വാഷിംഗ്ടണ്‍: ട്രംപ് ഭരണകൂടത്തിന്‍റെ അന്താരാഷ്ട്ര വിദ്യാർത്ഥികളോടുള്ള നിലവിലെ സമീപനം കാരണം, യുഎസ് സർവ്വകലാശാലകളിൽ ഇന്ത്യൻ വിദ്യാർത്ഥികളുടെ പ്രവേശനത്തിൽ വലിയ കുറവ് രേഖപ്പെടുത്തി. ഹൈദരാബാദിലെ വിദ്യാഭ്യാസ കൺസൾട്ടന്‍റുമാർ പറയുന്നതനുസരിച്ച്, വിദേശത്തേക്ക് പോകുന്ന വിദ്യാർത്ഥികളുടെ എണ്ണത്തിൽ 70 ശതമാനം ഇടിവുണ്ടായിട്ടുണ്ട്. വിസ അപ്പോയിൻ്റ്‌മെൻ്റ് സ്ലോട്ടുകളിലെ തടസവും വിസ നിരസിക്കൽ നിരക്കിലെ അപ്രതീക്ഷിത വർദ്ധനവുമാണ് ഈ കുറവിന് കാരണം.
സാധാരണയായി ഈ സമയമാകുമ്പോൾ മിക്ക വിദ്യാർത്ഥികളും വിസ അഭിമുഖങ്ങൾ പൂർത്തിയാക്കി യാത്രയ്ക്ക് തയ്യാറെടുക്കുകയായിരിക്കും. എന്നാൽ ഈ വർഷം, ഒരു സ്ലോട്ട് തുറക്കുന്ന പ്രതീക്ഷയിൽ ഇപ്പോഴും എല്ലാ ദിവസവും പോർട്ടൽ റീഫ്രഷ് ചെയ്യുകയാണ്. വർഷങ്ങളിലെ ഏറ്റവും മോശം അവസ്ഥയാണിതെന്ന് ഹൈദരാബാദ് ഓവർസീസ് കൺസൾട്ടൻ്റിലെ സഞ്ജീവ് റായ് ടൈംസ് ഓഫ് ഇന്ത്യയോട് പറഞ്ഞു.
വിസ സ്ലോട്ടുകൾ ഘട്ടം ഘട്ടമായി പുറത്തുവിടുമെന്ന് യുഎസ് അധികൃതർ വാഗ്ദാനം ചെയ്തിരുന്നെങ്കിലും, കാര്യങ്ങളിൽ വ്യക്തതയില്ലാത്തത് വിദ്യാർത്ഥികളെ ആശങ്കയിലാക്കുന്നു. കൂടാതെ, സ്ലോട്ടുകൾ ബുക്ക് ചെയ്യാൻ സാധിച്ച വിദ്യാർത്ഥികൾക്ക് പോലും സ്ഥിരീകരണം ലഭിക്കുന്നില്ലെന്ന് വിൻഡോ ഓവർസീസ് എജ്യുക്കേഷൻ കൺസൾട്ടൻസിയിലെ അങ്കിത് ജെയിൻ പറഞ്ഞു. ബുക്കിംഗുകൾ സ്ഥിരീകരിക്കാതെ സ്ലോട്ടുകൾ തുറന്നിടുന്നത് യുഎസ് സിസ്റ്റം പരിശോധിക്കുന്നതാവാം ഏക യുക്തിപരമായ കാരണമെന്നും അദ്ദേഹം കൂട്ടിച്ചേർത്തു.
ഇതിന്‍റെ ഫലമായി, വിദ്യാർത്ഥികൾ ഇപ്പോൾ മറ്റ് രാജ്യങ്ങളിൽ പഠനം തേടുകയാണ്. അടുത്ത ദിവസങ്ങളിൽ സ്ലോട്ടുകൾ പുറത്തിറക്കിയില്ലെങ്കിൽ, ആയിരക്കണക്കിന് വിദ്യാര്‍ത്ഥികളുടെ സ്വപ്നങ്ങൾ തകരും. ഏകദേശം 80 ശതമാനം ഇടിവാണ് ഇപ്പോൾ കാണുന്നത്. വിദ്യാർത്ഥികളിൽ നിന്നും അവരുടെ മാതാപിതാക്കളിൽ നിന്നും ദിവസവും പരിഭ്രാന്തരായ കോളുകൾ ലഭിക്കുന്നുണ്ട്,” I20 ഫീവർ കൺസൾട്ടൻസിയിലെ അരവിന്ദ് മണ്ടുവ പറഞ്ഞു.
