തിരുവനന്തപുരം: രാഹുൽ മാങ്കൂട്ടത്തിലിനെതിരെ ലൈംഗികാതിക്രമ പരാതി നൽകിയ യുവതിയെ സമൂഹമാധ്യമങ്ങളിലൂടെ അപമാനിച്ച കേസിൽ പ്രഭാഷകൻ രാഹുൽ ഈശ്വറിനെ സൈബർ പൊലീസ് അറസ്റ്റ് ചെയ്തു. വൈകിട്ട് വീട്ടിലെത്തി ചോദ്യം ചെയ്യലിന് ശേഷം കസ്റ്റഡിയിൽ എടുത്ത് എ ആർ ക്യാമ്പിലെ സൈബർ സ്റ്റേഷനിൽ വച്ച് അറസ്റ്റ് രേഖപ്പെടുത്തി. ജാമ്യമില്ലാ വകുപ്പുകൾ പ്രകാരമാണ് കേസെടുത്തത്.നാളെ കോടതിയിൽ ഹാജരാക്കും. മൊബൈൽ ഫോണും ലാപ്‌ടോപ്പുമടക്കം പൊലീസ് അറസ്റ്റ് രേഖപ്പെടുത്തിയത്.
സൈബർ പൊലീസ് സ്റ്റേഷനിലേക്ക് കൊണ്ടുപോകുമ്പോൾ പൊലീസ് വാഹനത്തിൽ ചിരിച്ചും മാധ്യമങ്ങളുടെ ക്യാമറകൾക്ക് മുന്നിൽ കൈവീശിയുമാണ്‌ യാത്ര ചെയ്തത്. ഇന്ന് രാഹുൽ ഈശ്വറിനെ വിട്ടയക്കില്ല. നാളെ രാവിലെ മജിസ്‌ട്രേറ്റിന് മുന്നിൽ ഹാജരാക്കും.
അതിജീവിതയെ തിരിച്ചറിയുന്ന തരത്തിൽ വിവരങ്ങൾ പങ്കുവച്ചതും അപമാനിച്ചതുമാണ് കേസിനാധാരം. കഴിഞ്ഞ ദിവസം ഒരു ചാനൽ ചർച്ചയിൽ “വേണമെങ്കിൽ പൊലീസ് അറസ്റ്റ് ചെയ്തോട്ടെ, ഞാൻ പറയാനുള്ളതെല്ലാം പറയും” എന്ന് രാഹുൽ വെല്ലുവിളിച്ചിരുന്നു. ആ പ്രസ്താവനയ്ക്കു പിന്നാലെ തന്നെ പരാതിക്കാരിയുടെ വ്യക്തിവിവരങ്ങൾ വെളിപ്പെടുത്തുന്ന രീതിയിൽ സംസാരിച്ചതാണ് വിനയായത്.
യുവതി നേരത്തേ തന്നെ സമൂഹമാധ്യമങ്ങളിലൂടെ തനിക്കെതിരെ നടക്കുന്ന സൈബർ ആക്രമണത്തിൽ പരാതി നൽകിയിരുന്നു. അതിന്റെ തുടർച്ചയായാണ് രാഹുൽ ഈശ്വറിനെതിരെയുള്ള നടപടി. ഇതേ കേസിൽ പത്തനംതിട്ട മഹിളാ കോൺഗ്രസ് ജില്ലാ ജനറൽ സെക്രട്ടറി രഞ്ജിത പുളിക്കൻ, കെപിസിസി ജനറൽ സെക്രട്ടറി സന്ദീപ് വാര്യർ, ദീപാ ജോസഫ് എന്നിവരും പ്രതിചേരുന്നുണ്ട്. കേസ് അന്വേഷണം വേഗത്തിലാക്കാനുള്ള നിർദേശം സൈബർ സെൽ ലഭിച്ചിട്ടുണ്ട്.
അതേസമയം, രാഹുൽ മാങ്കൂട്ടത്തിൽ ഇപ്പോഴും ഒളിവിലാണ്. ജാമ്യമില്ലാ വകുപ്പുകൾ ചുമത്തിയ കേസിൽ ഇന്നലെ അദ്ദേഹത്തിന്റെ ഫ്ലാറ്റിൽ പൊലീസ് പരിശോധന നടത്തി. തിരുവനന്തപുരത്തെത്തി അഭിഭാഷകനെ കണ്ട ശേഷം മടങ്ങിയെന്നാണ് സൂചന. മുൻകൂർ ജാമ്യാപേക്ഷ ബുധനാഴ്ച കോടതി പരിഗണിക്കും.
