ന്യൂയോര്‍ക്ക്: ഐക്യരാഷ്ട്ര സംഘടനയുടെ ജനറല്‍ അസംബ്ലിയിലെ പ്രസംഗത്തില്‍ ഇന്ത്യക്കെതിരെ പ്രകോപനപരമായി സംസാരിച്ച് പാക്കിസ്ഥാന് പ്രധാനമന്ത്രി ഷഹബാസ് ഷെരീഫ്. സിന്ധൂനദീജല കരാര്‍ മരവിപ്പിച്ച ഇന്ത്യയുടെ നടപടിയെ വിമര്‍ശിച്ച് പാക് പ്രധാനമന്ത്രി കരാറിലെ വ്യവസ്ഥകള്‍ ഇന്ത്യ ലംഘിച്ചതായും ആരോപിച്ചു. പാക്കിസ്ഥാനിലെ ജനങ്ങള്‍ക്ക് ജലത്തിലുള്ള അവകാശം സംരക്ഷിക്കും. കരാറിന്റെ ഏതൊരു ലംഘനവും യുദ്ധത്തിന്റെ നടപടിയായി കണക്കാക്കുമെന്നും ഷഹബാസ് ഷരീഫ് പറഞ്ഞു.
സിന്ധു നദീജല കരാര്‍ ഏകപക്ഷീയമായി നിര്‍ത്തിവയ്ക്കാനുള്ള ഇന്ത്യയുടെ ശ്രമം കരാറിലെ വ്യവസ്ഥകളുടെയും രാജ്യാന്തര നിയമങ്ങളുടെയും ലംഘനമാണെന്നുകൂടി ഷഹബാസ് ആരോപിച്ചു.
ഏപ്രില്‍ 22 ന് രാജ്യത്തെ നടുക്കി കശ്മീരിലെ പഹല്‍ഗാമില്‍ നടന്ന ഭീകരാക്രമണത്തില്‍ 26 പേര്‍ കൊല്ലപ്പെട്ടതിനെ തുടര്‍ന്നാണ് ഇന്ത്യ കരാര്‍ താല്‍ക്കാലികമായി നിര്‍ത്തിയത്. സംഭവത്തില്‍ പാക്കിസ്ഥാന്റെ പങ്ക് കണ്ടെത്തിയതിനെ തുടര്‍ന്നായിരുന്നു ഇന്ത്യയുടെ നടപടി.
ഇതിനിടെ, യുഎന്‍ സമ്മേളനത്തിനെത്തിയ ഷഹബാസ് ഷെരീഫും പാക് സൈനിക മേധാവി അസിം മുനീറും യുഎസ് പ്രസിഡന്റ് ഡോണള്‍ഡ് ട്രംപുമായി വൈറ്റ്ഹൗസില്‍ കൂടിക്കാഴ്ച നടത്തിയിരുന്നു. ട്രംപിനെ ‘സമാധാനത്തിന്റെ വക്താവാണ്’ എന്നാണ് പാക്ക് പ്രധാനമന്ത്രി വിശേഷിപ്പിച്ചത്. ഇന്ത്യയും പാക്കിസ്ഥാനും തമ്മിലുണ്ടായ സംഘര്‍ഷം പരിഹരിക്കാന്‍ ട്രംപ് ഇടപെട്ടുവെന്നും ഷരീഫ് പറഞ്ഞിരുന്നു.
