വാഷിങ്ടന്‍ : വാഷിങ്ടനില്‍ നടന്ന ക്വാഡ് വിദേശകാര്യമന്ത്രിമാരുടെ യോഗത്തില്‍ 26 സാധാരണക്കാര്‍ കൊല്ലപ്പെട്ട പഹല്‍ഗാം ഭീകരാക്രമണത്തെ അപലപിച്ചു. ഭീകരാക്രമണത്തിനു പിന്നില്‍ പ്രവര്‍ത്തിച്ച കുറ്റവാളികളെയും കൃത്യത്തിന് ധനസഹായം നല്‍കിയവരെയും നിയമത്തിനു മുന്നില്‍ കൊണ്ടുവരണമെന്നും ക്വാഡ് യോഗം ആവശ്യപ്പെട്ടു.
ഭീകരതയെ പ്രതിരോധിക്കാന്‍ ഇന്ത്യയ്ക്ക് അവകാശമുണ്ടെന്ന് ക്വാഡ് യോഗത്തില്‍ പങ്കെടുത്ത വിദേശകാര്യ മന്ത്രി എസ്. ജയശങ്കര്‍ പറഞ്ഞു. ”നമ്മുടെ സമീപകാല അനുഭവങ്ങളുടെ വെളിച്ചത്തില്‍ ഭീകരവാദത്തെക്കുറിച്ച് ഒരു വാക്ക്. ലോകം ഒരിക്കലും ഇവരോട് സഹിഷ്ണുത കാണിക്കരുത്. ഇരകളെയും കുറ്റവാളികളെയും ഒരിക്കലും തുല്യരായി കാണുകയും ചെയ്യരുത്. ഭീകരതയയെ പ്രതിരോധിക്കാന്‍ ഇന്ത്യയ്ക്ക് എല്ലാ അവകാശവുമുണ്ട്. ഞങ്ങള്‍ ആ അവകാശം വിനിയോഗിക്കും.” – ജയശങ്കറിന്റെ വാക്കുകള്‍.
ഇന്ത്യയ്ക്ക് പുറമെ യുഎസ്, ജപ്പാന്‍, ഓസ്‌ട്രേലിയ രാജ്യങ്ങളാണ് ക്വാഡില്‍ ഉള്ളത്. അടുത്ത ക്വാഡ് ഉച്ചക്കോടിക്ക് ആതിഥ്യം വഹിക്കാമെന്ന് ഇന്ത്യ സന്നദ്ധത അറിയിച്ചിട്ടുണ്ട്. യുഎസ് സ്റ്റേറ്റ് സെക്രട്ടറി മാര്‍ക്കോ റൂബിയോ, ജപ്പാന്‍ വിദേശകാര്യ മന്ത്രി തകേഷി ഇവായ, ഓസ്ട്രേലിയന്‍ വിദേശകാര്യ മന്ത്രി പെന്നി വോങ് എന്നിവര്‍ യോഗത്തില്‍ പങ്കെടുത്തു.
