വാഷിംഗ്ടൺ: ഇൻ്റേണൽ റെവന്യൂ സർവീസിന്റെ (IRS) കമ്മീഷണർ സ്ഥാനത്തുനിന്ന് ബില്ലി ലോംഗിനെ യുഎസ് പ്രസിഡന്റ് ഡോണൾഡ് ട്രംപ് നീക്കം ചെയ്തു. നിയമനം ലഭിച്ച് രണ്ട് മാസത്തിനുള്ളിലാണ് ഈ നടപടി. വൈറ്റ് ഹൗസ് ഉദ്യോഗസ്ഥനെയും, വിഷയവുമായി ബന്ധമുള്ള മറ്റൊരു സ്രോതസ്സിനെയും ഉദ്ധരിച്ച് റോയിട്ടേഴ്സ് വാർത്താ ഏജൻസിയാണ് ഈ വിവരം പുറത്തുവിട്ടത്.
ഒരു പുതിയ കമ്മീഷണറെ കണ്ടെത്തുന്നതുവരെ ട്രഷറി സെക്രട്ടറി സ്കോട്ട് ബെസ്സെന്റ് താൽക്കാലിക ചുമതല വഹിക്കും. മിസോറിയിൽ നിന്നുള്ള മുൻ റിപ്പബ്ലിക്കൻ കോൺഗ്രസ് അംഗമായ ലോംഗിനെ ഒരു അംബാസഡറായി നിയമിക്കാൻ സാധ്യതയുണ്ടെന്ന് ന്യൂയോർക്ക് ടൈംസ് റിപ്പോർട്ട് ചെയ്തു.
ട്രംപിന്റെ രണ്ടാം ഭരണകാലത്ത് ഐ.ആർ.എസ്. നേതൃത്വത്തിലുണ്ടാകുന്ന മറ്റൊരു പ്രധാന മാറ്റമാണിത്. ഈ വർഷം ജൂണിലാണ് ഐ.ആർ.എസ്.ന്റെ 51-ാമത് കമ്മീഷണറായി ലോംഗ് ചുമതലയേറ്റത്. 2027 നവംബർ വരെയായിരുന്നു അദ്ദേഹത്തിന്റെ കാലാവധി.
