തിരുവനന്തപുരം: രാഹുൽ മാങ്കൂട്ടത്തിലിനെതിരായ ഗുരുതര ലൈംഗികാതിക്രമ ആരോപണങ്ങളിൽ പാർട്ടി സ്വീകരിച്ച നിലപാടിൽ മാറ്റമില്ലെന്ന് പ്രതിപക്ഷ നേതാവ് വി.ഡി. സതീശൻ ഉറപ്പിച്ചു പറഞ്ഞു. ‘‘പാർട്ടിയുടെ തീരുമാനങ്ങൾ ബോധ്യത്തിൽ നിന്നെടുത്തവയാണ്. കേരളം മുഴുവൻ അറബിക്കടലുപോലെ ഇളകിയാലും ആ തീരുമാനം മാറില്ല’’ എന്ന് അദ്ദേഹം വ്യക്തമാക്കി. എല്ലാ ചോദ്യങ്ങൾക്കും മറുപടി പറയേണ്ടതില്ലെന്നും അത് നേതൃത്വത്തിന്റെ കൂട്ടായ തീരുമാനമാണെന്നും സതീശൻ കൂട്ടിച്ചേർത്തു.
‘‘ആള്‍ക്കൂട്ടം പറഞ്ഞാൽ മാറുന്നതല്ല പാർട്ടി തീരുമാനം. നമ്മൾ തെറ്റ് ചെയ്തുവെന്ന ബോധ്യം വന്നാൽ മാത്രമേ തിരുത്തൽ വരികയുള്ളൂ. രാഷ്ട്രീയത്തിൽ വൈകാരികതയ്ക്ക് സ്ഥാനമില്ല; ബിസിനസ് പോലെയാണ് രാഷ്ട്രീയം – കാൽക്കുലേറ്റഡ് റിസ്ക് മാത്രമേ അവിടെ അനുവദനീയമുള്ളൂ’’ എന്ന് സതീശൻ ആവർത്തിച്ചു. കെപിസിസി പ്രസിഡന്റ് വ്യക്തമാക്കിയ നിലപാടിനപ്പുറം കൂടുതൽ പറയാനില്ലെന്നും അദ്ദേഹം അറിയിച്ചു.
രാഹുൽ മാങ്കൂട്ടത്തിലിനെതിരെ എഫ്ഐആർ പുറത്തുവന്നിട്ടും കോൺഗ്രസ് നേതൃത്വം ഇതുവരെ കർശന നടപടിയെടുക്കാത്തത് വ്യാപക വിമർശനത്തിനിടയാക്കിയ സാഹചര്യത്തിലാണ് പ്രതിപക്ഷ നേതാവിന്റെ ഈ ഉറച്ച പ്രതികരണം. പാർട്ടി അനുശാസനത്തിന് മേൽ വികാരത്തിന് പ്രാധാന്യം നൽകില്ലെന്ന സന്ദേശമാണ് സതീശന്റെ വാക്കുകളിലൂടെ വ്യക്തമാകുന്നത്.
