ന്യൂയോർക്കിൽ ജാലകങ്ങളൊന്നുമില്ലാത്ത ഒരു ഭീമൻ കെട്ടിടം വർഷങ്ങളായി ആളുകളെ അത്ഭുതപ്പെടുത്തിക്കൊണ്ടിരിക്കുന്നു. ലോവർ മാൻഹട്ടനിലെ 33 തോമസ് സ്‌ട്രീറ്റിൽ 550 അടി ഉയരമുള്ള കോൺക്രീറ്റ് ടവറിന് ജാലകങ്ങളില്ല. മനുഷ്യരുടെ സാന്നിധ്യം തോന്നിക്കുന്ന ഒന്നുമില്ല. അതിനകത്ത് എന്താണ് നടക്കുന്നത് എന്നതിന് വ്യക്തമായ മറുപടിയും ഇല്ല. ഈ കെട്ടിടത്തിന്റെ ഒരു വീഡിയോ അടുത്തിടെ Reddit-ൽ വൈറലായതോടെ ഇതിന്റെ അകത്ത് ശരിക്കും എന്താണ്? എന്ന പഴയ ചോദ്യവും വീണ്ടും ഉയർന്നു. 2017-ൽ നടൻ ടോം ഹാങ്ക്സ് പോലും ഈ കെട്ടിടത്തിന്റെ ചിത്രം പോസ്റ്റ് ചെയ്ത്, “ഞാൻ കണ്ടതിൽ ഏറ്റവുമൊരു ഭയപ്പെടുത്തുന്ന കെട്ടിടം! ഇതിന്റെ അകത്ത് എന്താണ് നടക്കുന്നത്?” എന്ന് ചോദിച്ചിരുന്നു.
1970-കളിൽ AT&T-യുടെ ദീർഘദൂര ടെലിഫോൺ നെറ്റ്‌വർക്ക് പ്രവർത്തിപ്പിക്കാനാണ് ഈ കെട്ടിടം പണിതത്. അതിനകത്തെ ഓരോ നിലക്കും 18 അടി ഉയരമുണ്ട്. പുറത്ത് നിന്ന് നോക്കുമ്പോൾ 40 നിലകളുള്ള സ്കൈസ്‌ക്രാപ്പറിനെ പോലെ തോന്നുമെങ്കിലും യഥാർത്ഥത്തിൽ 29 നിലകൾ മാത്രമാണ് കെട്ടിടത്തിന് ഉള്ളത്.ആധുനിക ഇന്റർനെറ്റ് കാലത്തിന് മുമ്പ്, ദീർഘദൂര ഫോൺ കോളുകൾ കൈകാര്യം ചെയ്യാൻ വലിയ യന്ത്രങ്ങൾ ആവശ്യമായിരുന്നതിനാൽ, ശക്തമായ മതിലുകളും കനത്ത കോൺക്രീറ്റും ഉപയോഗിച്ച് “കോട്ട” പോലെ പണിതതാണ് ഈ കെട്ടിടം. അണുബോംബ് ആക്രമണവും ചെറുക്കാനാകുന്ന രീതിയിലാണ് അത് ഡിസൈൻ ചെയ്തതെന്നും റിപ്പോർട്ടുകൾ പറയുന്നു. അതിനാൽ ജാലകങ്ങൾ സുരക്ഷയ്ക്കുള്ള “ബലഹീനത” എന്നതിനാലാണ് ഒഴിവാക്കിയതെന്നും ചരിത്ര രേഖകൾ വ്യക്തമാക്കുന്നു.
1999-ന് ശേഷം AT&T അവരുടെ ദീർഘദൂര സേവനങ്ങൾ മറ്റിടങ്ങളിലേക്ക് മാറ്റി. എന്നാൽ കെട്ടിടം അപ്രസക്തമായില്ല.ഇപ്പോൾ ഈ കെട്ടിടം പ്രധാന ടെലികമ്മ്യൂണിക്കേഷൻ ഹബ്ബായും ഉയർന്ന സുരക്ഷയുള്ള ഡാറ്റ സെന്റർ ആയും തുടരുകയാണ്.അമേരിക്കയിൽ നിങ്ങൾ ഒരു വീഡിയോ കാണുമ്പോൾ, ആ ഡാറ്റ ഇത്തരമൊരു കെട്ടിടത്തിലൂടെ കടന്നുപോകാനുള്ള സാധ്യത വളരെ കൂടുതലാണ് എന്നാണ് വിദഗ്ധർ പറയുന്നത്. AT&T-ക്ക് ഇത്തരത്തിൽ ജാലകങ്ങളില്ലാത്ത സ്ട്രക്ചറുകൾ ന്യൂയോർക്ക്, സാൻ ഫ്രാൻസിസ്കോ , ഷിക്കാഗോ, ഡാളസ്, വാഷിങ്ടൺ ഡിസി, ലോസ് ആഞ്ചലസ്, സിയാറ്റിൽ, അറ്റ്ലാന്റ തുടങ്ങിയ നഗരങ്ങളിലുമുണ്ട്.
ഇവയെല്ലാം ടെലിഫോൺ/ഇന്റർനെറ്റ് ട്രാഫിക് – സ്വിച്ചിംഗ് സെന്ററുകൾ ആണ്. ചിലത് ശീത യുദ്ധകാലത്ത് തന്നെ ദുരന്തങ്ങൾ ചെറുക്കാനായി പണിതവുമാണ്. The Intercept ഉൾപ്പെടെ ചില റിപ്പോർട്ടുകൾ പ്രകാരം AT&T-യുടെ ചില കെട്ടിടങ്ങൾ അമേരിക്കൻ NSA-യുടെ നിരീക്ഷണ പ്രവർത്തനങ്ങൾക്ക് ഉപയോഗിക്കപ്പെട്ടിട്ടുണ്ടാകാം എന്നും പറയുന്നു.ഡാറ്റയുടെ വലിയ വോളൂം ഈ ഹബ്ബുകളിലൂടെ കടന്നുപോകുന്നതിനാൽ, അവ നിരീക്ഷണത്തിനായി പ്രധാന പോയിന്റുകൾ ആകാമെന്ന് റിപ്പോർട്ടുകൾ സൂചിപ്പിക്കുന്നു. എന്നാൽ AT&Tയും NSA-യും ഇക്കാര്യം വ്യക്തമാക്കിയിട്ടില്ല. അതുകൊണ്ട് ഇവയെക്കുറിച്ചുള്ള നിഗമനങ്ങൾ എന്നും രഹസ്യവുമാണ്.
ഈ കെട്ടിടത്തിന് പുറത്ത് ജാലകങ്ങളില്ല, ലൈറ്റുകൾ പോലും കാണില്ല, ആരും അകത്ത് പോകുന്നതോ വരുന്നതോ കാണാൻ കഴിയില്ല, ഒരു സാധാരണ ഓഫീസ് പോലെ തോന്നില്ല അതിനാലാണ് ഈ കെട്ടിടം ആളുകളുടെ മനസിൽ നിന്നും മാഞ്ഞുപോകാത്തത്. ഇതെല്ലാം ചേർന്നപ്പോൾ ഇത് രഹസ്യവും ഭയാനകവുമായ ഒരു കെട്ടിടമെന്ന ഇമേജ് നേടി. ഡിജിറ്റൽ സൗകര്യങ്ങൾ,നിരീക്ഷണ ഭയം, അഭ്യന്തരമായി പ്രവർത്തിക്കുന്ന സാങ്കേതിക സംവിധാനങ്ങൾ എന്നിവയോടുള്ള ഭയവും ആശങ്കയും ഈ കെട്ടിടം ജനങ്ങിൽ കൂടുതൽ വളർത്തുന്നു.
New York’s ‘windowless’ secret tower; people say it’s hiding something
