ബീനാ വള്ളിക്കളം
ഷിക്കാഗോ: ഇന്ത്യയ്ക്ക് പുറത്ത് സീറോ മലബാർ രൂപതക്ക് ആദ്യമായി ലഭിച്ച ഷിക്കാഗോ രൂപത വിജയകരമായ 25 വർഷം പൂർത്തിയാക്കുന്നതിൻ്റെ ഭാഗമായി നടക്കുന്ന ജൂബിലി ആഘോഷങ്ങളുടെ പരിസമാപ്തിയിൽ നടത്തപ്പെടുന്ന കൺവെൻഷന്റെ കിക്കോഫ് എഡിൻബർഗിലെ ഡിവൈൻ മേഴ്സി പള്ളിയിൽ രൂപതാ അധ്യക്ഷൻ മാർ ജോയ് ആലപ്പാട്ട് നിർവഹിച്ചു. ഇടവക വികാരി ഫാദർ റോയി മൂലേച്ചാലിലും ഇടവകാംഗങ്ങളും ജോയ് പിതാവിനെ സസ്നേഹം സ്വീകരിച്ചു. ഇടവകയിലെ കൺവെൻഷൻ പ്രതിനിധികളായ ജോജോ ഫിലിപ്പ്, ടോമി കോട്ടക്കൽ, ട്രസ്റ്റിമാരായ റോമി ചീരംവേലിൽ, വിനോജ് മൈക്കിൾ വടക്കേടത്ത് എന്നിവർ കിക്കോഫ് അതിമനോഹരമാക്കുന്നതിന് നേതൃത്വം നൽകി.
ജോയ് പിതാവ് തൻറെ സന്ദേശത്തിൽ ഈ കൺവെൻഷന്റെ ആവശ്യകതയെയും ഈ കൺവെൻഷനിലൂടെ താൻ വിഭാവനം ചെയ്യുന്ന തലമുറകളുടെ സംഗമം, സൗഹൃദ കൂട്ടായ്മ, സഭയുടെ ശോഭനഭാവിക്ക് ഉതകും വിധത്തിലുള്ള ചർച്ചകൾ, യുവജന പങ്കാളിത്തം എന്നിവയെക്കുറിച്ച് വിശദമായി സംസാരിച്ചു.
വിശ്വാസത്തിൻറെ ഈ മഹാസമ്മേളനത്തിലേക്ക് രൂപതയിലെ എല്ലാ കുടുംബങ്ങളും വന്നുചേരണമെന്നാണ് തൻറെ ആഗ്രഹവും പ്രത്യാശയയുമെന്നും അദ്ദേഹം കൂട്ടിച്ചേർത്തു. വിശ്വാസവും, അറിവും, സൗഹൃദങ്ങളും പങ്കുവയ്ക്കുവാനുള്ള അനുഗ്രഹീതമായ ഒരു വേദിയായി ഈ കൺവെൻഷനെ കാണണമെന്നും യുവജനങ്ങളെ പ്രത്യേകം ഇതിലേക്ക് കൊണ്ടുവരണമെന്നും പിതാവ് ആഹ്വാനം ചെയ്തു. രൂപതയുടെ പ്രഥമ മെത്രാനായ മാർ ജേക്കബ് അങ്ങാടിയത്തിൻറെ മെത്രാഭിഷേക രജതജൂബിലി കൂടി ഇതോടൊപ്പം ആഘോഷിക്കുകയാണ്. കഴിഞ്ഞ 25 വർഷങ്ങളിലായി രൂപത കൈവരിച്ച വളർച്ചയിൽ പങ്കാളികളായ ഏവരെയും ഈ അവസരത്തിൽ ആദരപൂർവ്വം ഓർമ്മിക്കുന്നു. വികാരി ഫാ: റോയ് ഇടവകാംഗങ്ങളുടെ പൂർണ്ണ സഹകരണവും പങ്കാളിത്തവും വാഗ്ദാനം ചെയ്യുകയും ഏവരെയും കൺവെൻഷനിൽ പങ്കുചേരാനായി ക്ഷണിക്കുകയും ചെയ്തു.
2026 ജൂലൈ 9 മുതൽ 12 വരെ അതിമനോഹരമായ ഷിക്കാഗോ നഗരത്തിൽ ആഘോഷപൂർവ്വമായി നടക്കുന്ന ഈ കൺവെൻഷന്റെ വേദി നഗരഹൃദയത്തിൽ സ്ഥിതി ചെയ്യുന്ന അതിപ്രശസ്തമായ മക്കോർമിക് പ്ലേസും അതോട് ചേർന്ന മൂന്ന് ഹോട്ടലുകളും ആണ്. വിശ്വാസ സംരക്ഷണത്തിനും, ആശയവിനിമയത്തിനും, സൗഹൃദ കൂട്ടായ്മകൾക്കും ഉതകുന്ന വിധത്തിൽ കൺവെൻഷൻ ക്രമീകരിക്കുവാൻ ഏവരും ഒറ്റക്കെട്ടായി പരിശ്രമിച്ചു വരുന്നു. ദിവസേനയുള്ള ദിവ്യബലി, ആരാധന എന്നിവയോടൊപ്പം, വൈവിധ്യമാർന്ന വിഷയാവതരണങ്ങളും, സംഘടനാ കൂട്ടായ്മകളും, കലാപരിപാടികളും, മത്സരങ്ങളും ഉണ്ടായിരിക്കും. യുവജനങ്ങൾക്കും മുതിർന്നവർക്കും പ്രത്യേക ട്രാക്കുകളിൽ ആയിട്ടാണ് പരിപാടികൾ ഒരുക്കുന്നത്.
കൂടുതൽ വിവരങ്ങൾക്കും രജിസ്ട്രേഷനും http://www.syroConvention.org എന്ന വെബ്സൈറ്റ് സന്ദർശിക്കാവുന്നതാണ്.
Syro-Malabar Convention kicks off at Edinburg Church, Texas: Mar Joy Alappatt performs the kickoff
