തിരുവനന്തപുരം: രാഹുൽ മാങ്കൂട്ടത്തിലിനെതിരായ ലൈംഗികാതിക്രമ പരാതിക്കാരിയെ സോഷ്യൽ മീഡിയയിൽ അപമാനിച്ചതിനും ഐഡന്റിറ്റി വെളിപ്പെടുത്തിയതിനും അഞ്ചു പേർക്കെതിരെ പൊലീസ് കേസെടുത്തു. പത്തനംതിട്ട മഹിളാ കോൺഗ്രസ് ജില്ലാ ജനറൽ സെക്രട്ടറി രഞ്ജിത പുളിക്കൻ ഒന്നാം പ്രതി, കെപിസിസി ജനറൽ സെക്രട്ടറി സന്ദീപ് വാര്യർ (നാലാം പ്രതി), രാഹുൽ ഈശ്വർ (അഞ്ചാം പ്രതി), ദീപാ ജോസഫ് (രണ്ടും മൂന്നും പ്രതി) എന്നിവരാണ് കേസിലുള്ളത്. ഐടി ആക്ട് 43, 66, ബിഎൻഎസ് 72, 79 വകുപ്പുകൾ പ്രകാരമാണ് കേസ്. രാഹുൽ ഈശ്വർ നിലവിൽ എആർ ക്യാമ്പിൽ പൊലീസ് കസ്റ്റഡിയിലാണ്.
അതിജീവിതയുടെ സ്വകാര്യത ലംഘിച്ചും പേരും ഫോട്ടോയും പങ്കുവച്ചും സമൂഹമാധ്യമങ്ങളിൽ അപമാനിച്ചുവെന്നാണ് പരാതി. പരാതിക്കാരിയുടെ വിവാഹചടങ്ങിലെ ചിത്രങ്ങൾ ഉപയോഗിച്ച് പോസ്റ്റിട്ടതും കേസിന് കാരണമായി. അതേസമയം, തനിക്കെതിരായ ആരോപണം പൂർണമായും നിഷേധിച്ച് സന്ദീപ് വാര്യർ രംഗത്തെത്തി. ‘‘ഞാൻ ഒരിടത്തും പരാതിക്കാരിയെ തിരിച്ചറിയുന്ന തരത്തിൽ പരാമർശിച്ചിട്ടില്ല. വിവാഹഫോട്ടോ ഡിലീറ്റ് ചെയ്ത ശേഷമാണ് പോസ്റ്റിട്ടത്; ടൈമിംഗ് സാങ്കേതിക വിദഗ്ധർക്ക് പരിശോധിക്കാം’’ എന്ന് അദ്ദേഹം ഫേസ്ബുക്കിൽ കുറിച്ചു.
അതിജീവിതയുടെ ഐഡന്റിറ്റി ആദ്യം വെളിപ്പെടുത്തിയത് ഡിവൈഎഫ്ഐ ആണെന്നും സന്ദീപ് വാര്യർ ആരോപിച്ചു. ‘‘ഡിവൈഎഫ്ഐ ബ്ലോക്ക് പ്രസിഡന്റ് ഇരയെ വിവാഹം ചെയ്തു കൊണ്ടുവന്ന വീടിന് മുന്നിൽ മൈക്ക് കെട്ടി പ്രസംഗിച്ച വീഡിയോയുണ്ട്. ഒക്ടോബർ മാസത്തിൽ തന്നെ ഇരയുടെ ഭർത്താവിന്റെ രാഷ്ട്രീയം ചൂണ്ടിക്കാട്ടി അപമാനിച്ച പോസ്റ്റുകളും ഉണ്ട്’’ എന്ന് അദ്ദേഹം പറഞ്ഞു. ഇരയുടെ സ്വകാര്യത സംരക്ഷിക്കാനാണ് ബ്ലോക്കിന്റെയും നേതാവിന്റെയും പേര് വെളിപ്പെടുത്താത്തതെന്നും വാര്യർ വ്യക്തമാക്കി.
കേസ് രജിസ്റ്റർ ചെയ്തതോടെ കോൺഗ്രസിനകത്തും പുറത്തും വൻ വിവാദമായി മാറിയിരിക്കുകയാണ്. മഹിളാ കോൺഗ്രസ് നേതാവ് തന്നെ പ്രതിചേരുന്നത് പാർട്ടിക്ക് തിരിച്ചടിയാകുമെന്ന വിലയിരുത്തലും ശക്തമാണ്. അന്വേഷണം വേഗത്തിലാക്കാനുള്ള നിർദേശം പൊലീസിന് ലഭിച്ചിട്ടുണ്ട്.
