ഇസ്ലാമാബാദ് : തങ്ങള് മുന്നോട്ടുവയ്ക്കുന്ന വ്യവസ്ഥകള് അംഗീകരിക്കുക അല്ലെങ്കില് ഭരണമാറ്റത്തിനുള്ള പ്രചാരണം നേരിടാന് തയാറായിക്കൊള്ളൂ എന്ന് അഫ്ഗാനിസ്ഥാനിലെ താലിബാന് ഭരണകൂടത്തിന് പാക്കിസ്ഥാന് മുന്നറിയിപ്പ് നല്കിയിട്ടുണ്ടെന്ന് ഉന്നതവൃത്തങ്ങള് വ്യക്തമാക്കി. തുര്ക്കിയാണ് പാക്കിസ്ഥാന്റെ സന്ദേശം താലിബാന് കൈമാറിയയത്. വ്യവസ്ഥകള് അംഗീകരിക്കാന് വിസമ്മതിക്കുന്നപക്ഷം ഭരണമാറ്റത്തിനുള്ള പ്രചാരണം നേരിടാന് തയാറായിക്കൊള്ളാനാണ് പാക്കിസ്ഥാന്റെ അന്ത്യശാസനം.
2021 ല് അഫ്ഗാനിസ്ഥാന്റെ ഭരണം താലിബാന് പിടിച്ച ശേഷമാണ് പാക്കിസ്ഥാനുമായുള്ള ബന്ധത്തില് ഉലച്ചിലുണ്ടായത്. അതിര്ത്തിയില് സംഘര്ഷം രൂക്ഷമായതോടെ അഫ്ഗാനിസ്ഥാനില് പാക്കിസ്ഥാന് വ്യോമാക്രമണം നടത്തിയിരുന്നു. അഫ്ഗാന് സേനയും തിരിച്ചടിച്ചു. ഏറ്റുമുട്ടലില് നിരവധി പേര് കൊല്ലപ്പെടുകയും നൂറുകണക്കിന് ആളുകള്ക്ക് പരുക്കേല്ക്കുകയും ചെയ്തു.
അഫ്ഗാനിലെ ഭരണമാറ്റത്തിനു ശേഷമുണ്ടായ ഏറ്റവും രൂക്ഷമായ സംഘര്ഷത്തെ തുടര്ന്ന് തുര്ക്കിയുടെ മധ്യസ്ഥതയില് പാക്കിസ്ഥാനും അഫ്ഗാനിസ്ഥാനും തമ്മില് പല തവണ കൂടിക്കാഴ്ചകള് നടത്തിയിരുന്നു. എന്നാല്, വ്യവസ്ഥകളില് ധാരണയാകാത്തതിനെ തുടര്ന്ന് ചര്ച്ചകള് വഴിമുട്ടുകയായിരുന്നു. ആശങ്കകള് പരിഹരിക്കാന് താലിബാന് വിസമ്മതിക്കുന്നതാണ് പ്രശ്നപരിഹാരത്തിന് തടസമെന്നാണ് പാക്കിസ്ഥാന്റെ ആരോപണം.
തെഹ്രികെ താലിബാന് പാക്കിസ്ഥാനെതിരെ (ടിടിപി) കര്ശന നടപടി സ്വീകരിക്കുകണമെന്നും, തീവ്ര ടിടിപി ഭീകരരെ പാക്കിസ്ഥാന് കൈമാറണമെന്നും, തര്ക്കമുള്ള അതിര്ത്തി മേഖലയായ ഡ്യൂറന്ഡ് രേഖയില് സംഘര്ഷം വ്യാപിപ്പിക്കില്ലെന്ന് ഉറപ്പുനല്കണമെന്നുമുള്ള വ്യവസ്ഥകളാണ് പാക്കിസ്ഥാന് മുന്നോട്ടുവയ്ക്കുന്നത്. അതിര്ത്തി കടന്നുള്ള ഭീകരവാദം തടയാന് ബഫര് സോണ്, വ്യാപാരവും ഉഭയകക്ഷി സഹകരണവും സാധാരണ നിലയിലാക്കുക എന്നീ വ്യവസ്ഥകളുമുണ്ട് പാക്കിസ്ഥാന്റെ പട്ടികയില്.
Pakistan’s ultimatum to the Afghan Taliban.
