വാഷിംഗ്ടൺ: റഷ്യ-യുക്രെയ്ൻ യുദ്ധം അവസാനിപ്പിക്കുന്നതിനുള്ള സമാധാന ചർച്ചകളുടെ ഭാഗമായി യുക്രെയ്ൻ പ്രസിഡന്റ് വൊളോഡിമിർ സെലെൻസ്കിയുമായി നടത്തിയ കൂടിക്കാഴ്ച വിജയകരമെന്ന് യു.എസ് പ്രസിഡന്റ് ഡോണൾഡ് ട്രംപ്.
യുദ്ധം അവസാനിപ്പിക്കുന്നതിനായി തയ്യാറാക്കിയ 20 ഇന സമാധാന പദ്ധതിയെക്കുറിച്ച് ഇരുനേതാക്കളും ചർച്ച ചെയ്തു. ഈ പദ്ധതിയുടെ 90 ശതമാനത്തോളം കാര്യങ്ങളിൽ ധാരണയായതായി സെലെൻസ്കി പറഞ്ഞു. യുക്രെയ്നിന്റെ സുരക്ഷാ ഉറപ്പുകളുടെ കാര്യത്തിൽ 95% പുരോഗതി ഉണ്ടായതായി ട്രംപ് അറിയിച്ചു, എന്നാൽ സെലെൻസ്കി ഇത് 100% ആണെന്നാണ് അവകാശപ്പെട്ടത്. യൂറോപ്യൻ രാജ്യങ്ങൾക്കും ഇതിൽ വലിയ പങ്കുണ്ടായിരിക്കുമെന്ന് ഫ്ലോറിഡയിലെ ട്രംപിന്റെ മാർ-എ-ലാഗോ റിസോർട്ടിൽ വെച്ച് നടന്ന കൂടിക്കാഴ്ചയിൽ ട്രംപ് വ്യക്തമാക്കി.
അതേസമയം, ഡോൺബാസ് (Donbas) മേഖലയുടെ നിയന്ത്രണം ഉൾപ്പെടെയുള്ള ഭൂപ്രദേശങ്ങളുമായി ബന്ധപ്പെട്ട തർക്കങ്ങൾ ഇപ്പോഴും ഒരു പ്രധാന വെല്ലുവിളിയായി തുടരുന്നു. നിലവിൽ റഷ്യയുടെ പക്കലുള്ള ഭൂമി വിട്ടുകൊടുക്കുന്ന കാര്യത്തിൽ റഷ്യയുമായി ചർച്ച നടത്തേണ്ടതുണ്ട്.
‘എല്ലാ വിഷയങ്ങളിലും വിശദമായ ചർച്ച നടത്തി. രണ്ടാം ലോകമഹായുദ്ധത്തിനു ശേഷമുള്ള ഏറ്റവും വലുതും മാരകവുമായ യുദ്ധമായി മാറിക്കഴിഞ്ഞ യുക്രെയ്ൻ – റഷ്യ യുദ്ധം അവസാനിപ്പിക്കുകയാണ് ലക്ഷ്യം. ഒന്നോ രണ്ടോ സങ്കീർണ്ണമായ പ്രശ്നങ്ങളുണ്ട്, വളരെ കഠിനമായവ. എന്നാൽ ചർച്ചകൾ വളരെ നന്നായി മുന്നോട്ട് പോകുന്നുണ്ടെന്നാണ് എനിക്ക് തോന്നുന്നത്. ഡോൺബാസിൽ ഒരു സ്വതന്ത്ര വ്യാപാര മേഖല സ്ഥാപിക്കുന്ന കാര്യത്തിൽ ഇപ്പോഴും ധാരണയിലെത്താൻ സാധിച്ചിട്ടില്ല. അതൊരു വളരെ കഠിനമായ വിഷയമാണ്, പക്ഷേ അത് പരിഹരിക്കാനാവുമെന്ന് കരുതുന്നു’ – ട്രംപിൻ്റെ വാക്കുകൾ. “ഒരു കരാറിലെത്താൻ സാധിച്ചില്ലെങ്കിൽ യുദ്ധം തുടരുകയും കൂടുതൽ ആളുകൾ മരിക്കുകയും ചെയ്യും, അത് ആരും ആഗ്രഹിക്കുന്നില്ല” എന്നും ട്രംപ് കൂട്ടിച്ചേർത്തു.
സെലെൻസ്കിയുമായുള്ള കൂടിക്കാഴ്ചയ്ക്ക് തൊട്ടുമുമ്പ് ട്രംപ് റഷ്യൻ പ്രസിഡന്റ് വ്ലാഡിമിർ പുടിനുമായി ഫോണിൽ സംസാരിച്ചിരുന്നു. ഇത് വളരെ ക്രിയാത്മകമായ ചർച്ചയായിരുന്നുവെന്നാണ് അദ്ദേഹം വിശേഷിപ്പിച്ചത്. യുക്രെയ്ന്റെ പുനർനിർമ്മാണത്തിൽ റഷ്യ സഹായിക്കേണ്ടി വരുമെന്ന് ട്രംപ് പറഞ്ഞു. ഫ്രഞ്ച് പ്രസിഡന്റ് ഇമ്മാനുവൽ മക്രോ, ഫിൻലൻഡ് പ്രസിഡന്റ് അലക്സാണ്ടർ സ്റ്റബ്, പോളണ്ട് പ്രസിഡന്റ് കരോൾ നവ്റോക്കി, നോർവീജിയൻ പ്രധാനമന്ത്രി ജോനാസ് ഗഹർ സ്റ്റോർ, ഇറ്റാലിയൻ പ്രധാനമന്ത്രി ജോർജ മെലോനി, ബ്രിട്ടിഷ് പ്രധാനമന്ത്രി കെയർ സ്റ്റാർമർ, ജർമൻ ചാൻസലർ ഫ്രെഡറിക് മെർസ്, നാറ്റോ സെക്രട്ടറി ജനറൽ മാർക്ക് റുട്ടെ, യൂറോപ്യന് കമ്മിഷന് പ്രസിഡന്റ് ഉര്സുല വോണ് ഡെര് ലെയന് എന്നിവരുമായും ഫോണിൽ സംസാരിച്ചെന്ന് ട്രംപ് പറഞ്ഞു. കൂടിക്കാഴ്ചയ്ക്കിടെ ട്രംപും സെലെൻസ്കിയും വിവിധ യൂറോപ്യൻ നേതാക്കളുമായി ഫോണിൽ സംസാരിച്ചു. ബ്രിട്ടൻ, ഫ്രാൻസ്, ജർമ്മനി, ഇറ്റലി, പോളണ്ട്, നോർവേ എന്നീ രാജ്യങ്ങളിലെ നേതാക്കളും നാറ്റോ (NATO) സെക്രട്ടറി ജനറൽ മാർക്ക് റുട്ടെ, യൂറോപ്യൻ കമ്മീഷൻ പ്രസിഡന്റ് ഉർസുല വോൺ ഡെർ ലെയ്ൻ എന്നിവരും ഇതിൽ ഉൾപ്പെടുന്നു.
സമാധാന ചർച്ചകളിൽ വലിയ പുരോഗതി ഉണ്ടായതായും ഏതാനും ആഴ്ചകൾക്കുള്ളിൽ ഒരു അന്തിമ തീരുമാനമുണ്ടാകുമെന്ന് പ്രതീക്ഷിക്കുന്നതായും ട്രംപ് പറഞ്ഞു. ഈ ചർച്ചയിൽ വെടിനിർത്തൽ സംബന്ധിച്ച് കൃത്യമായ ധാരണയായിട്ടില്ലെങ്കിലും സമാധാന കരാറിനോട് ഇരുരാജ്യങ്ങളും കൂടുതൽ അടുത്തതായാണ് റിപ്പോർട്ടുകൾ സൂചിപ്പിക്കുന്നത്. സമാധാന ചർച്ചകളുടെ ഫലം ഏതാനും ആഴ്ചകൾക്കുള്ളിൽ വ്യക്തമാകുമെന്ന് ട്രംപ് പ്രതീക്ഷ പ്രകടിപ്പിച്ചു. ജനുവരിയിൽ ഇരു രാജ്യങ്ങളിലെയും ഉദ്യോഗസ്ഥർ വീണ്ടും കൂടിക്കാഴ്ച നടത്താനും വാഷിംഗ്ടണിൽ ഒരു ഉച്ചകോടി സംഘടിപ്പിക്കാനും തീരുമാനമായിട്ടുണ്ട്.
Trump Zelensky meeting at Mar-a-Lago Update
