വൻ ഭൂരിപക്ഷത്തോടെ ന്യൂയോർക്ക് മേയർ സ്ഥാനത്തേക്ക് തെരഞ്ഞെടുക്കപ്പെട്ട ഇന്ത്യൻ വംശജനും ആഫ്രിക്കയിൽ ജനിച്ച മുസ്ലിം നേതാവുമായ സോഹ്റാൻ മംദാനി സ്ത്രീകളെ മാത്രം ഉൾപ്പെടുത്തി ട്രാൻസിഷൻ ടീം പ്രഖ്യാപിച്ചു. പ്രസ്‌ബ്രീഫിങ്ങിലാണ് അദ്ദേഹം ഇക്കാര്യം അറിയിച്ചത്.
ബിൽ ഡി ബ്ലാസിയോ, എറിക് ആഡംസ്, മൈക്കൽ ബ്ലൂംബെർഗ് എന്നിവരുടെ ഭരണകാലങ്ങളിൽ പ്രവർത്തിച്ച അനുഭവമുള്ള വനിതാ നേതാക്കളാണ് ട്രാൻസിഷൻ ടീമിനെ നയിക്കുന്നത്. എലാന ലിയോപോൾഡ് എക്സിക്യൂട്ടീവ് ഡയറക്ടറായും മാരിയ ടോറസ്-സ്പ്രിംഗർ, ലിന ഖാൻ, ഗ്രേസ് ബോണില്ല, മെലനി ഹാർട്സോഗ് എന്നിവർ സഹ അധ്യക്ഷരായും പ്രവർത്തിക്കും.
നമ്മുടെ വാഗ്ദാനങ്ങൾ നടപ്പാക്കാൻ കഴിയുന്ന ഒരു സിറ്റി ഹാൾ നിർമ്മിക്കുകയാണ് ലക്ഷ്യമെന്നും പ്രസ്‌ബ്രീഫിങ്ങിൽ മംദാനി പറഞ്ഞു. പ്രസിഡന്റ് ഡൊണാൾഡ് ട്രംപുമായി ഇതുവരെ ബന്ധപ്പെടാനായിട്ടില്ലെന്നും, സഹകരിക്കാൻ താൽപര്യമുണ്ടെന്നും അദ്ദേഹം വ്യക്തമാക്കി. ന്യൂയോർക്കുകാർ നേരിടുന്ന ജീവിതച്ചെലവുകളെയും ട്രംപ് ഭരണകൂടത്തിന്റെ നിയമങ്ങൾ അവരുടെ ജീവിതത്തിൽ ഉണ്ടാക്കുന്ന മാറ്റങ്ങളെയും കുറിച്ച് സംസാരിക്കാൻ ആഗ്രഹിക്കുന്നുവെന്നും മംദാനി പറഞ്ഞു.
റിപ്പബ്ലിക്കൻ എതിരാളി കർട്ടിസ് സ്ലിവയുമായി സംസാരിച്ചു കഴിഞ്ഞെന്നും, മേയർ എറിക് ആഡംസുമായി ഉടൻ സംസാരിക്കുമെന്നും മംദാനി അറിയിച്ചു. മുൻ ഗവർണർ ആൻഡ്രൂ കുവോമോയെയും റിപ്പബ്ലിക്കൻ സ്ഥാനാർത്ഥി കർട്ടിസ് സ്ലിവയെയും പരാജയപ്പെടുത്തിയ മംദാനി 2026 ജനുവരി 1 മുതൽ മേയറുടെ ചുമതല ഏറ്റെടുക്കും.
New York’s new mayor, Zohrab Mamdani, announces an all-female transition team
