ബംഗ്ലദേശിൽ സർക്കാർ വിരുദ്ധ പ്രക്ഷോഭം അടിച്ചമർത്തിയതിന് മുൻ പ്രധാനമന്ത്രി ഷെയ്ഖ് ഹസീനയ്ക്ക് വധശിക്ഷ വിധിച്ച് ഇന്റർനാഷണൽ ക്രൈംസ് ട്രിബ്യൂണൽ (ഐസിടി-ബിഡി). കൂട്ടക്കൊല, മനുഷ്യത്വത്തിനെതിരായ കുറ്റകൃത്യങ്ങൾ, പീഡനം തുടങ്ങിയ അഞ്ച് ഗുരുതര കുറ്റങ്ങൾ ചുമത്തിയാണ് വിചാരണ പൂർത്തിയായത്. ഹസീനയുടെ അഭാവത്തിലും കോടതി ശിക്ഷ വിധിക്കുകയായിരുന്നു.
പ്രക്ഷോഭകർക്കെതിരെ മാരകായുധങ്ങൾ ഉപയോഗിക്കാൻ നേരിട്ട് ഉത്തരവിട്ടെന്നും വിദ്യാർഥികൾക്ക് നേരെയുള്ള വെടിവയ്പ്പിനെക്കുറിച്ച് പൂർണ അറിവുണ്ടായിരുന്നെന്നും ട്രിബ്യൂണൽ കണ്ടെത്തി. ഹെലികോപ്റ്റർ ഉപയോഗിച്ച് ആക്രമണം നടത്താൻ ഹസീന തന്നെ നിർദേശം നൽകിയതായി തെളിവുണ്ടെന്ന് കോടതി ചൂണ്ടിക്കാട്ടി. പൊലീസ് വെടിവയ്പിൽ കൊല്ലപ്പെട്ട വിദ്യാർഥി അബു സയ്യിദിന്റെ പോസ്റ്റ്മോർട്ടം റിപ്പോർട്ട് ഡോക്ടർമാരെ ഭീഷണിപ്പെടുത്തി തിരുത്തിയതിനും തെളിവ് ലഭിച്ചു.
ഈ വർഷം ഓഗസ്റ്റ് 3-നാണ് പ്രത്യേക ട്രിബ്യൂണൽ ഹസീനയ്ക്കെതിരെ വിചാരണയ്ക്ക് അനുമതി നൽകിയത്. മുൻ ആഭ്യന്തര മന്ത്രി അസദുസ്സമാൻ ഖാൻ കമാൽ, പൊലീസ് ഐജി ചൗധരി അബ്ദുല്ല അൽ മാമുൻ തുടങ്ങിയ പ്രമുഖരും കേസിൽ പ്രതികളാണ്. നിലവിൽ ഇന്ത്യയിൽ അഭയം തേടിയ ഹസീനയെ ബംഗ്ലദേശിലെത്തിക്കാനുള്ള നടപടികൾ തുടരുന്നു.
