ന്യൂഡൽഹി: ഭരണഘടനാപരമായ കടമകൾ രാജ്യത്തെ പൗരർ നിറവേറ്റണമെന്ന് ഭരണഘടനാദിനത്തിൽ പൗരന്മാർക്കെഴുതിയ കത്തിൽ പ്രധാനമന്ത്രി നരേന്ദ്ര മോദി. ശക്തമായ ജനാധിപത്യത്തിന്റെ അടിത്തറയാണിതെന്നും പ്രധാനമന്ത്രി മോദി എക്സിൽ കുറിച്ചു. വോട്ടവകാശം വിനിയോഗിച്ച് ജനാധിപത്യത്തെ ശക്തിപ്പെടുത്തേണ്ടതിന്റെ ഉത്തരവാദിത്വത്തെക്കുറിച്ചും 18 വയസ്സ് തികയുന്ന കന്നി വോട്ടർമാരെ ആദരിച്ചുകൊണ്ട് സ്കൂളുകളും കോളേജുകളും ഭരണഘടനാദിനം ആഘോഷിക്കണമെന്നും അദ്ദേഹം നിർദ്ദേശിച്ചു.
കടമകൾ നിർവഹിക്കുന്നതിലൂടെയാണ് അവകാശങ്ങൾ ഉണ്ടാകുന്നതെന്ന മഹാത്മാഗാന്ധിയുടെ വിശ്വാസത്തെ പ്രധാനമന്ത്രി അനുസ്‌മരിച്ചു. സാമൂഹികവും സാമ്പത്തികവുമായ പുരോഗതിയുടെ അടിസ്ഥാനം കടമകൾ നിറവേറ്റുക എന്നതാണെന്നും അദ്ദേഹം പറഞ്ഞു. ഇന്ന് സ്വീകരിക്കുന്ന നയങ്ങളും തീരുമാനങ്ങളും വരും തലമുറയുടെ ജീവിതത്തെ രൂപപ്പെടുത്തുമെന്നും അദ്ദേഹം പറഞ്ഞു.
വികസിത ഭാരതം എന്ന കാഴ്‌ചപ്പാടിലേക്ക് ഇന്ത്യ നീങ്ങുമ്പോൾ പൗരർ അവരുടെ കടമകൾക്ക് പ്രഥമസ്ഥാനം നൽകണം. നമ്മുടെ ഭരണഘടന മനുഷ്യന്റെ അന്തസ്സിനും സമത്വത്തിനും സ്വാതന്ത്ര്യത്തിനും അതീവ പ്രാധാന്യം നൽകുന്നു. അത് നമുക്ക് അവകാശങ്ങൾ നൽകുമ്പോൾ തന്നെ, പൗരന്മാർ എന്ന നിലയിലുള്ള നമ്മുടെ കടമകളെക്കുറിച്ചും ഓർമ്മിപ്പിക്കുന്നു. അത് നാം എപ്പോഴും നിറവേറ്റാൻ ശ്രമിക്കണം. ഈ കടമകളാണ് ശക്തമായ ജനാധിപത്യത്തിന്റെ അടിത്തറ. ഭരണഘടനാ ശിൽപികൾക്കും അദ്ദേഹം ആദരാഞ്ജലികൾ അർപ്പിച്ചു.
Today is Constitution Day; PM urges citizens to fulfill constitutional duties
