ആലപ്പുഴ: ആലപ്പുഴയിലെ കാര്ത്തികപ്പള്ളി യുപി സ്കൂളിന്റെ കെട്ടിടത്തിൻ്റെ മേൽക്കൂര ഇന്ന് രാവിലെ തകർന്നു വീണു. ശക്തമായ മഴയിൽ മേൽക്കൂര തകർന്ന് വീഴുകയായിരുന്നു. കെട്ടിടത്തിന് ഒരു വർഷമായി ഫിറ്റ്നസില്ലെന്നാണ് റിപ്പോർട്ടുകൾ.
അതേസമയം ഉപയോഗിക്കാത്ത പഴയ കെട്ടിടത്തിൻ്റെ മേൽക്കൂരയാണ് തകർന്ന് വീണതെന്ന് പ്രധാനാധ്യാപകൻ ബിജു പറഞ്ഞു. അപകടത്തിൽ ക്ലാസ്മുറിയല്ല ഏകദേശം 60 വര്ഷത്തെ പഴക്കമുള്ള കെട്ടിടമാണ് തകർന്നു വീണത്. കെട്ടിടത്തിലേക്ക് കുട്ടികള് പോകരുതെന്ന് കര്ശന നിര്ദേശം നല്കിയിട്ടുണ്ടെന്നും പ്രധാനാധ്യാപകൻ ബിജു പറഞ്ഞു.
കെട്ടിടം പൊളിച്ചുമാറ്റാന് പഞ്ചായത്ത് നടപടിക്രമങ്ങൾ പുരോഗമിക്കുകയാണ്. നിലവില് 14 മുറിയുടെ കെട്ടിടം കിഫ്ബിയില് അനുവദിച്ചിട്ടുണ്ട്. അതിന്റെ പ്രവര്ത്തികള് പുരോഗമിക്കുന്നു. അടുത്തയാഴ്ച പുതിയ കെട്ടിടത്തിലേക്ക് കുട്ടികളെ മാറ്റാന് സാധിക്കുമെന്നാണ് ലഭിക്കുന്ന വിവരങ്ങളെന്നും പ്രധാനാധ്യാപകൻ ബിജു പറഞ്ഞു. അവധി ദിവസമായതിനാൽ വന് അപകടം ഒഴിവായത്.
