പട്ന: ബിഹാറിൽ എൻഡിഎ സർക്കാർ രൂപീകരണ ചർച്ചകൾ നിർണായക ഘട്ടത്തിലെത്തി. ദില്ലിയിൽ കേന്ദ്ര ആഭ്യന്തര മന്ത്രി അമിത് ഷായുമായി ജെഡിയു നേതാക്കളായ സഞ്ജയ് ഝായും ലല്ലൻ സിങ്ങും നടത്തിയ കൂടിക്കാഴ്ചയിൽ മന്ത്രിസഭാ പ്രാതിനിധ്യത്തിൽ ഏകദേശ ധാരണയായി. ജെഡിയുവിന് 14 മന്ത്രിസ്ഥാനങ്ങൾ ലഭിക്കുമ്പോൾ ബിജെപിക്ക് ഉപമുഖ്യമന്ത്രി പദം ഉൾപ്പെടെ 16 എണ്ണം നൽകും. ചിരാഗ് പാസ്വാന്റെ എൽജെപിക്ക് മൂന്നും ജീതൻ റാം മാഞ്ചിയുടെയും ഉപേന്ദ്ര കുശ്വാഹയുടെയും പാർട്ടികൾക്ക് ഓരോ മന്ത്രിസ്ഥാനവും അനുവദിക്കും.
നാളെ പട്നയിൽ ചേരുന്ന 202 എൻഡിഎ എംഎൽഎമാരുടെ യോഗത്തിൽ കക്ഷിനേതാവായി നിതീഷ് കുമാറിനെ തിരഞ്ഞെടുക്കും. ഇതോടെ പത്താം തവണ മുഖ്യമന്ത്രിയായി ചരിത്രം സൃഷ്ടിക്കാനുള്ള നിതീഷിന്റെ ഒരുക്കങ്ങൾ പൂർത്തിയാകും. തുടർച്ചയായി അഞ്ച് തവണ മുഖ്യമന്ത്രിപദത്തിലെത്തുന്ന പ്രത്യേകതയും അദ്ദേഹത്തിനുണ്ട്. അധികാര പങ്കാളിത്തത്തിൽ ബിജെപി-ജെഡിയു ചർച്ചകളിൽ ഇതുവരെ ധാരണയായിട്ടില്ല.
സത്യപ്രതിജ്ഞാ ചടങ്ങ് അടുത്ത ബുധനാഴ്ചയോ വ്യാഴാഴ്ചയോ ഗാന്ധി മൈതാനത്ത് നടക്കാനാണ് സാധ്യത. പ്രതിപക്ഷ നേതൃസ്ഥാനം ആർജെഡിക്ക് ലഭിക്കും. 243 അംഗ നിയമസഭയിൽ 10 ശതമാനം സീറ്റ് (24) നേടിയാൽ മാത്രമേ പ്രതിപക്ഷ നേതൃപദവി ലഭിക്കൂ. 25 സീറ്റ് നേടിയ ആർജെഡി മൂലം പ്രതിപക്ഷരഹിത നിയമസഭയെന്ന അവസ്ഥ ഒഴിവായി.
