കേരള സർവകലാശാലയിലെ പിഎച്ച്ഡി വിവാദത്തിൽ ജാതി അധിക്ഷേപം നേരിടുന്ന ഡീൻ ഡോക്ടർ സി എൻ വിജയകുമാരിയെ കോർട്ടിലേക്ക് നാമനിർദേശം ചെയ്ത് രാഷ്ട്രപതി. പോണ്ടിച്ചേരി കേന്ദ്ര സർവകലാശാലയിലെ പരമോന്നത സമിതിയായ കോർട്ടിലേക്കാണ് ഡോക്ടർ സി എൻ വിജയകുമാരിയെ രാഷ്ട്രപതി നാമനിർദേശം ചെയ്തത്. സെനറ്റിന് സമാനമായ പദവിയാണ് കോർട്ട്.
മൂന്ന് വർഷത്തേയ്ക്കാണ് നാമ നിർദ്ദേശം ചെയ്തത്. ഈ കോർട്ടിലേക്ക് രാഷ്ട്രപതിക്ക് 10 പേരെ നാമനിർദേശം ചെയ്യാം. അതേസമയം, കേരള സർവകലാശാലയിലെ സെനറ്റ് അംഗം കൂടിയായ വിജയകുമാരി കേരള സർവകലാശാലയിലെ ഡീൻ പദവിയിലും തുടരും. ഗവേഷക വിദ്യാർഥിയെ ജാതീയമായി അധിക്ഷേപിച്ചെന്ന കേസിൽ വിജയകുമാരിയുടെ അറസ്റ്റ് ഹൈക്കോടതി തടഞ്ഞെങ്കിലും മുൻകൂർ ജാമ്യാപേക്ഷ സംബന്ധിച്ച തീരുമാനം ആയിട്ടില്ല.
കാര്യവട്ടം ക്യാമ്പസിലെ പി എച്ച് ഡി വിദ്യാർഥി വിപിൻ വിജയനെതിരെയാണ് വകുപ്പ് മേധാവി ജാതി അധിക്ഷേപം നടത്തിയത്. സംഭവത്തിൽ വിജയകുമാരിക്കെതിരെ പ്രതിഷേധവും തുടരുകയാണ് ഇതിനിടെയാണ് രാഷ്ട്രപതി പോണ്ടിച്ചേരി കേന്ദ്ര സർവകലാശാലയിലേക്ക് സിഎൻ വിജയകുമാരിയെ നാമനിർദേശം ചെയ്തത്.
President nominates Dean C.N. Vijayakumari, who is facing caste-based harassment, to new position at Pondicherry Central University
