
ന്യൂഡൽഹി: ബിഹാറിലെ വോട്ടർ പട്ടികയിൽ കേന്ദ്ര തെരഞ്ഞെടുപ്പ് കമ്മീഷൻ നടത്തിവരുന്ന പ്രത്യേക തീവ്ര പുനഃപരിശോധനയിൽ (Special Intensive Revision – SIR) ഞെട്ടിക്കുന്ന വിവരങ്ങൾ കണ്ടെത്തി. ഇലക്ടറൽ രജിസ്ട്രേഷൻ ഓഫീസർമാർ നടത്തിയ പരിശോധനയിലാണ് പൊരുത്തക്കേടുകൾ കണ്ടെത്തിയത്. ബംഗ്ലാദേശ്, നേപ്പാൾ ഉൾപ്പെടെയുള്ള അയൽ രാജ്യങ്ങളിൽ നിന്നുള്ളവരും, മ്യാൻമർ, അഫ്ഗാനിസ്ഥാൻ എന്നിവിടങ്ങളിൽ നിന്നുള്ള ആളുകൾ വരെ ഇന്ത്യൻ വോട്ടർ തിരിച്ചറിയൽ കാർഡുകൾ കൈവശം വച്ചിരിക്കുന്നതായി പരിശോധനയിൽ കണ്ടെത്തി.
വോട്ടർമാരുടെ തിരിച്ചറിയൽ രേഖകളിൽ പൊരുത്തക്കേടുകൾ കണ്ടെത്തിയതിനെ തുടർന്ന് ഏകദേശം മൂന്നു ലക്ഷത്തോളം പേർക്ക് തിരഞ്ഞെടുപ്പ് കമ്മിഷൻ നോട്ടീസ് അയച്ചു. ഓഗസ്റ്റ് ഒന്നിനും 30-നും ഇടയിൽ സമഗ്രമായ പരിശോധന നടത്തുമെന്നും യോഗ്യരല്ലെന്ന് കണ്ടെത്തുന്ന പേരുകൾ സെപ്റ്റംബർ 30-ന് പ്രസിദ്ധീകരിക്കുന്ന അന്തിമ വോട്ടർ പട്ടികയിൽ നിന്ന് ഒഴിവാക്കപ്പെടുമെന്നും ഒരു തിരഞ്ഞെടുപ്പ് കമ്മിഷൻ അംഗം വ്യക്തമാക്കിയതായും റിപ്പോർട്ടുകൾ ഉണ്ട്.
പ്രത്യേക തീവ്ര പുനഃപരിശോധനയുടെ ഭാഗമായി ബിഎൽഒമാർ വീടുകൾ കയറി പരിശോധന നടത്തിയപ്പോഴാണ് ഇന്ത്യൻ തിരിച്ചറിയൽ കാർഡ് കൈവശമുള്ള നേപ്പാൾ, ബംഗ്ലാദേശ്, മ്യാൻമർ എന്നിവിടങ്ങളിൽ നിന്നുള്ള ധാരാളം ആളുകളെ കണ്ടെത്തിയത്. ഇവർ ആധാർ, താമസ സർട്ടിഫിക്കറ്റ്, റേഷൻ കാർഡ് ഉൾപ്പെടെയുള്ള രേഖകളും ഇവർ സ്വന്തമാക്കിയിട്ടുണ്ടെന്ന് കമ്മീഷൻ അംഗം വെളിപ്പെടുത്തി. വ്യാഴാഴ്ച വരെ ആകെ 1,95,802 അപേക്ഷകൾ കരട് പട്ടികയിൽ പേരുകൾ ഉൾപ്പെടുത്തുകയോ ഒഴിവാക്കുകയോ ചെയ്യണമെന്ന് ആവശ്യപ്പെട്ട് വോട്ടർമാരിൽ നിന്ന് ലഭിച്ചതായി തിരഞ്ഞെടുപ്പ് കമ്മിഷൻ സ്ഥിരീകരിച്ചു. ഇതിൽ 24,991 അപേക്ഷകൾ ഇതിനകം ഇആർഒമാർ തീർപ്പാക്കി.