ന്യൂഡൽഹി : രണ്ട് വിവാഹ ബന്ധങ്ങളും പരാജയപ്പെട്ടതോടെയാണ് ഷഹീൻ സയീദ് എന്ന വനിതാ ഡോക്ടറുടെ ജീവിതത്തിലേക്ക് മറ്റൊരാൾ കടന്നുവരുന്നത്. പിന്നീടത് പ്രണയമായി വളർന്നു . ഒരുമിച്ച് ജീവിക്കാനുള്ള തീരുമാനത്തിലേക്ക് എത്തി. അങ്ങനെ വിവാഹവും കഴിഞ്ഞു. പക്ഷേ പിന്നീടങ്ങോട്ട് കുറേയെറെ മാറ്റങ്ങളിലൂടെയായിരുന്നു ഡോക്ടർ ഷഹീൻ സയീദ് കടന്നുപോയത്. ഇപ്പോൾ ഇവരുടെ പേര് ഡൽഹി സ്ഫോടനവുമായി ചേർത്തുവായിക്കുമ്പോൾ പതിയെ തെളിയുന്ന ഒരു ജീവിത കഥയുണ്ട്.
ഡൽഹി സ്ഫോടനവുമായി ബന്ധമുള്ള ഡോക്ടർമാരായ ഷഹീൻ സയീദും മുസമ്മിൽ ഷക്കീലും 2023 സെപ്റ്റംബറിലാണ് വിവാഹിതരായത്. ഈ ബന്ധമാണ് ഷഹീന് ഭീകരതയുടെ ലോകം പരിചയപ്പെടുത്തിയതും അവരെ ആ പാതയിലേക്ക് നയിച്ചതും എന്ന് സ്രോതസ്സുകൾ പറയുന്നു.
ഷഹിൻ്റെ ജീവിതം ലഖ്‌നൗ മുതൽ ഡൽഹി വരെ
ലഖ്‌നൗവിലെ ഡാലിഗഞ്ച് പ്രദേശത്ത് വളർന്ന ഷഹീൻ ഒരു മിടുക്കിയായ വിദ്യാർത്ഥിനിയായിരുന്നു. അലഹബാദിൽ നിന്ന് മെഡിസിൻ ബിരുദവും സർജറി ബിരുദവും (എംബിബിഎസ്) നേടി, തുടർന്ന് ഫാർമക്കോളജിയിൽ വൈദഗ്ദ്ധ്യം നേടി. ഷഹീൻ്റെ പിതാവ് സയീദ് അഹമ്മദ് അൻസാരി ഒരു സർക്കാർ ജീവനക്കാരനായിരുന്നു, കുടുംബം മറ്റുള്ളവരോട് എളിമയും സ്നേഹവും കാട്ടിയിരുന്നു. വിദ്യാഭ്യാസമുള്ള, സാമൂഹികമായി ബഹുമാനിക്കപ്പെടുന്ന ഒരാളായിരുന്നു ഷഹീൻ്റെ പിതാവ്.
ആദ്യ വിവാഹവും 10 വർഷത്തെ ദാമ്പത്യവും
2003-ലാണ് ഷഹീൻ്റെ ആദ്യ വിവാഹം നടന്നത്. നേത്രരോഗവിദഗ്ദ്ധനായ ഡോ. സഫർ ഹയാത്തിനെയായിരുന്നു അവർ വിവാഹം കഴിച്ചത്. ദമ്പതികൾക്ക് രണ്ട് കുട്ടികളുണ്ടായിരുന്നു. എന്നാൽ ആ ബന്ധം അധികനാൾ നീണ്ടുനിന്നില്ല. 2012 ൽ ഇരുവരും വിവാഹ മോചിതരായി. തങ്ങളുടെ വിവാഹ മോചനത്തിൻ്റെ യഥാർത്ഥകാരണം എന്താണെന്ന് ഇപ്പോഴും വ്യക്തമല്ലെന്നാണ് ഡോ. സഫർ ഹയാത്ത് എൻഡിടിവിക്ക് നൽകിയ അഭിമുഖത്തിൽ പറഞ്ഞിരുന്നു.
“ഞങ്ങൾ 2003 നവംബറിൽ വിവാഹിതരായി, ഇരുവരും വെവ്വേറെ മെഡിക്കൽ പഠനം നടത്തി, ഞാൻ അവരുടെ സീനിയറായിരുന്നു. 2012 അവസാനത്തോടെയാണ് ഞങ്ങളുടെ വിവാഹമോചനം നടന്നത്. അതിലേക്ക് നയിക്കാൻ മാത്രം എന്താണെന്ന് അവളുടെ മനസ്സിലുണ്ടായിരുന്നതെന്ന് എനിക്കറിയില്ല. ഞങ്ങൾക്കിടയിൽ ഒരിക്കലും ഒരു തർക്കമോ വഴക്കോ ഉണ്ടായിരുന്നില്ല. അവർ സ്നേഹവും കരുതലും ഉള്ള വ്യക്തിയായിരുന്നു. അവർക്ക് ഭീകര പ്രവർത്തനങ്ങളിൽ ഏർപ്പെടാൻ കഴിയുമെന്ന് എനിക്ക് ഒരിക്കലും ഒരു സൂചനയും ഉണ്ടായിരുന്നില്ല. അവർ കുടുംബത്തോടും കുട്ടികളോടും ആഴമായ അടുപ്പം പുലർത്തിയിരുന്നു, അവരെ വളരെയധികം സ്നേഹിച്ചിരുന്നു, അവരുടെ പഠനവും ശ്രദ്ധിച്ചിരുന്നു.”- ഒരുമിച്ചുള്ള വർഷങ്ങൾ ഓർത്തുകൊണ്ട്, ഡോ. സഫർ ഹയാത്ത് എൻഡിടിവിക്ക് നൽകിയ അഭിമുഖത്തിൽ പറഞ്ഞു. പ്രൊഫഷണൽ സമ്മർദ്ദം, കരിയർ, വിദേശത്തേക്ക് പോകാനുള്ള സയീദിന്റെ ആഗ്രഹം എന്നിവയാണ് വിവാഹമോചനത്തിനുള്ള കാരണങ്ങളായി ചൂണ്ടിക്കാണിക്കപ്പെടുന്നത്.
“മികച്ച ശമ്പളത്തിനും ജീവിത നിലവാരത്തിനും വേണ്ടി ഓസ്‌ട്രേലിയയിലോ യൂറോപ്പിലോ സ്ഥിരതാമസമാക്കാൻ അവൾ ഒരിക്കൽ നിർദ്ദേശിച്ചു. പക്ഷേ, ഞങ്ങൾ ഇവിടെ നല്ല ജീവിതം നയിക്കുന്നുവെന്നും നല്ല ജോലിയാണെന്നും കുട്ടികളും മികച്ച രീതിയിൽ മുന്നോട്ടുപോകുന്നുവെന്നും ഞാൻ അവളോട് പറഞ്ഞു. ഞങ്ങൾ അവിടെ ഒറ്റപ്പെടുമെന്ന് ഞാൻ അവളോട് പറഞ്ഞു,” ഡോ. ഹയാത്ത് ഓർമ്മിച്ചു.
ഷഹീൻ്റെ രണ്ടാം വിവാഹം
ആദ്യ വിവാഹമോചനം സയീദിന് ഒരു വലിയ തിരിച്ചടിയായിരുന്നുവെന്ന് റിപ്പോർട്ടുണ്ട്. അവർ വളരെ ഏകാന്തതയിലൂടെ കടന്നുപോയിരുന്നു. ആ സമയത്ത് അവർ പഠിപ്പിച്ചിരുന്ന ഗണേഷ് ശങ്കർ വിദ്യാർത്ഥി മെമ്മോറിയൽ (ജിഎസ്വിഎം) മെഡിക്കൽ കോളേജിൽ നിന്ന് പെട്ടെന്ന് ജോലി വിട്ടു. പിന്നീട് ഗാസിയാബാദിൽ ഒരു ടെക്സ്റ്റൈൽ ബിസിനസ്സ് നടത്തിയിരുന്ന ഒരാളെ അവർ വീണ്ടും വിവാഹം കഴിച്ചു. എന്നാൽ ഈ വിവാഹവും അധികകാലം നീണ്ടുനിന്നില്ല.
മുസമ്മിൽ സയീദിന്റെ ജീവിതത്തിലേക്ക്
ഹരിയാനയിലെ ഫരീദാബാദിലെ അൽ-ഫലാഹ് സർവകലാശാലയിൽവെച്ചാണ് ജൂനിയറായ കശ്മീരി ഡോക്ടറായ മുസമ്മിൽ ഷക്കീലിനെ ഷഹീൻ സയീദ് കണ്ടുമുട്ടിയത്. പിന്നീട് ഇദ്ദേഹം ഷഹീൻ്റെ ഡോക്ടറുടെ ജീവിതത്തിലേക്ക് പ്രവേശിച്ചു. ദിവസേനയുള്ള കൂടിക്കാഴ്ചകൾ, കോളേജിൽ ഒരുമിച്ച് ജോലി ചെയ്യൽ, എന്നിവയെല്ലാമായിരുന്നു ഇവരുടെ ബന്ധം ശക്തിപ്പെടുത്തിയത്. ഡൽഹി സ്ഫോടനവുമായി ബന്ധപ്പെട്ട് അറസ്റ്റിലായ ഇരുവരും ചോദ്യം ചെയ്യലിൽ, 2023 സെപ്റ്റംബറിൽ അൽ-ഫലാഹ് സർവകലാശാലയ്ക്ക് സമീപമുള്ള ഒരു പള്ളിയിൽ വച്ച് തങ്ങൾ വിവാഹിതരായെന്ന് സമ്മതിച്ചു. വരൻ വധുവിന് ഏകദേശം 6,000 രൂപ മഹർ (ഇസ്ലാമിക വിവാഹത്തിൽ വരനിൽ നിന്ന് വധുവിന് നൽകുന്ന നിർബന്ധിത സമ്മാനം) നൽകിയെന്നും റിപ്പോർട്ടുണ്ട്. തുടർന്ന് ഇരുവരും ദമ്പതികളായി ജീവിക്കാൻ തുടങ്ങി, ഈ സമയത്താണ് ഷഹീൻ സയീദ് വിദ്യാർത്ഥി ഗ്രൂപ്പുകളുമായി പരിചയപ്പെടുകയും മതപരമായ പ്രവർത്തനങ്ങളിൽ പങ്കെടുക്കാൻ തുടങ്ങുകയും ചെയ്തത്. ഈ കൂടിക്കാഴ്ചകളിൽ, ജയ്‌ഷെ-ഇ-മുഹമ്മദിന്റെ (ജെ.ഇ.എം) വനിതാ വിഭാഗമായ ജമാഅത്ത് ഉൽ-മോമിനാത്തിലെ അംഗങ്ങൾ അവരെ സമീപിച്ചെന്ന് അന്വേഷണ ഏജൻസികൾ പറയുന്നു. അവർ സയീദിനെ തീവ്രവാദത്തിനായി പരിശീലിപ്പിക്കാൻ തുടങ്ങി.
Shaheen Saeed’s third marriage changed her life; Muzammil Shakeel led her to terrorism
