ന്യൂഡൽഹി : ബംഗ്ലാദേശിൽ ഇന്ത്യാ വിരുദ്ധ വികാരം പടർത്തുന്നതിലും അക്രമങ്ങൾക്ക് പ്രേരണനൽകുന്നതിലും പാകിസ്ഥാൻ്റെ ചാരസംഘടനയായ ഐ.എസ്.ഐ (ISI) സജീവമായി ഇടപെടുന്നതായി രഹസ്യാന്വേഷണ റിപ്പോർട്ടുകൾ.
ബംഗ്ലാദേശിലെ പ്രക്ഷോഭങ്ങൾക്കിടെ കൊല്ലപ്പെട്ട വിദ്യാർത്ഥി നേതാവ് ഷെരീഫ് ഉസ്മാൻ ഹാദിയുടെ കൊലപാതകത്തിന് പിന്നിൽ ഇന്ത്യയാണെന്ന തരത്തിലുള്ള വ്യാജ പ്രചാരണങ്ങൾ ഐ.എസ്.ഐ പുറത്തുവിടുന്നതായി റിപ്പോർട്ടുകൾ പറയുന്നു.
2026 ഫെബ്രുവരിയിൽ നടക്കാനിരിക്കുന്ന തിരഞ്ഞെടുപ്പ് അട്ടിമറിക്കാനും ജമാഅത്തെ ഇസ്ലാമി പോലുള്ള തീവ്രവാദ ഗ്രൂപ്പുകളെ അധികാരത്തിൽ എത്തിക്കാനും ഐ.എസ്.ഐ ശ്രമിക്കുന്നതായി ഇന്റലിജൻസ് ഏജൻസികൾ മുന്നറിയിപ്പ് നൽകുന്നു.
മാത്രമല്ല, ഇന്ത്യയെ സൈനിക നടപടിക്ക് പ്രേരിപ്പിക്കുകയും അതുവഴി അന്താരാഷ്ട്ര തലത്തിൽ ഇന്ത്യയെ അക്രമി രാജ്യമായി ചിത്രീകരിക്കാനുമാണ് പാക് ഏജൻസികൾ ലക്ഷ്യമിടുന്നത്. ഇതിനായി സോഷ്യൽ മീഡിയ വഴി വൻതോതിലുള്ള ഇന്ത്യാ വിരുദ്ധ പ്രചാരണങ്ങളും നടത്തുന്നുണ്ട്.
ഇന്ത്യയുമായുള്ള സഹകരണം ഒറ്റിക്കൊടുക്കലാണെന്ന് വിശേഷിപ്പിക്കുന്ന പ്രത്യേക ‘റൂൾ ബുക്ക്’ ബംഗ്ലാദേശിലെ തീവ്രവാദ ഗ്രൂപ്പുകൾക്കിടയിൽ വിതരണം ചെയ്യുന്നതിന് പിന്നിലും ഐ.എസ്.ഐ ആണെന്ന് കരുതപ്പെടുന്നു. കൂടാതെ, ബംഗ്ലാദേശിലെ അസ്ഥിരത മുതലെടുത്ത് ഇന്ത്യയുടെ വടക്കുകിഴക്കൻ സംസ്ഥാനങ്ങളിലേക്ക് തീവ്രവാദികളെ കടത്തിവിടാനും മയക്കുമരുന്ന് മാഫിയകളെ സഹായിക്കാനും പാകിസ്ഥാൻ ശ്രമിക്കുന്നതായും റിപ്പോർട്ടുകളുണ്ട്.
Pakistan’s spy agency ISI involved in stoking anti-India sentiment in Bangladesh, Intelligence report released
