ധാക്ക : ബംഗ്ലാദേശില്‍ സ്ഥാനഭ്രഷ്ടയാക്കപ്പെട്ട പ്രധാനമന്ത്രി ഷെയ്ഖ് ഹസീനയുടെ ദേശീയ തിരിച്ചറിയല്‍ കാര്‍ഡുകള്‍ ‘ലോക്ക്’ ചെയ്തതായി ബംഗ്ലാദേശ് തിരഞ്ഞെടുപ്പ് കമ്മീഷന്‍ (ഇസി) അറിയിച്ചു. ഇതോടെ അടുത്ത വര്‍ഷം ഫെബ്രുവരിയില്‍ നടക്കാനിരിക്കുന്ന പൊതുതെരഞ്ഞെടുപ്പില്‍ അവര്‍ക്ക് രാജ്യത്തിനു പുറത്തുനിന്നും വോട്ടുചെയ്യാനാകില്ല.
‘ദേശീയ തിരിച്ചറിയല്‍ കാര്‍ഡ് (NID) ലോക്ക് ചെയ്തിരിക്കുന്ന ആര്‍ക്കും വിദേശത്ത് നിന്ന് വോട്ട് ചെയ്യാന്‍ കഴിയില്ല,’ ഇലക്ഷന്‍ കമ്മീഷന്‍ സെക്രട്ടറി അക്തര്‍ അഹമ്മദ് ധാക്കയിലെ നിര്‍ബച്ചോണ്‍ ഭവനിലുള്ള തന്റെ ഓഫീസില്‍ മാധ്യമപ്രവര്‍ത്തകരോട് പറഞ്ഞു. ‘അവരുടെ (ഹസീനയുടെ) NID ലോക്ക് ചെയ്തിരിക്കുന്നു,’ അദ്ദേഹം കൂട്ടിച്ചേര്‍ത്തു.
ഹസീനയുടെ ഇളയ സഹോദരി ഷെയ്ഖ് റെഹാന, മകന്‍ സജീബ് വാസദ് ജോയ്, മകള്‍ സൈമ വാസദ് പുട്ടുള്‍ എന്നിവരുടെ രേഖകളും മരവിപ്പിച്ചതായി ധാക്ക ട്രിബ്യൂണ്‍ പത്രം റിപ്പോര്‍ട്ട് ചെയ്തു. റെഹാനയുടെ മക്കളായ തുലിപ് റിസ്വാന സിദ്ദിഖ്, അസ്മിന സിദ്ദിഖ്, അനന്തരവന്‍ റദ്വാന്‍ മുജിബ് സിദ്ദിഖ് ബോബി, അവരുടെ ഭാര്യാ സഹോദരനും ഹസീനയുടെ മുന്‍ സുരക്ഷാ ഉപദേഷ്ടാവുമായ റിട്ടയേര്‍ഡ് മേജര്‍ ജനറല്‍ താരിഖ് അഹമ്മദ് സിദ്ദിഖ്, ഭാര്യ ഷാഹിന്‍ സിദ്ദിഖ്, അവരുടെ മകള്‍ ബുഷ്റ സിദ്ദിഖ് എന്നിവരെയും വോട്ട് ചെയ്യുന്നതില്‍ നിന്ന് വിലക്കിയതായി റിപ്പോര്‍ട്ടുണ്ട്. ഹസീനയ്‌ക്കെതിരായ പ്രതിഷേധം ശക്തമാകുകയും ജീവന് ഭീഷണിയുണ്ടാകുകയും ചെയ്തതോടെ അവര്‍ ഇന്ത്യയില്‍ അഭയം തേടിയിരിക്കുകയാണ്.
