കീവ്: യുക്രെയ്ൻ പ്രസിഡന്‍റ് വോളോഡിമിർ സെലെൻസ്കിയുടെ മുഖ്യ സഹായിയായ ആൻഡ്രി യെർമാകിന്‍റെ വീട്ടിൽ പരിശോധന നടത്തി യുക്രെയ്നിലെ അഴിമതി വിരുദ്ധ വകുപ്പ്. പ്രസിഡന്‍റിന്‍റെ ചീഫ് ഓഫ് സ്റ്റാഫ് എന്ന നിലയിൽ, യുക്രെയ്നിലെ രണ്ടാമത്തെ ശക്തനായ വ്യക്തിയായിട്ടാണ് യെർമാകിനെ കണക്കാക്കുന്നത്. റഷ്യയുമായുള്ള യുദ്ധത്തെക്കുറിച്ച് അടുത്തിടെ ജനീവയിൽ നടന്ന യുഎസുമായുള്ള ചർച്ചകളിൽ അദ്ദേഹം യുക്രേനിയൻ പ്രതിനിധി സംഘത്തെ നയിച്ചിരുന്നു.
റെയ്ഡ് നടക്കുന്നതായി യെർമാക് തന്നെ സ്ഥിരീകരിക്കുകയും അധികാരികളുമായി പൂർണ്ണമായി സഹകരിക്കുന്നു എന്ന് ടെലിഗ്രാമിൽ കുറിക്കുകയും ചെയ്തു. അന്വേഷകർക്ക് ഒരു തടസ്സവും നേരിടുന്നില്ല. അപ്പാർട്ട്‌മെൻ്റിൽ പൂർണ്ണ പ്രവേശനം നൽകിയിട്ടുണ്ട്, തന്‍റെ അഭിഭാഷകർ നിയമപാലകരുമായി സംവദിച്ചുകൊണ്ട് സ്ഥലത്തുണ്ട് എന്നും അദ്ദേഹം പറഞ്ഞു.
റെയ്ഡുകളിൽ യുക്രെയ്നിലെ രണ്ട് പ്രധാന അഴിമതി വിരുദ്ധ സ്ഥാപനങ്ങളായ നാഷണൽ ആന്‍റി-കറപ്ഷൻ ബ്യൂറോ ഓഫ് യുക്രെയ്ൻ, സ്പെഷ്യലൈസ്ഡ് ആൻ്റി-കറപ്ഷൻ പ്രോസിക്യൂട്ടർസ് ഓഫീസ് എന്നിവ പങ്കെടുത്തതായി ഏജൻസികൾ വെള്ളിയാഴ്ച പുറത്തിറക്കിയ പ്രസ്താവനയിൽ പറയുന്നു. പരിശോധനയുടെ കാരണം പ്രസ്താവനയിൽ വെളിപ്പെടുത്തിയിട്ടില്ല. എന്നാൽ, യുക്രെയ്നിലെ നിർണ്ണായക ഊർജ്ജ ഇൻഫ്രാസ്ട്രക്ചറുമായി ബന്ധപ്പെട്ട് കൈക്കൂലി ആരോപണങ്ങളെക്കുറിച്ച് രണ്ട് ഏജൻസികളും ഒരാഴ്ച മുമ്പ് അന്വേഷണം പ്രഖ്യാപിച്ചിരുന്നു. ഈ അഴിമതി ആരോപണങ്ങളെത്തുടർന്ന് സെലെൻസ്കിയുടെ രണ്ട് മന്ത്രിമാർക്ക് ഇതിനോടകം സ്ഥാനം നഷ്ടമായിട്ടുണ്ട്. സെലെൻസ്കിയുടെ വിനോദ വ്യവസായത്തിലെ മുൻ ബിസിനസ് പങ്കാളിയും ഈ വിവാദത്തിൽ ഉൾപ്പെട്ടിട്ടുണ്ട്.
