
ദില്ലി: ജപ്പാൻ സന്ദർശനം പൂർത്തിയാക്കി പ്രധാനമന്ത്രി നരേന്ദ്ര മോദി എസ്സിഒ ഉച്ചകോടിയിൽ പങ്കെടുക്കാൻ ചൈനയിലേക്ക് യാത്ര തിരിച്ചു. ഏഴ് വർഷത്തിന് ശേഷമുള്ള മോദിയുടെ ചൈന സന്ദർശനത്തെ യുഎസ് അടക്കം മറ്റു ലോകരാജ്യങ്ങൾ ഉറ്റുനോക്കുകയാണ്. രണ്ട് ദിവസത്തെ പ്രധാനമന്ത്രിയുടെ ജപ്പാൻ സന്ദർശനത്തിൽ ഇന്ത്യയും ജപ്പാനും 13 സുപ്രധാന കരാറുകളിൽ ഒപ്പുവെച്ചു.
ജാപ്പനീസ് പ്രധാനമന്ത്രി ഷിഗെരു ഇഷിബയ്ക്കും സർക്കാരിനും ജനത്തിനും നന്ദി പറഞ്ഞ പ്രധാനമന്ത്രി ഉഭയകക്ഷി ബന്ധം കൂടുതൽ ശക്തിപ്പെടുത്താനുള്ള ഉൽപ്പാദനക്ഷമമായ പ്രവർത്തനങ്ങൾക്ക് സന്ദർശനം ഫലം ചെയ്തുവെന്ന് അറിയിച്ചു. 10 ട്രില്യൺ യെൻ (ഏകദേശം 60,000 കോടി രൂപ) നിക്ഷേപം പത്ത് വർഷത്തിനുള്ളിൽ ഇന്ത്യയിൽ നടത്താൻ ലക്ഷ്യമിടുന്ന ജപ്പാനുമായി സെമികണ്ടക്ടറുകൾ, ക്ലീൻ എനർജി, ടെലികോം, ഫാർമസ്യൂട്ടിക്കൽസ്, ധാതു ഖനനം, സാങ്കേതികവിദ്യ എന്നീ മേഖലകളിൽ കരാറുകൾ ഒപ്പുവച്ചു.
ഇരു രാജ്യങ്ങളുടെയും ബഹിരാകാശ ഏജൻസികൾ ചേർന്ന് ചന്ദ്രന്റെ ധ്രുവ മേഖലയിൽ നടത്തുന്ന സംയുക്ത പര്യവേക്ഷണമായ ചന്ദ്രയാൻ -5 ദൗത്യത്തിനായുള്ള കരാറിലും ഒപ്പുവച്ചു. ആഗോള തലത്തിൽ നയതന്ത്ര ബന്ധം ശക്തിപ്പെടുത്തുന്ന ഇരു രാജ്യങ്ങളും പ്രതിരോധ രംഗത്ത് സഹകരണവും സാമ്പത്തിക പങ്കാളിത്തവും വർധിപ്പിക്കുന്നതിനുള്ള പ്രഖ്യാപനങ്ങളും ഇതിൻ്റെ ഭാഗമായി നടത്തും.
ജപ്പാനിൽ നിന്ന് ചൈനയിലേക്ക് പോയ പ്രധാനമന്ത്രി നരേന്ദ്ര മോദി ചൈനീസ് പ്രസിഡൻ്റ് ഷീ ജിൻപിങുമായടക്കം ചർച്ച നടത്തുമെന്നാണ് റിപ്പോർട്ടുകൾ. ചൈനയിൽ നാളെയും മറ്റന്നാളുമായി ടിയാൻജിനിൽ നടക്കുന്ന ഷാങ്ഹായ് സഹകരണ സംഘടനയുടെ (എസ്സിഒ) വാർഷിക ഉച്ചകോടിയിൽ പ്രധാനമന്ത്രി മോദി പങ്കെടുക്കും.