ഡൽഹി: പഹൽഗാം ഭീകരക്രമണത്തിന് ശേഷം ഇതാദ്യമായി പ്രധാനമന്ത്രി നരേന്ദ്ര മോദി കശ്മീരിൽ. ലോകത്തിലെ ഏറ്റവും ഉയരം കൂടിയ റെയിൽവേ പാലം രാജ്യത്തിന് സമർപ്പിച്ച പ്രധാനമന്ത്രി, ഭീകരവാദികൾക്ക് ശക്തമായ താക്കീതും നൽകി. 272 കിലോമീറ്റർ ദൈർഘ്യമുള്ള ഊധംപൂർ-ശ്രീനഗർ-ബാരമുള്ള റെയിൽവേ ലിങ്കിന്റെ ഭാഗമായ ചെനാബ് റെയിൽ പാലമാണ് പ്രധാനമന്ത്രി ഇന്ന് തുറന്നുകൊടുത്തത്. ഏപ്രിൽ 22-ന് പഹൽഗാമിലുണ്ടായ ഭീകരാക്രമണത്തിൽ 26 പേർ കൊല്ലപ്പെട്ടതിന് ശേഷം ആദ്യമായി ജമ്മു കാശ്മീരിൽ എത്തിയ പ്രധാനമന്ത്രി, ഭീകരാക്രമണത്തിലൂടെ ഇവിടുത്തെ വിനോദ സഞ്ചാരമേഖല തകർക്കാം എന്ന് ആരും കരുതേണ്ട എന്നും പറഞ്ഞു.
മൂന്ന് പതിറ്റാണ്ടിലേറെയായി നിർമ്മാണത്തിലിരുന്ന ഊധംപൂർ-ശ്രീനഗർ-ബാരമുള്ള റെയിൽവേ ലിങ്ക് ആണ് പ്രധാനമന്ത്രി തുറന്നുകൊടുത്തത്. ചെനാബ് റെയിൽ പാലവും, ഇന്ത്യയിലെ ആദ്യത്തെ കേബിൾ സ്റ്റേഡ് റെയിൽ പാലമായ അഞ്ജി ഖാഡ് പാലവും ഇതിന്റെ ഭാഗമാണ്. ഹിമാലയൻ മേഖലയിലെ തീവ്രമായ ഭൂമിശാസ്ത്രവും അസ്ഥിരമായ സാഹചര്യങ്ങളും കാരണം പൂർത്തീകരിക്കാൻ ഏറെ വെല്ലുവിളികൾ നേരിട്ട എഞ്ചിനീയറിംഗ് വിസ്മയങ്ങളാണ് ഇപ്പോൾ യാഥാർത്ഥ്യമായിരിക്കുന്നത്. രണ്ട് വന്ദേ ഭാരത് എക്സ്പ്രസ് ട്രെയിനുകൾ പ്രധാനമന്ത്രി ബാരമുള്ളയ്ക്കും കത്രയ്ക്കും ഇടയിൽ ഫ്ലാഗ് ഓഫ് ചെയ്തു. ജൂൺ 7 മുതൽ ആഴ്ചയിൽ ആറ് ദിവസവും ഈ സർവീസുകൾ ലഭ്യമാകും.
റിയാസി ജില്ലയിലെ കൗരി, ബക്കൽ എന്നീ വിദൂര ഗ്രാമങ്ങൾക്കിടയിൽ സ്ഥിതി ചെയ്യുന്ന ചെനാബ് പാളം ചെനാബ് നദിക്ക് 359 മീറ്റർ മുകളിലായി, ഈഫൽ ടവറിനേക്കാൾ 35 മീറ്റർ ഉയരത്തിൽ, 1,315 മീറ്റർ നീളത്തിൽ വ്യാപിച്ചുകിടക്കുന്നു. മണിക്കൂറിൽ 260 കിലോമീറ്റർ വരെ വേഗത്തിലുള്ള കാറ്റിനെയും ഭൂകമ്പ പ്രവർത്തനങ്ങളെയും അതിജീവിക്കാൻ രൂപകൽപ്പന ചെയ്തിട്ടുള്ള ഈ പാലത്തിന് 120 വർഷത്തെ ആയുസ്സും 1,486 കോടി രൂപ ചെലവും പ്രതീക്ഷിക്കുന്നു.
ഊധംപൂർ-ശ്രീനഗർ-ബാരമുള്ള റെയിൽവേ ലിങ്ക് പദ്ധതി 1994-ൽ അന്നത്തെ പ്രധാനമന്ത്രി പി.വി. നരസിംഹറാവുവിന്റെ കാലത്താണ് ആദ്യമായി അംഗീകരിച്ചത്. 2002-ൽ അടൽ ബിഹാരി വാജ്‌പേയി സർക്കാരിന്റെ കീഴിലാണ് യഥാർത്ഥ നിർമ്മാണം ആരംഭിച്ചത്. അന്ന് ഭൂമി ഏറ്റെടുക്കുന്നതിനായി പ്രാഥമിക ഫണ്ടുകൾ അനുവദിച്ചിരുന്നു. പദ്ധതിയുടെ പുരോഗതിക്ക് പലപ്പോഴും തടസ്സങ്ങൾ നേരിട്ടു. ആകെ 272 കിലോമീറ്ററിൽ 209 കിലോമീറ്ററും നാല് ഘട്ടങ്ങളിലായാണ് കമ്മീഷൻ ചെയ്തത്. സംഗൽദാൻ മുതൽ റിയാസി വരെയുള്ള അവസാനത്തെ നിർണ്ണായകമായ 46 കിലോമീറ്റർ ദൂരം 2024 ഡിസംബറിൽ പൂർത്തിയാക്കി. ഇതിൽ വിപുലമായ തുരങ്ക നിർമ്മാണവും പാലം നിർമ്മാണവും ഉൾപ്പെടുന്നു.
