ന്യൂഡല്‍ഹി : പഹല്‍ഗാം ഭീരകരാക്രമണത്തിന് ഓപ്പറേഷന്‍ സിന്ദൂറിലൂടെ മറുപടി നല്‍കിയ ഇന്ത്യന്‍ സൈന്യത്തെ വീണ്ടും പുകഴ്ത്തി പ്രതിരോധമന്ത്രി രാജ്‌നാഥ് സിംഗ്. സൈന്യം വൈദഗ്ധമുള്ളൊരു സര്‍ജനെ പോലെ പ്രവര്‍ത്തിച്ചുവെന്നും ഭീകരവാദികളുടെ വേര് നോക്കി ആയുധങ്ങള്‍ പ്രയോഗിച്ചുവെന്നും അദ്ദേഹം പറഞ്ഞു.
ക്ഷേത്രങ്ങളും ഗുരുദ്വാരകളും ലക്ഷ്യമിട്ടുള്ള ആക്രമണങ്ങളും പാകിസ്ഥാന്‍ നടത്തിയെന്നും പാക് സൈനിക കേന്ദ്രങ്ങള്‍ തകര്‍ത്ത് ഇന്ത്യ പാകിസ്ഥാന്‍ സൈന്യത്തെ മുട്ടുകുത്തിച്ചുവെന്നും രാജ്‌നാഥ് സിംഗ് പറഞ്ഞു.
‘സര്‍ജന്‍മാരുടെയും സൈനികരുടെയും അച്ചടക്കവും പരിശീലനവും വളരെ കര്‍ശനമാണ്. വളരെ സൂക്ഷ്മമായ സാഹചര്യങ്ങളില്‍ ഇരുവരും വലിയ തീരുമാനങ്ങള്‍ എടുക്കേണ്ടതുണ്ട്. ഓപ്പറേഷന്‍ സിന്ദൂരില്‍, പാകിസ്ഥാനിലെ ഭീകരതയുടെ കേന്ദ്രങ്ങളെ മാത്രം ആക്രമിക്കാന്‍ പൂര്‍ണ്ണ ശ്രദ്ധ ചെലുത്തി, അവരുടെ പൗരന്മാരെ അതില്‍ നിന്ന് അകറ്റി നിര്‍ത്തി. ഒരു വിദഗ്ധ സര്‍ജനെപ്പോലെയാണ് ഇന്ത്യന്‍ സൈന്യം ഓപ്പറേഷന്‍ നടത്തിയത്. രോഗത്തിന്റെ വേര് ഉള്ളിടത്ത് ഒരു വിദഗ്ധ സര്‍ജന്‍ തന്റെ ഉപകരണങ്ങള്‍ ഉപയോഗിക്കുന്നതുപോലെ, ഇന്ത്യന്‍ സൈന്യവും തീവ്രവാദത്തിന്റെ വേരുകളില്‍ വളരെ കൃത്യതയോടെ അവരുടെ ആയുധങ്ങള്‍ ഉപയോഗിച്ചിട്ടുണ്ട്” സിംഗ് പറഞ്ഞു. ലഖ്നൗവിലെ കെ.എന്‍. സിംഗ് മെമ്മോറിയല്‍ ആശുപത്രിയുടെ രജത ജൂബിലി ചടങ്ങില്‍ സംസാരിക്കുകയായിരുന്നു അദ്ദേഹം.
