വാഷിംഗ്ടണ്‍ : നേരംപോക്കിനുമാത്രമല്ല, വാര്‍ത്തകളുടെ പ്രധാന ഉറവിടമായും സോഷ്യല്‍മീഡിയയെ പരിഗണിക്കുകയാണ് അമേരിക്കയിപ്പോള്‍. പരമ്പരാഗത വാര്‍ത്താ മാധ്യമങ്ങളേക്കാള്‍ കാഴ്ചക്കാരും സോഷ്യല്‍ മീഡിയയിലൂടെ എത്തുന്ന വീഡിയോകള്‍ക്കും വിവരങ്ങള്‍ക്കുമാണെന്നും ഒരു പഠനം വ്യക്തമാക്കുന്നു.
പല രാഷ്ട്രീയക്കാര്‍ക്കും പരമ്പരാഗത അഭിമുഖം നടത്തുന്നവരേക്കാള്‍ ഇന്റര്‍നെറ്റ് ഹോസ്റ്റുകളുമായി കൂടുതല്‍ സമയം ചെലവഴിക്കുന്ന പ്രവണത കൂടിവരുന്നതായും പഠനം ചൂണ്ടിക്കാട്ടുന്നു. സോഷ്യല്‍ മീഡിയ ഇന്‍ഫ്‌ളുവന്‍സര്‍മാരുടെ ചോദ്യങ്ങളും അവര്‍ക്കു നല്‍കുന്ന ഉത്തരങ്ങളും പെട്ടെന്ന് വൈറലായി മാറുന്നതുകൊണ്ട് തന്നെ അത്തരക്കാരെ ഒഴിവാക്കാന്‍ രാഷ്ട്രീയക്കാരും ശ്രമിക്കില്ല. സ്വാധീനമുള്ള ഇന്‍ഫ്‌ളുവന്‍സര്‍മാരാണെങ്കില്‍ അവര്‍ക്ക് കാഴ്ചക്കാര്‍ ഏറെയാണെന്നതും പ്രധാന ഘടകമാണ്.
അതേസമയം, ഇന്‍ഫ്‌ളുവന്‍സര്‍മാര്‍ പലരും തെറ്റായ വാര്‍ത്തകള്‍ പ്രചരിപ്പിക്കുന്നുവെന്നതും കാഴ്ചക്കാര്‍ അവരെ വിശ്വസിക്കുന്നതുപോലെ ഈ വിവരങ്ങളും വിശ്വസിക്കുന്നുവെന്നതും അപകടകരമാണ്. അതുകൊണ്ടുതന്നെ വ്യാപകമായ ആകര്‍ഷണം ഉണ്ടായിരുന്നിട്ടും, ആഗോളതലത്തില്‍ പ്രതികരിച്ചവരില്‍ പകുതിയിലധികം പേരും (47%) ഇന്‍ഫ്‌ളുവന്‍സര്‍മാരെയും വ്യക്തിത്വങ്ങളെയും കൃത്യമല്ലാത്തതോ തെറ്റിദ്ധരിപ്പിക്കുന്നതോ ആയ വിവരങ്ങളുടെ പ്രധാന ഉറവിടമായി ചൂണ്ടിക്കാട്ടുന്നുണ്ട്.
വാര്‍ത്തകള്‍ക്കായി ഇലോണ്‍ മസ്‌കിന്റെ എക്‌സിലേക്ക് എത്തുന്നവരുടെ എണ്ണവും വര്‍ദ്ധിക്കുന്നുണ്ട്. യുഎസിലാണ് ഇതിന്റെ ഏറ്റവും വര്‍ധനവ്. ‘2022-ല്‍ ഇലോണ്‍ മസ്‌ക് അധികാരമേറ്റതിനുശേഷം കൂടുതല്‍ വലതുപക്ഷ ചായ്വുള്ള ആളുകള്‍, പ്രത്യേകിച്ച് യുവാക്കള്‍, എക്‌സിലേക്ക് ഒഴുകിയെത്തി. യുകെയിലും വലതുപക്ഷ എക്സ് പ്രേക്ഷകര്‍ ഏകദേശം ഇരട്ടിയായി.
