നൈജീരിയയുടെ വടക്കുപടിഞ്ഞാറൻ മേഖലയിൽ പ്രവർത്തിക്കുന്ന ഭീകര സംഘടനയായ ഇസ്ലാമിക് സ്റ്റേറ്റ് (ഐഎസ്) നെതിരെ അമേരിക്ക “ശക്തവും മാരകവുമായ ആക്രമണം” നടത്തിയതായി യുഎസ് പ്രസിഡന്റ് ഡോണൾഡ് ട്രംപ് അറിയിച്ചു. ട്രൂത്ത് സോഷ്യൽ പ്ലാറ്റ്ഫോമിൽ നൽകിയ പോസ്റ്റിൽ, ഐഎസിനെ ട്രംപ് “ഭീകര സ്കാം” എന്ന് വിശേഷിപ്പിച്ചു. “പ്രധാനമായും നിരപരാധികളായ ക്രിസ്ത്യാനികളെ ലക്ഷ്യമാക്കി ആക്രമിക്കുകയും ക്രൂരമായി കൊലപ്പെടുത്തുകയും ചെയ്യുന്നവരാണ് അവർ എന്ന ആരോപണവും ട്രംപ് ഉന്നയിച്ചു.
അമേരിക്കൻ സൈന്യം ശക്തമായ ആക്രമണങ്ങൾ നടത്തിയതായും അദ്ദേഹം പറഞ്ഞു. എന്നാൽ എവിടെയെല്ലാം ലക്ഷ്യമിട്ടാണ് ആക്രമണം നടന്നതെന്നും എപ്പോൾ നടന്നതെന്നും ട്രംപ് വ്യക്തമാക്കിയിട്ടില്ല. കഴിഞ്ഞ നവംബറിൽ, നൈജീരിയയിലെ ഇസ്ലാമിസ്റ്റ് ഭീകരസംഘങ്ങളെ നേരിടുന്നതിനായി സൈനിക നടപടികൾക്ക് തയ്യാറെടുക്കാൻ ട്രംപ് യുഎസ് സൈന്യത്തിന് നിർദേശം നൽകിയിരുന്നു. വ്യാഴാഴ്ച വൈകിട്ട് നൽകിയ പോസ്റ്റിൽ, എന്റെ നേതൃത്വത്തിൽ തീവ്ര ഇസ്ലാമിക ഭീകരതയെ വളരാൻ ഞങ്ങളുടെ രാജ്യം അനുവദിക്കില്ല” എന്നും ട്രംപ് പറഞ്ഞു.
നവംബറിൽ നൽകിയ മുന്നറിയിപ്പിൽ, ഏതെല്ലാം കൊലപാതകങ്ങളെയാണ് അദ്ദേഹം സൂചിപ്പിച്ചതെന്ന് ട്രംപ് വ്യക്തമാക്കിയിരുന്നില്ല. എന്നാൽ നൈജീരിയയിൽ ക്രിസ്ത്യാനികൾക്കെതിരെ കൂട്ടക്കൊല നടക്കുന്നു എന്ന തരത്തിലുള്ള ആരോപണങ്ങൾ സമീപകാലത്ത് ചില അമേരിക്കൻ വലതുപക്ഷ വൃത്തങ്ങളിൽ പ്രചരിച്ചിരുന്നു. എന്നാൽ അക്രമസംഭവങ്ങൾ നിരീക്ഷിക്കുന്ന സംഘടനകൾ പറയുന്നത്, നൈജീരിയയിൽ ക്രിസ്ത്യാനികളേക്കാൾ കൂടുതലായി മുസ്ലിംകൾ കൊല്ലപ്പെടുന്നു എന്നതിന് തെളിവുകളില്ലെന്നാണ്. നൈജീരിയയിൽ ക്രിസ്ത്യാനികളും മുസ്ലിംകളും ഏകദേശം സമാന എണ്ണത്തിലാണ് ഉള്ളത്.
അന്ന് ബിബിസിയോട് സംസാരിച്ച നൈജീരിയൻ പ്രസിഡന്റ് ബോള ടിനുബുവിന്റെ ഉപദേഷ്ടാവ് ഡാനിയൽ ബ്വാല, ജിഹാദി സംഘങ്ങൾക്കെതിരായ ഏത് സൈനിക നടപടിയും സംയുക്തമായി നടത്തേണ്ടതാണെന്ന് പറഞ്ഞിരുന്നു. ഭീകരവാദത്തിനെതിരെ യുഎസിന്റെ സഹായം നൈജീരിയ സ്വാഗതം ചെയ്യുമെങ്കിലും രാജ്യം “പരമാധികാരമുള്ളതാണ്” എന്നും അദ്ദേഹം കൂട്ടിച്ചേർത്തു.
ജിഹാദികൾ ഒരു പ്രത്യേക മതവിഭാഗത്തെ ലക്ഷ്യമിടുന്നില്ലെന്നും എല്ലാ മതക്കാരെയും, മതമില്ലാത്തവരെയും പോലും അവർ കൊലപ്പെടുത്തിയിട്ടുണ്ടെന്നും ബ്വാല പറഞ്ഞു. നൈജീരിയയിൽ മതസഹിഷ്ണുത നിലനിൽക്കുന്നുണ്ടെന്ന് പ്രസിഡന്റ് ടിനുബു ആവർത്തിച്ചു വ്യക്തമാക്കിയിട്ടുണ്ട്. സുരക്ഷാ പ്രശ്നങ്ങൾ മതഭേദമില്ലാതെ എല്ലാ മേഖലകളിലുമുള്ള ആളുകളെ ബാധിക്കുന്നവയാണ് എന്നും അദ്ദേഹം പറഞ്ഞു.
ഇതിന് മുമ്പ്, നൈജീരിയയിലെ ക്രിസ്ത്യൻ ജനസംഖ്യയ്ക്ക് ഭീഷണി ഉണ്ടെന്നാരോപിച്ച് രാജ്യത്തെ “കൺട്രി ഓഫ് പാർട്ടികുലർ കൺസേൺ” (CPC) ആയി ട്രംപ് പ്രഖ്യാപിച്ചിരുന്നു. “ആയിരക്കണക്കിന് ആളുകൾ കൊല്ലപ്പെട്ടു” എന്ന അവകാശവാദവും അദ്ദേഹം ഉന്നയിച്ചെങ്കിലും ഇതിന് തെളിവുകൾ അവതരിപ്പിച്ചിരുന്നില്ല. മതസ്വാതന്ത്ര്യത്തിന്റെ ഗുരുതരമായ ലംഘനങ്ങളിൽ ഏർപ്പെടുന്ന രാജ്യങ്ങൾക്കെതിരെ ഉപരോധം ഏർപ്പെടുത്താൻ യുഎസ് സ്റ്റേറ്റ് ഡിപ്പാർട്ട്മെന്റ് ഉപയോഗിക്കുന്ന പദവിയാണ് CPC. ഈ പ്രഖ്യാപനത്തിന് പിന്നാലെ, എല്ലാ മതവിഭാഗങ്ങളിലുമുള്ള സമൂഹങ്ങളെ സംരക്ഷിക്കാൻ യുഎസിനെയും അന്താരാഷ്ട്ര സമൂഹത്തെയും ഒപ്പം ചേർന്ന് പ്രവർത്തിക്കാൻ തന്റെ സർക്കാർ പ്രതിബദ്ധമാണെന്ന് ടിനുബു വ്യക്തമാക്കിയിരുന്നു.
ബോക്കോ ഹറാം, ഇസ്ലാമിക് സ്റ്റേറ്റ് വെസ്റ്റ് ആഫ്രിക്ക പ്രവിശ്യ തുടങ്ങിയ ജിഹാദി സംഘങ്ങൾ ഒരു ദശാബ്ദത്തിലേറെയായി നൈജീരിയയുടെ വടക്കുകിഴക്കൻ മേഖലയിൽ വ്യാപക അക്രമങ്ങൾ അഴിച്ചുവിട്ടിട്ടുണ്ട്. ആയിരക്കണക്കിന് ആളുകൾ കൊല്ലപ്പെട്ടിട്ടുണ്ടെങ്കിലും, കൊല്ലപ്പെട്ടവരിൽ ഭൂരിഭാഗവും മുസ്ലിംകളാണെന്ന് ആഗോള രാഷ്ട്രീയ അക്രമങ്ങൾ വിശകലനം ചെയ്യുന്ന സംഘടനയായ ആക്ലെഡ് പറയുന്നു.
നൈജീരിയയിൽ, പ്രധാനമായും മുസ്ലിംകളായ കന്നുകാലി കർഷകരും പലപ്പോഴും ക്രിസ്ത്യാനികളായ കർഷക സംഘങ്ങളും തമ്മിൽ ജലവും മേയൽഭൂമിയും സംബന്ധിച്ച് ഏറ്റുമുട്ടുന്ന സംഭവങ്ങളും പതിവാണ്. പരസ്പര പ്രതികാര ആക്രമണങ്ങളിൽ ആയിരക്കണക്കിന് ആളുകൾ കൊല്ലപ്പെട്ടിട്ടുണ്ട്. എന്നാൽ ഇരുവശത്തുനിന്നും ക്രൂരതകൾ നടന്നിട്ടുണ്ടെന്നാണ് റിപ്പോർട്ടുകൾ. ക്രിസ്ത്യാനികളെ അനുപാതവിരുദ്ധമായി ലക്ഷ്യമിട്ടുവെന്നതിന് തെളിവുകളില്ലെന്നാണ് മനുഷ്യാവകാശ സംഘടനകളുടെ നിലപാട്.
Trump said that the US has carried out a heavy attack against the Islamic State in Nigeria
