തദ്ദേശ തെരഞ്ഞെടുപ്പിന്റെ തിരക്കുകൾ കാരണം എസ്ഐആർ നടപടികൾ നീട്ടിവയ്ക്കണമെന്ന കേരള സർക്കാരിന്റെയും രാഷ്ട്രീയ പാർട്ടികളുടെയും ആവശ്യത്തെ സുപ്രീംകോടതി ശരിവച്ചു. ചീഫ് ജസ്റ്റിസ് അധ്യക്ഷനായ ബെഞ്ച് ഈ ആവശ്യം പരിഗണിക്കാൻ കേന്ദ്ര തെരഞ്ഞെടുപ്പ് കമ്മിഷനോട് ആവശ്യപ്പെട്ടു. നാളെ കമ്മിഷന് നിവേദനം സമർപ്പിക്കാൻ സംസ്ഥാന സർക്കാരിനോട് കോടതി നിർദേശിച്ചു, അതോടൊപ്പം വെള്ളിയാഴ്ചയ്ക്കകം തീരുമാനമെടുക്കാൻ കമ്മിഷനും ഉത്തരവിട്ടു.
തെരഞ്ഞെടുപ്പ് കമ്മിഷൻ കോടതിയെ അറിയിച്ചതനുസരിച്ച്, കേരളത്തിൽ എന്യുമറേഷൻ ഫോമുകളുടെ 98.8% വിതരണം പൂർത്തിയായിട്ടുണ്ട്. എന്നാൽ, ഈ ഫോമുകൾ ജനങ്ങൾ പൂരിപ്പിച്ച് തിരികെ നൽകുന്നില്ലെന്നും തദ്ദേശ തെരഞ്ഞെടുപ്പിന്റെ തിരക്ക് ഇതിനെ പ്രതികൂലമായി ബാധിച്ചുവെന്നും സംസ്ഥാന സർക്കാരും പാർട്ടികളും കോടതിയിൽ വാദിച്ചു. ഈ വസ്തുതകൾ കണക്കിലെടുത്താണ് കോടതി ആവശ്യത്തിന് കാര്യമുണ്ടെന്ന നിലപാട് സ്വീകരിച്ചത്.
സംസ്ഥാന സർക്കാരിന് വേണ്ടി സ്റ്റാൻഡിങ് കൗൺസൽ സി.കെ. ശശിയും അഭിഭാഷക മീന കെ. പൗലോസും ഹാജരായി. മുസ്ലിം ലീഗിനായി ഹാരിസ് ബീരാൻ, സിപിഎമ്മിനായി സീനിയർ അഭിഭാഷകൻ രഞ്ജിത്ത് കുമാറും അഭിഭാഷകൻ ജി. പ്രകാശും വാദിച്ചു. കോടതിയുടെ ഈ നിർദേശം എസ്ഐആർ നടപടികളുടെ സമയക്രമത്തിൽ മാറ്റം വരുത്തിയേക്കുമെന്നാണ് പ്രതീക്ഷിക്കപ്പെടുന്നത്.
