സിന്ധു നദിയുടെ പോഷക നദിയായ ഝലം നദിയില്‍ മിന്നല്‍ പ്രളയം. ഇതേ തുടര്‍ന്ന് പാക് അധീന കശ്മീര്‍ വെള്ളപ്പൊക്കവും കെടുതിയും. ഇന്ത്യ മുന്നറിയിപ്പില്ലാതെ ഝലം നദിക്ക് കുറുകെ ഉറിയില്‍ നിര്‍മിച്ചിട്ടുള്ള അണക്കെട്ട് തുറന്നുവിട്ടതാണ് മിന്നല്‍ പ്രളയത്തിന് കാരണമെന്നാണ് പാകിസ്താന്‍ ആരോപിക്കുന്നത്.
പാക് അധീന കശ്മീരിലെ ഹട്ടിയന്‍ ബാല ജില്ലയിലാണ് മിന്നല്‍പ്രളയമുണ്ടായത്. നദീതീരത്ത് താമസിക്കുന്നവര്‍ സുരക്ഷിത കേന്ദ്രങ്ങളിലേക്ക് മാറി.
പഹല്‍ഗാം ഭീകരാക്രമണത്തിന് പിന്നാലെ ഇന്ത്യാ- പാക് ബന്ധം ഏറെ വഷളായിരിക്കുന്നതിനിടെയാണ് അണക്കെട്ട് തുറന്നതിന്റെ പേരിലുള്ള തര്‍ക്കവും ഉടലെടുത്തിരിക്കുന്നത്. ഇന്ത്യ മുന്നറിയിപ്പില്ലാതെ അണക്കെട്ട് തുറന്ന് ജലം പുറത്തുവിട്ടത് സിന്ധു നദിജലക്കരാറിന്റെ ലംഘനമാണെന്ന് പാകിസ്താന്‍ ആരോപിച്ചു.
പഹല്‍ഗാം ഭീകരാക്രമണത്തിന് പിന്നാലെ സിന്ധു നദീജല കരാര്‍ ഇന്ത്യ മരവിപ്പിച്ചിരുന്നു. ഇന്ത്യ സാധാരണയില്‍ കൂടുതല്‍ വെള്ളം തുറന്നുവിട്ടതാണ് പ്രളയത്തിന് കാരണമെന്ന് പാക് അധികൃതര്‍ പറയുന്നു. കൊഹാല, ദാല്‍കോട്ട് തുടങ്ങിയ സ്ഥലങ്ങളില്‍ പ്രളയത്തെ തുടര്‍ന്ന് കൃഷിനാശവും കന്നുകാലികളെ നഷ്ടപ്പെട്ടതായും റിപ്പോര്‍ട്ടുകളുണ്ട്.
Pakistan blames India for floods in Pakistan-occupied Kashmir
