അമേരിക്കൻ പ്രസിഡന്റ് ഡൊണാൾഡ് ട്രംപിന്റെ ഭരണകൂടം തായ്വാനുമായി ചരിത്രത്തിലെ ഏറ്റവും വലിയ ആയുധ ഇടപാട് പ്രഖ്യാപിച്ചു. 11.1 ബില്യൻ ഡോളർ (ഏകദേശം ഒരു ലക്ഷം കോടി രൂപ) മൂല്യമുള്ള ഈ പാക്കേജിൽ ഹൈ മൊബിലിറ്റി ആർട്ടിലറി റോക്കറ്റ് സിസ്റ്റങ്ങൾ (HIMARS), 300 കിലോമീറ്റർ റേഞ്ചുള്ള ATACMS മിസൈലുകൾ, ആന്റി-ടാങ്ക് മിസൈലുകൾ, ആൾരഹിത ഡ്രോണുകൾ, മിലിട്ടറി സോഫ്റ്റ്വെയർ എന്നിവ ഉൾപ്പെടുന്നു. തായ്വാൻ പ്രസിഡന്റ് ലായ് ചിങ്-തെ നവംബറിൽ പ്രഖ്യാപിച്ച 40 ബില്യൻ ഡോളർ പ്രതിരോധ ബജറ്റിന്റെ ഭാഗമായാണ് ഈ ഇടപാട്.
1979ലെ തായ്വാൻ റിലേഷൻസ് ആക്ട് പ്രകാരം തായ്വാന്റെ സ്വയം പ്രതിരോധ ശേഷി ഉറപ്പാക്കാൻ യുഎസ് ബാധ്യസ്ഥമാണ്. ഔദ്യോഗിക നയതന്ത്ര ബന്ധമോ സൈനിക സഖ്യമോ ഇല്ലാത്തിട്ടും, ചൈനയുടെ ആക്രമണ ഭീഷണി നേരിടാൻ തായ്വാനെ സഹായിക്കുന്നതിനാണ് ഈ ആയുധ വിൽപ്പന. ചൈന തായ്വാനെ തങ്ങളുടെ ഭാഗമായി കണക്കാക്കുന്നതിനാൽ ഈ നീക്കം ബെയ്ജിങ്ങിനെ കടുത്ത രോഷത്തിലാക്കിയിട്ടുണ്ട്.ചൈനീസ് വിദേശകാര്യ മന്ത്രാലയം ഇടപാടിനെ “തീവ്രമായി അപലപിച്ചു”, ഇത് തങ്ങളുടെ പരമാധികാരത്തിനും തായ്വാൻ കടലിടുക്കിലെ സമാധാനത്തിനും ഭീഷണിയാണെന്ന് ആരോപിച്ചു. തായ്വാൻ ആക്രമിച്ചാൽ ജപ്പാനും ഇടപെടുമെന്ന ജാപ്പനീസ് പ്രധാനമന്ത്രിയുടെ പ്രസ്താവനയ്ക്ക് പിന്നാലെയാണ് ഈ ഇടപാട് വരുന്നത്, ഇത് ചൈനയ്ക്ക് ഇരട്ടി ആഘാതമാകും. ട്രംപ് ഭരണകൂടം ചൈനയുമായി വ്യാപാര ചർച്ചകൾ നടത്തുന്നതിനിടെയാണ് ഈ പ്രഖ്യാപനം. തായ്വാൻ വിഷയത്തിൽ ഉറച്ച നിലപാട് സ്വീകരിച്ചുകൊണ്ട് വ്യാപാര കരാറുകൾ മുന്നോട്ടുകൊണ്ടുപോകാനുള്ള ശ്രമമാണിത്. തായ്വാൻ പ്രതിരോധ മന്ത്രാലയം ഇടപാടിനെ സ്വാഗതം ചെയ്തു, ഇത് രാജ്യത്തിന്റെ അസമമിതി യുദ്ധശേഷി വർധിപ്പിക്കുമെന്ന് പ്രസ്താവിച്ചു.
