ലണ്ടൻ: യുകെ മലയാളികളെ സങ്കടത്തിലാക്കി ഒരു പനി മരണം കൂടെ. നോര്‍ത്താംപ്ടണ് സമീപം വില്ലിങ്‌ബ്രോ എന്ന സ്ഥലത്ത് താമസിക്കുന്ന വയനാട് സ്വദേശിനി അഞ്ജു അമല്‍ ആണ് മരിച്ചത്. 29 വയസായിരുന്നു. നോര്‍ത്താംപ്ടന്‍ ആശുപത്രിയില്‍ ചികിത്സയിൽ കഴിയുകയായിരുന്നു അഞ്ജു അമല്‍. കണ്ണൂർ ഇരിട്ടി സ്വദേശി അമൽ അഗസ്റ്റിന്‍റെ ഭാര്യയാണ്. പനിയെത്തുടർന്നുള്ള ശാരീരിക അസ്വസ്ഥതകൾ കാരണം ഒരാഴ്ച മുൻപ് നോർത്താംപ്ടൺ എൻഎച്ച്എസ് ജനറൽ ഹോസ്പിറ്റലിൽ ചികിത്സയിൽ പ്രവേശിക്കുകയായിരുന്നു. ചികിത്സയിൽ തുടരവേ ഇന്ന് പുലർച്ചെ ഒരു മണിയോടെയാണ് മരണം.
നോർത്താംപ്ടണിലെ വില്ലിങ്ബ്രോയിൽ കുടുംബമായി താമസിക്കുകയായിരുന്നു. അഞ്ചു വർഷങ്ങൾക്കു മുൻപ് പഠനത്തിനായി വിദ്യാർഥി വിസയിലാണ് അഞ്ജു യുകെയിൽ എത്തിയത്. ചെംസ്ഫോഡ് ആംഗ്ലിയ റസ്കിൻ യൂണിവേഴ്സിറ്റിയിലെ വിദ്യാർഥിനിയായിരുന്നു. പഠനശേഷം പോസ്റ്റ് സ്റ്റഡി വർക് വിസയിൽ തുടരവേ സ്വകാര്യ സ്ഥാപനത്തിൽ എക്സ്പോർട്ട് ക്ലാർക്ക് ആയി രണ്ടര വർഷം മുൻപ് വർക് വിസ ലഭിച്ചു. രണ്ടു വർഷം മുൻപാണ് വിവാഹിതയായത്. വയനാട് പുൽപ്പള്ളി മാരപ്പൻമൂല ആനിത്തോട്ടത്തിൽ ജോർജ് – സെലിൻ ദമ്പതികളുടെ മകളാണ്. സഹോദരി: ആശ. സംസ്കാരം നാട്ടിൽ നടത്താനുള്ള ക്രമീകരണങ്ങൾ നടക്കുകയാണ്.
