത്. 10, 50, 500, 1000 രൂപ തുടങ്ങിയ മറ്റ് നോട്ടുകളിൽ ഭൂപടം ഇല്ലെന്നും, 100 രൂപ നോട്ടിൽ മാത്രമാണ് നേപ്പാളിന്‍റെ ഭൂപടം ഉള്ളതെന്നും അദ്ദേഹം കൂട്ടിച്ചേർത്തു.
Nepal on Thursday issued its new banknote for the NPR 100, featuring an updated map that includes the disputed territories of Lipulekh, Limpiyadhura, and Kalapani. These are regions that India maintains are its own.
