ഫ്ളോറിഡ: ഫോമ ഫ്ളോറിഡാ സണ്ഷൈന് റീജിയനില് നിന്നും യുവനേതാവ് ടിറ്റോ ജോണ് ഫോമാ ദേശീയ ജോ. ട്രഷററായി (2026-28) മത്സരിക്കുന്നു. മികച്ച നേതൃപാടവവും, സംഘാടക മികവും കൈമുതലായുള്ള ടിറ്റോ ജോണിന്റെ സ്ഥാനാര്ത്ഥിത്വം ഫോമാ നേതൃത്വം ക്രമേണ യുവതലമുറയിലേക്കു കൈമാറപ്പെടുന്നതിന്റെ വ്യക്തമായ തെളിവ് കൂടിയായി .
ഏറ്റെടുക്കുന്ന ഉത്തരവാദിത്വങ്ങള് അങ്ങേയറ്റം ആത്മാര്ത്ഥതയോടും പ്രതിബദ്ധതയോടും കൂടി നിറവേറ്റുന്ന മാതൃകാ വ്യക്തിത്വമാണ് ടിറ്റോ ജോണ്.
2009-ല് ഫോമാ യുവജനോത്സവ കമ്മിറ്റി അംഗമെന്ന നിലയില് പ്രവര്ത്തനമാരംഭിച്ച ടിറ്റോ ഇപ്പോള് നാഷണല് കമ്മിറ്റി അംഗമാണ്. 2014-2016 കാലത്ത് നാഷണല് കമ്മിറ്റി യൂത്ത് മെമ്പര് നിലയില് വ്യത്യസ്തമായ ഒട്ടേറെ പ്രവര്ത്തനങ്ങള്ക്കു ചുക്കാന് പിടിച്ചു. 2018-20 ല് സണ്ഷൈന് കമ്മിറ്റി അംഗം; 2020-22 സണ്ഷൈന് റീജിയന് ട്രഷറര്; 2022-24 സണ്ഷൈന് റീജിയന് ചെയര്മാന് എന്നിങ്ങനെ പടിപടിയായി നേതൃരംഗത്തേക്കു ഉയര്ന്നു വന്ന ടിറ്റോ വലിയ പ്രതീക്ഷയുണര്ത്തുന്ന യുവനേതാക്കളില് ഒരാളാണ്.
ഇക്കാലയളവില് ഫോമ ക്രിക്കറ്റ് ടൂര്ണമെന്റ്, ഫോമ യൂത്ത് ഇവന്റ് എന്നിവക്കും നേതൃത്വം നല്കി. ഫ്ളോറിഡാ മലയാളി സാമൂഹ്യ പരിപാടികളിലെ നിറസാന്നിധ്യവുമാണ്.
മലയാളി അസോസിയേഷന് ഓഫ് സെന്ട്രല് ഫ്ളോറിഡയുടെ സെക്രട്ടറിയായി തിളക്കമാര്ന്ന പ്രവര്ത്തനം കാഴ്ച വെച്ചിട്ടുള്ള ടിറ്റോ, എം.എ.സി.എഫ്. വിസാ ക്യാമ്പ് കോര്ഡിനേറ്റര് ആയും മികച്ച സേവനം നല്കിയിട്ടുണ്ട്.
ഫോമാ സണ്ഷൈന് റീജിയനിലെ വിവിധ നേതാക്കളുടെ അഭ്യര്ത്ഥനയെ മാനിച്ചാണ് ടിറ്റോ ജോണ് മത്സരരംഗത്ത് എത്തിയത് . ഫോമായുടെ പുതിയ ഭരണ സമിതിക്ക് ടിറ്റോ ഒരു മുതല് കൂട്ടാകും എന്ന് വിവിധ അസോസിയേഷന് നേതാക്കന്മാര്, വിജയാശംസകള് നേര്ന്നു കൊണ്ട് പ്രസ്താവിച്ചു.
എം.എ. സി.എഫ് പ്രസിഡന്റ് ടോജിമോന് പൈത്തുരുത്തേല്, നിയുക്ത പ്രസിഡന്റ് ബെന് കനകാഭായി, സെക്രട്ടറി ഷീല ഷാജു, ട്രഷറര് സാജന് കോരത്, ട്രസ്റ്റി ബോര്ഡ് ചെയര് ഫ്രാന്സിസ് വയലുങ്കല് എന്നിവര് ടിറ്റോക്കു പിന്തുണയുമായി രംഗത്തുണ്ട്.
ഫോമാ മുന് ജനറല് സെക്രട്ടറി ടി. ഉണ്ണികൃഷ്ണന്, മുന് ജുഡീഷ്യല് കൗണ്സില് സെക്രട്ടറി സുനില് വര്ഗീസ്, ഫോമായുടെ മുതിര്ന്ന നേതാവ് ജെയിംസ് ഇല്ലിക്കല് എന്നിവരും ടിറ്റോയെ പിന്തുണക്കുന്നു.
യുവാക്കളെ നേതൃത്വത്തിലേക്ക് കൊണ്ടുവരികയെന്ന ലക്ഷ്യത്തിലേക്കുള്ള പ്രയാണത്തില് ഒരു പടി കൂടി അടുത്തു എന്നതാണ് ടിറ്റോയുടെ സ്ഥാനാര്ത്ഥിത്വം വ്യക്തമാക്കുന്നതെന്ന് ഫോമാ പ്രസിഡൻ്റായി മത്സരിക്കുന്ന മാത്യു വര്ഗീസ് (ജോസ്, ഫ്ളോറിഡ) പ്രസ്താവിച്ചു. യുവജനത നേതൃ രംഗത്തേക്ക് വന്നില്ലെങ്കില് സംഘടനയുടെ നിലനില്പും പ്രസക്തിയും ഇല്ലാതാകും. അതിനാല് യുവജനതയെ മുന്നിലെത്തിക്കാനുള്ള പ്രവര്ത്തനങ്ങളില് താനും തൻ്റെ ടീമും ശക്തമായി പ്രവര്ത്തിക്കാന് പ്രതിജ്ഞാബദ്ധരാണെന്നു അദ്ദേഹം പറഞ്ഞു. ഈ ലക്ഷ്യം ഇത്തവണ തങ്ങള് സ്ഥാനാര്ത്ഥികളെ നിശ്ചയിച്ചപ്പോള് ഏറെ പ്രതിഫലിക്കുകയും ചെയ്തിട്ടുണ്ടെന്ന് അദ്ദേഹം ചൂണ്ടിക്കാട്ടി.
ഫ്ളോറിഡയിലും അമേരിക്കയൊട്ടാകെയും വലിയ സൗഹൃദത്തിനുടമയാണ് ടിറ്റോ ജോണ്. ഇതെല്ലം നേടിയത് ഫോമാ എന്ന മഹാപ്രസ്ഥാനത്തിലെ പ്രവര്ത്തനത്തിലൂടെ ആണെന്ന് ടിറ്റോ പറയുന്നു. ടിറ്റോ ജോണ് കുടുംബ സമേതം ടാമ്പയിലാണു താമസം.
Tito John is running for FOMAA National Jo. Treasurer .
