തിരുവനന്തപുരം : സംസ്ഥാനത്ത് 22 മുതല് സ്വകാര്യബസ് പണിമുടക്ക്. അനിശ്ചിതകാലത്തേക്കാണ് പണിമുടക്കുള്ളത്. സര്വിസ് നിര്ത്തിവയ്ക്കുമെന്ന് ബസ് ഓപ്പറേറ്റഴ്സ് അസോസിയേഷന്സ് കോഓര്ഡിനേഷന് കമ്മിറ്റി അറിയിച്ചു. എന്നാല് ബസ് ഓപറേറ്റേഴ്സ് ഫോറം പണിമുടക്കില് പങ്കെടുക്കില്ല.
ഗതാഗത മന്ത്രി കെ ബി ഗണേഷ് കുമാറുമായി സംഘടനകള് നടത്തിയ ചര്ച്ചയെ തുടര്ന്നാണ് ബസ് ഓപറേറ്റേഴ്സ് ഫോറം പണിമുടക്കില് നിന്നും പിന്മാറിയത്. എന്നാല്, മറ്റ് സംഘടനകള് പണിമുടക്കുമായി മുന്നോട്ട് പോകാന് തീരുമാനിക്കുകയും ചെയ്തു.
ആവശ്യങ്ങള്
* ദീര്ഘദൂര ലിമിറ്റഡ് സ്റ്റോപ്പ് അടക്കമുള്ള മുഴുവന് പെര്മിറ്റുകളും അതേപടി പുതുക്കുക
* വിദ്യാര്ഥികളുടെ യാത്രാനിരക്ക് ഉയര്ത്തുക
* ഇ ചലാന് വഴി പൊലിസ് അനാവശ്യമായി പിഴയിടാക്കി ബസ്സുടമകളെ ദ്രോഹിക്കുന്ന നടപടി അവസാനിപ്പിക്കുക… ഇവ അടക്കമുള്ള ആവശ്യങ്ങളാണ് സമരക്കാര് ഉന്നയിക്കുന്നതെന്ന് കോഓര്ഡിനേഷന് കമ്മിറ്റി ജനറല് കണ്വീനര് രാജ് കുമാര് കരുവാരത്ത്, കണ്വീനര്മാരായ പികെ പവിത്രന്, കെ വിജയന് എന്നിവര് വ്യക്തമാക്കി.
