ന്യൂയോർക്കിലെ പ്രശസ്തമായ മെട്രോപൊളിറ്റൻ മ്യൂസിയം ഓഫ് ആർട്ടിലെ (Met Museum) വിലമതിക്കാനാകാത്ത രണ്ട് പെയിന്റിംഗുകൾക്ക് മുകളിൽ വെള്ളം ഒഴിച്ച സംഭവത്തിൽ 19-കാരനായ ജോഷ്വ വാവ്രിൻ എന്ന യുവാവിനെ പോലീസ് അറസ്റ്റ് ചെയ്തു. തിങ്കളാഴ്ച വൈകിട്ട് 4.40ഓടെ മ്യൂസിയത്തിലെ ഫിഫ്ത് അവന്യുവിലുള്ള പ്രധാന കെട്ടിടത്തിലായിരുന്നു സംഭവം.
ഫ്രഞ്ച് ചിത്രകാരൻ ജീൻ ഓഗസ്റ്റ് ഡൊമിനിക് ഇംഗ്രെസ് വരച്ച 19-ആം നൂറ്റാണ്ടിലെ “Princesse de Broglie”യും, ഇറ്റാലിയൻ കലാകാരൻ ജിറൊലാമോ ഡൈ ലിബ്രിയുടെ 16-ആം നൂറ്റാണ്ടിലെ ആൽട്ടർപീസ് “Madonna and Child with Saints” എന്നി ചിത്രങ്ങളാണ് വാവ്രിൻ നശിപ്പിച്ചത്.
വാവ്രിൻ സംഭവസമയത്ത് അസാധാരണമായ പെരുമാറ്റം കാട്ടുകയും, ഏതോ അജ്ഞാത ലഹരി വസ്തുവിന്റെ സ്വാധീനത്തിലായിരുന്ന പോലെ പെരുമാറുകയും ചെയ്തിരുന്നുവെന്നാണ് അധികൃതർ പറയുന്നത്. സംഭവസമയത്ത് സാക്ഷികളാണ് ഇയാളെ പോലീസിന് കാണിച്ചു കൊടുത്തത്. തുടർന്ന് പൊലീസ് അറസ്റ്റ് ചെയ്യുകയുമായിരുന്നു.
ചിത്രങ്ങൾക്കുണ്ടായ കേടുപാടുകൾ ഏകദേശം 4,000 ഡോളർ (ഏകദേശം ₹3.3 ലക്ഷം) വരുമെന്നാണ് പോലീസ് കണക്കാക്കുന്നത്. ഓരോ ചിത്രത്തിനും ഏകദേശം 1,000 ഡോളർ വീതം നാശനഷ്ടം സംഭവിച്ചുവെന്നുമാണ് റിപ്പോർട്ടുകൾ. എന്നാൽ മ്യൂസിയം അധികൃതർ ഇതുസംബന്ധിച്ച് ഔദ്യോഗികമായി പ്രതികരിച്ചിട്ടില്ല.
തിങ്കളാഴ്ച ഉച്ചതിരിഞ്ഞ്, അസാധാരണ പെരുമാറ്റം കാട്ടിയ ഒരു സന്ദർശകനെ മ്യൂസിയത്തിൽ നിന്ന് പുറത്താക്കി. ആർക്കും പരിക്കേറ്റിട്ടില്ല, ആർട്ട് വസ്തുക്കൾക്കും കേടുപാടുകൾ സംഭവിച്ചിട്ടില്ലയെന്നും മ്യൂസിയം വക്താവ് ഡെയ്‌ലി ന്യൂസിനോട് പറഞ്ഞു.
Teenager arrested for pouring water on priceless artwork at New York’s Met Museum
