ജയപ്രകാശ് നായർ
ന്യൂയോർക്ക്: റോക്ക്‌ലാൻഡ് കൗണ്ടി ആസ്ഥാനമായി പ്രവർത്തിക്കുന്ന ഹഡ്സൺ‌വാലി റീജിയണിലെ നായർ സർവീസ് സൊസൈറ്റിയുടെ നേതൃത്വത്തിൽ അതിവിപുലമായ ഓണാഘോഷം സംഘടിപ്പിച്ചു. ഞായറാഴ്ച (ഓഗസ്റ്റ് 31) ഓറഞ്ച്ബർഗിലുള്ള ‘സിത്താർ’പാലസ്സിൽ വച്ച് നടന്ന ഓണാഘോഷത്തിന് പ്രഥമ വനിത ജഗദമ്മ നായർ, മുഖ്യാതിഥിയായ KHNA ജനറൽ സെക്രട്ടറി സിനു നായർ, KHNA എത്തിക്സ് കമ്മിറ്റി മെമ്പർ സുധാ കർത്താ, സംഘടനയുടെ രക്ഷാധികാരി ഡോ. പി.ജി. നായർ, സെക്രട്ടറി പത്മാവതി നായർ, പ്രസിഡന്റ് ജി.കെ.നായർ, ട്രഷറർ കൃഷ്ണകുമാർ എന്നിവർ ചേർന്ന് ഭദ്രദീപം കൊളുത്തി ഔപചാരികമായി ഉദ്ഘാടനം ചെയ്തു.
രാധാമണി നായരുടെ പ്രാർത്ഥനാ ഗാനത്തോടെ ആരംഭിച്ച ചടങ്ങിൽ
ചടങ്ങിൽ സെക്രട്ടറി പത്മാവതി നായർ ആമുഖ പ്രഭാഷണം നടത്തി. സംഘടനയുടെ ജീവകാരുണ്യ പ്രവർത്തനങ്ങൾ, സ്കോളർഷിപ്പ് വിതരണം എന്നിങ്ങനെ കഴിഞ്ഞ വർഷങ്ങളിൽ ചെയ്ത പ്രവർത്തനങ്ങളെക്കുറിച്ച് വിശദീകരിച്ചുകൊണ്ട് പ്രസിഡന്റ് ജി.കെ.നായർ സ്വാഗത പ്രസംഗം നടത്തി.
ചടങ്ങിൽ മുഖ്യാതിഥിയായ KHNA ജനറൽ സെക്രട്ടറി സിനു നായർ ഫ്ലോറിഡയിൽ വച്ചു നടക്കുന്ന അടുത്ത KHNA ഇന്റർനാഷണൽ കൺവൻഷനിലേക്ക് ഏവരേയും സ്വാഗതം ചെയ്തുകൊണ്ട് “ഓണസന്ദേശം” നൽകി. റോക്ക്‌ലാൻഡ് കൗണ്ടി ഭജന സംഘം കൺവീനറും ഹഡ്സൺ‌വാലി മലയാളി അസോസിയേഷൻ പ്രസിഡന്റുമായ വിശ്വനാഥൻ കുഞ്ഞുപിള്ള, ജയപ്രകാശ് നായർ എന്നിവർ ആശംസകൾ അർപ്പിച്ചു. ഗോപിനാഥ് കുറുപ്പ് എം.സി.യായി പ്രവർത്തിച്ചു.
ഓണഘോഷ പരിപാടിയിൽ സംഘടനയുടെ ആദ്യകാല പ്രവർത്തകരായ ഡോ. പി.ജി. നായർ, ഗോപിനാഥ മേനോൻ എന്നിവരെ സെക്രട്ടറി പത്മാവതി നായരും പ്രസിഡന്റ് ജി.കെ. നായരും ചേർന്ന് പൊന്നാടയണിയിച്ച് ആദരിച്ചു. സുജിത് കുമാർ , രാധാമണി നായർ, ജയപ്രകാശ് നായർ, മുരളി പണിക്കർ എന്നിവർ ഓണക്കവിതകൾ അവതരിപ്പിച്ചു.
എന്‍.എസ്.എസ്. ഓഫ് ഹഡ്സൺ‌വാലിയുടെ വെബ്സൈറ്റ് പുന:ക്രമീകരിച്ചതിന് സാരഥ്യം വഹിച്ച ശരത്ത് കണ്ടനാടും മകൾ ദിയ ശരത്തും കൂടി അതിന്റെ ദൃശ്യാവിഷ്കരണം നടത്തിയത് സദസ്സ് പ്രശംസിച്ചു. ചടങ്ങിൽ മെയ് മാസം മുതൽ ഒരു ക്വാർട്ടറിൽ ജന്മനക്ഷത്രം വരുന്ന അംഗങ്ങളുടെ ജന്മദിനവും കേക്കു മുറിച്ച് ആഘോഷിച്ചു. ഓണഘോഷത്തിൽ സിത്താർ പാലസ് വിഭവസമൃദ്ധമായ ഓണസദ്യയും ഒരുക്കി. ട്രഷറർ കൃഷ്ണകുമാർ ഓണഘോഷ പരിപാടിയ്ക്ക് നന്ദി ആർപ്പിക്കുകയും ചെയ്തു.
വെബ്: https://www.nssohv.org/
